Egypt

بسم الله الرحمن الرحيم
السلام عليكم ورحمة الله وبركاته

اعزائي المشاهدين .. ننقل لكم احداث ما قبل المبارة
مباراة مصر والجزائر .. في التصفيات المؤهلة لكأس العالم 2010
..
طخ طخ ططخ .. مصر … طخ طخ ططخ .. مصر

طخ طخ ططااااخ .. مصر

اوووووووووو مصراوي .. اوووووووو مصراااوي

….

بعد فاصل من التشجيع الحار لمنتخبنا الوطني ندخل في المباراة

احــم

قصدي ندخل في الموضوع

انا عندي كام حاجة كده هقولهم على السريع .. ومعلش هنطول في البوست ده شوية

انا عارف الناس بتتخنق

بس كله يهون علشان المنتخب …. وﻻ ايه ؟

..

يا اخي الواحد مش عارف ايه الحب اللي ظهر فجأة لمصر ده ؟

ايه يا عم .. ايه اللي حصل ؟

والله منا عارف يا اخي .. امبارح خير اللهم اجعله خير لما رجعت من السفر

قاعد بقلب في قنوات التليفزيون والدش .. اززز وانا بضغط على القناة اﻻولي

اﻻقي اييييييه

اييييييييه ؟

يا جدع اﻻقي كمية اغاني لمصر محطوطة ورا بعضها .. جسمي قشعر بعدها فعلا وكنت هيعط بس مسكت نفسي علشان كنت جعان جداا وكنت باكل بشراهة !!

طب حلو وايه اللي يضايقك في كده ؟

يا اخي انا مش مضايق .. بالعكس انا فرحان جداا .. بس في حاجة كمان

ايييه ؟

وانا مروح بيتنا برضه امبارح .. ازززز اﻻقي كمية اعلام محطوطة في البلوكونات ومتعلقة في الشارع .. واﻻعلام يا جدع مرفوعة كده وبترفرف وقلبي عمال يرقص معاها

قلبك بيرقص !! ليه خير .. هو انت ناوي تتجوز وﻻ حاجة ؟

يادي سيرة الجواز اللي واجع دماغنا بيها .. ياعم خلينا مع المنتخب دلوقتي

السؤال اللي محيرني بقى يا اخي … ان ليه احنا مبنحبش مصر واﻻغاني والكلام الحلو واﻻشعار والقصايد مبتظهرش غير لما يكون في ماتش كورة ؟؟

هي مصر مبتبقاش حلوة غير في الكورة بس .. ؟؟

حد يفهمني

!!

طيب الحاجة التانية اللي محيراني

ليه لما نلاقي الناس بتحب مصر ورايحين يشتروا اﻻعلام ويقفوا جمب المنتخب وبيشجعوا بحرارة .. نقول عليهم دول عالم مجانيين ؟؟

يا اخي انت ملكش في الكورة .. بلاش تحبط في الناس وتخليهم يكرهوا حياتهم

!!

بس ياريت بعد كلامك دا كله متبقاش تتفرج على الماتش .. ماشي ؟

اصل مفيش واحد في مصر مش هيتفرج على الماتش ده

يا عم الناس بتحب تشجع .. وبتحب المنتخب .. وبتحب مصر

بلاش تقول يااااه .. امال الناس دي كلها والجماهير دي كلها مبتطلعش ليه على القدس ينقذوا المسجد اﻻقصى ؟؟؟

طيب ايه اللي دخل القضية دي في القضية دي ؟

دي حاجة ودي حاجة تانية خاااالص

هتقولي اصلهم شباب عاطل .. وشباب فاضي .. والكورة اي كلام ؟؟

ماشي … لو نفترض ان كلامك دا كله صح .. روح انت تقدم المسيرة .. وافتحلنا معبر رفح

وانا جاي وراك علطووووول

…………

يا اخي الناس من كتر زهقها قالت تعمل اي حاجة تفك بيها عن نفسها .. ولعلمك مصر لما بتفوز في ماتش او بنتأهل لدور النهائي او بنفوز على فريق .. والله بتلاقي الشعب كله وفرحان واﻻنتاج بيزيد كمان .. وافتكروا ايام البرازيل وايطاليا

طب ومال اﻻنتاج بالكورة ؟؟؟

اقولك انا .. العامل اللي طوول النهار في شغله .. بيرجع بيته بيبقى نفسه يلاقي اي حاجة تفرحه .. ولما بيشوف الماتش بقى .. ويلاقي مصر كسبت ايطاليا مثلا .. او اتغلبت من البرازيل بالعافية .. اكيد هيفرح طبعا .. وهيغني طوول الليل ويقول

ياااارب كتر من افراحنا .. مصر مصر تحيا مصر

الصبح بقى وهو رايح الشغل . في المواصلات بيتكلم مع زميله في الشغل عن الماتش .. والواد زيدان وابوتريكة , وشوفت ابوتريكة لما رقص الواد بتاع البرازيل

طبعا رايح مبسوط وسعيد .. اكيد هيشتغل وهو فرحان وهينتج اكتر

غير بقى لما مصر تبقى مغلوبة .. تلاقيه رايح الشغل ضارب “بوذ” .. اللي بيكلمه ميردش عليه .. قرفان من الدنيا .. وقرفان من نفسه .. واللي يجي يكلمه هيرد عليه .. يا اما بخناقة يا اما مش هيرد اصلا

!!

يا ناس بالله عليكم .. سيبوا الناس تفرح وبطلوا تطلعوا اشاعات وتنشروها

احنا شعب غلبان بيصدق اي حاجة

التمثيلية اللي اتعملت امبارح من ﻻعيبة الجزائر .. الناس كلها صدقتها .. والمنتديات والصحف المعارضة والناس اللي مبتصدق تلاقي اي حاجة

“زي ما بيقولوا نفسه يلاقي الكبريت .. علشان يعمل حريقة”

كله قعد يطلع اشاعات .. ويقولك الراجل الجزائري طلق مراته المصرية علشان الماتش بس بذمتكم دا كلام يدخل العقل .. ويجيبولك صورة في الضلمة .. ويقولك الجزايريين مولعين في بيوت المصريين

على اساس ان المصريين اللي هناك دوول ايه يعني .. حشرات ماشية في الشارع محدش بيحميها

هيا الناس متعرفش ان :

في حاجة اسمها فوتوشوب ولعب في الصور

في سفارة في الجزائر اسمها السفارة المصرية .. ودي عارفة كام مصري بالظبط موجود في الجزائر .. وعارفاهم باﻻسم واحد واحد

ﻻعيبة الجزائر جايين هنا يستفزونا .. ويكسروا في بلدنا ويقولوا احنا بنتحدف بالطوب والمصريين بيضربونا .. ميعرفوش ان لعبتهم مكشوفة .. والتمثيلية دي قديمة .. واننا هنكسبهم هنا ان شاء الله

ياارب الناس متعملش زي ما هما بيعملوا .. خلينا احنا اﻻحسن .. اه ضربتونا هناك .. وبتكسروا هنا في بلدنا

بس هنوريكم في الملعب .. واحنا اللي هنكسب

ان شاء الله

اخر حاجة عايز اقولها للناس اللي بتطلع وبتنشر اﻻشاعات دي

حرام عليكم

اتقوا الله فينا .. احنا مصريين زيكم برضه

متنشروش حاجة اﻻ لما تتأكدوا من صحتها

100 %

الناس اللي اشترت اﻻعلام واشترت التزاكر ووقفوا بالساعات علشان تزكرة … علشان يشجعوا مصر .. ويقفوا جمب منتخب مصر

دوول مش مجانين .. وﻻ هبل … بس دووول عايزين يفرحوا

وياارب فرح كل المصريين بالماتش ده ياااااااارب

اخر حاجة عايز اقولها

انا كمان اشتريت العلم .. وانا كمان هتفرج على الماتش

هخلص شغلي .. وهطلع اتفرج على الماتش مع اصحابي

ان شاء الله

وهقووول

طخ طخ طططخ .. مــــصـــر

ويـاااارب نـكـسـب

بــس خــلاص .. خدوا بالكم من نفسكم

سلام

elahlawy

Trains

السلام عليكم ورحمة الله وبركاته

من زماااان وانا عايز اكتب الموضوع ده

تقريبا من رمضان اللي فات

بس كنت مستني الفرصة .. وكنت مستني افضى — اﻻقي وقت اكتب يعني

وبما ان الفرصة جات فلازم اكتب

وبما ان الرسول عليه الصلاة والسلام قالنا

” من رأى منكم منكرا فليغيره بديه , فإن لم يستطع فبلسانه , فإن لم يستطع فبقلبه … وهذا اضعف اﻻيمان “

صدق رسول الله صلى الله عليه وسلم

يبقى اذن

ﻻااااازم اكتب

واي حد هيقرأ البوست ده .. يبقى ﻻزم يتكلم … ليييييه … ﻻن هتبقى ساكت عن الحق … ومغيرتش المنكر بأي طريقة

وهيبقى حرام عليك … ﻻنك هتبقى عصيت كلام رسولك الكريم

سيدنا محمد عليه افضل الصلاة والسلام

ندخل في الموضوع علطووول

دلوقتي لما تبقى قاعد في بيتكم .. وفجأة لقيت اﻻعلان ده طالعلك في التليفزيون

…

دلوقتي … اي حد هيشوف اﻻعلان ده هيقول بس خلاص .. القطارات بقت ميه ميه

صح

؟

لكن ….. زي ما بيقول المثل : الميه تكدب الغطاس

دي الحقيقة … وﻻزم نشوف الغلط فين

مـاشــي

نبدأ

1

ده القطر من بره

ادي عربية … بذمتكم دي اللي موجودة في اﻻعلان

طب ادي كمان واحدة

دي بقى مفيهاش وﻻ شباك سليم

….

طب ايه رأيكم في الشباك ده ؟

تحفة مش كده ؟

….

طب وايه رأيكم في دي ؟

بصراحة تحفة فنية رائعة

عارفين ايه اللي في الصورة اللي فاتت دي ؟

دي اللي المفروض الواد كان “بيتشعلق” عليها في القطر .. ودي بقى حاجة جديدة “اوبشن جديد” في القطارات بتاعت اليومين دوول

عارفين ليه ؟

علشان الواد اياه لما يجي يركب القطر تاني .. ميلاقيش حاجة يتشعلق عليها … فيقعد ساكت بقى

ﻻن عمو اللي هيضربه على ايده ويقوله “ﻷ … ده غلط” مش بيبقى موجود كل يوم .. وغالبا عمو ده زهق من الواد ده

وبقى بيركب عربيات دلوقتي

….

طب وايه رأيكم في الفن المعماري في قطر الظلام اللي بروح بيه

ده الباب اللي من غير ازاز .. وﻻ “اوكره” .. وﻻ بيتقفل

وعلى فكرة للناس اللي بتركب القطر ده .. لو في يوم من اﻻيام “غلطت” وحبيت تقفل الباب ده والباب مفتحش بعدها

ابقى نادي على عمو بتاع الشاي .. هتلاقي معاه “اﻻوكره” بتاعت الباب ده

واسألوا مجرب

….

هل الصور دي زي اللي في اﻻعلان … يعني عايز افهم … هو القطر ده هو الوحيد اللي لسه متصلحش

طب مثلا يعني القطارات اللي انا بركبها هي الوحيدة اللي لسه متصلحتش

طب فرضا ان ده مش حقيقي والصور دي متفبركة .. طب اللي حصل امبارح في العياط ده كان ايه ؟؟

واللي ممكن تقرؤه مثلا على

جريدة الشرق اﻻوسط

او

بوابة الشروق

….

والخبر اللي مكيفني اووووي بتاع

جريدة الجمهورية

بيقولك ايه هناك … “جرار” السريع حطم عربات “قشاش” الغلابة

اخدتوا بالكم … اذن لسه في قطارات كده

لسه في قطارات فيها عربيات باللون اﻻصفر … وبيجرها حاجة زي جرار بتمشي بمزاجها … وبتقف بمزاجها

وتيجي تسأل على مواعيدها .. يقولك دي بتيجي بظروفها

ودي منظرها من جوه غير اﻻعلانات اطلاقا

محدش يستغرب ويقول وانت عرفت منين … ﻻني بضطر اركبها برضه علشان اوصل لبيتنا .. او اوصل جامعتي الصبح

ﻻن طريق السكة الحديد في المنطقة دي عايش على “القطارات الصفراء” دي واللي اسمها “قطارات درجة تالتة – عادية” .. وفي قطارات تانية تسمى ” درجة تانية مطورة” .. وفي كمان

نوع اسمه “قطارات درجة تانية مميزة “ .. وفي كمان نوع “درجة تانية مكيفة “ .. وفي كمان ” درجة اولى مكيفة “ وطبعا في فرق كبير بين كل دووول

واللي عايز يعرف مواعيد القطارات دي وبتطلع امتى -طبعا امتى دي المواعيد الرسمية ليها واللي نادرا ما بتطلع في معادها- يتفضل يبعتلي هنا

ويقولي عايز يعرف اهنو قطر ومعاده الساعة كام .. او عايز يروح المحطة القريبة منه ويشوف

انا ممكن اقوله على مواعيد قطارات اسكندرية – المنصورة كلها وبلا استثناء .. واللي عايز يروح المحطة يتأكد يتفضل يروح

وياريت لما يرجع يبقى يجي يبلغني باللي شافه

اذا كان كلامي ده صح .. وﻻ غلط

انا على الخط بتاع السكة الحديد ده “اسكندرية – المنصورة” بقالي 3 سنين واللي انا فيها دي السنة الرابعة

انا نفسي اعرف بقى

ليه القطر اﻻصفر ده مبيطلعش في اﻻعلانات

…….

حد شاف اللي حصل امبارح .. سواء صور او فيديو

….

دي يا جماعة … مأساة … مأساة بكل المقاييس

حراااااام عليكم .. يعني ايه قطرين يخبطوا في بعض … فين اﻻشارات الحمراء .. فين سواقين القطر ده

فين الراجل ناظر المحطة اللي عدا عليها القطر ده

فين وزير النقل اللي شغل الناس دوول في السكة الحديد

حياتنا بقت رخيصة اووووي كده … ﻻ هي مش بقت

هي فعلا رخصت من زماااااااااااان

من يوم ما اتحرق قطر الصعيد .. وغرق الناس في العبارة .. وقطر اسكندرية اللي طلع من المنصورة واتحرق على كوبري كفرالزيات ولحقوه بالعافية

وﻻ القطر اللي بركبه وانا مروح كل يوم خميس .. اللي عمري ما وصلت بيه البيت يوم بدري

علشان اقعد مع اهلي

وﻻ … وﻻ … وﻻ

عارفين اننا البلد اﻻولى على مستوى العالم اللي عندها اكبر نسبة وفيات من الحوادث بكافة انواعها

سواء عربيات او قطارات او طائرات او عبارات

هل ده شئ يدعو للفخر … وﻻ يدعوا اننا ﻻزم يكون لينا وقفة في الموضوع ده

اصلكم متعرفوش بره حياة الناس عاملة ازاي .. وحياتهم غالية ازاي

اللي فاكر الفيديو اللي كنت حطيته بتاع اليابان والموقف الياباني

…

ابقوا شوفوا بقى بقيت الحلقات دي وانتوا تعرفوا الناس دي عايشة ازاي .. وحياتهم غالية اد ايه

وللاسف احنا ساكتين

طيب

خلينا ساكتين لغاية اما يحصلنا زي ما حصل لقوم سيدنا موسى … اما فضلوا يسكتوا على الظلم

لحد اما لقوا نفسهم عبيد .. وﻻ حد فيهم بقى عارف يقول لصاحبه الصبح وهو بيقابله

صباح الخير

خلينا ساكتين … خلينا ساكتين

بس انا عايز اعرف هنفضل ساكتين لحد امتى

بالله عليكم يا جماعة .. لما تعرفوا هنفضل ساكتين لحد امتى .. حد يبقى يقولي

علشان اعمل حسابي وافرح

احسن انا نفسي اصحى الصبح الاقي خبر يفرح

مش خبر يموتني

كفاية بقى …. حرااااااااااااااااااااااااام

اسيبكم بقى مع شوية فيديوهات وابقوا قولولي رأيكم

….

….

…..

……

ودي شوية صور من موقع الحادثة

….

………

ﻻ تعليق

وحسبي الله ونعم الوكيل

Kefayaaa

….

العيش .. والعيشة واللي عايشنها

!!

هو الواحد بيعمل في نفسه كده ليه

Action and Reaction

….

I did the action (my part)

So … i waiting for your reaction (your part)

…

hope to see it quickly

اﻻهلاوي في الجامعة

….

New Post @ our Blog  513 Beta Room

elahlawy fe el-gam3a

So … It’s my first Vacation

Nooo :(

كفاااااااااااااااااااااااااااااااية

…

حد معترض

Life and work

السلام عليكم ورحمة الله وبركاته

ازيكم يا بشر

ايه اخباركم ؟؟ … عاملين ايه ؟؟

يارب تكونوا كويسين

؟؟

انا عندي شوية حاجات كده هقولها في ثوني وماشي علطووول

حاولوا تستحملوني بقى

هو ليه الواحد ميشتغلش شغلانة ان شاء الله يعني بعد التخرج

زي الناس اللي هما قاعدين على مكاتب طوول الشهر .. وغالبا بيروحوا المكتب بيكملوا نومهم هناك

واخر الشهر بيقبضوا فلوووس آآآآآد كده

انا ميهمنيش الفلوس .. لكن اني ابقى مرتاح ده طبعا اهم عندي .. وعند كل الناس

هو اينعم .. كل واحد فينا اللي بيقرر مصيره وبيقرر هو هيشتغل ايه ؟؟

وبيقرر انه هيشتغل شغل جامد .. ولا هيأنتخ ويروح الشغل ينام زي بقيت الناس والفلوس اللي بياخدها دي تبقى فلوووس النوم وقعدة المكتب

وفوووت علينا بكرة وارحمني علشان انا عايز انام

ولو قام راح الحمام -مثلا- ورجع مكتبه تاني .. يبقى ده اكتر مجهود عمله

بس انا بقى عايز غير كده .. عايز اتعب .. واشتغل .. واسافر .. واتنرفذ على كود .. واكسر في كيبورد

لكن

ليه انا اقعد قدام ” الة “ غبية مبتفهمش بين قوسين كمبيوتر

اللي هو حاسب الي .. حاسب الشلل

واقعد اكتب في كود 9 ساعات .. منهم ساعة راحة بهرب بيها من ام الجو بتاع الشركة اللي قاعد فيه

ليه انا اتجن واكره حياتي في اليوم 700 مرة .. ولولا ان الواحد كان بيجاهد علشان يفضل محافظ على اخلاقه وعلى الفاظه في الفترة اللي فاتت دي

ولولا بجد اني قاعد مع ناس محترمين

كان زمان طلع مني حاجات غريبة .. ووش عمر ما حد شافه مني قبل كده

….

انا فعلا بحاول اخرج الطاقة اللي جوايا .. بس بتبقى على شكل حروف صغيرة بكتبها على التويتر

والمشي الكتير اللي بمشيه بعد اما بخلص الشغل

ولولا كده … كان زماني فعلا انفجرت

ممكن تقولوا انت في الاول كدا لسه علشان لسه شاب .. فريش .. وجديد .. ومتحمس للشغل

بس بعد كدا هتهدى .. وانا على فكرة بحاول اقنع نفسي بكده

ان الامور في يوم من الايام هتبقى كويسة .. بس مش عارف ليه مفيش فايدة

بس انت ليه بتعمل في نفسك كده

طب .. انت كنت في الاول بتحارب علشان تتشتغل مع الفئة دي .. علشان متستقبلك واحلامك وشريك حياتك …. دا اذا كان في من اصله

طب دلوقتي

ولا مستقبل  .. ولا احلام  .. ولا شريك .. ولا اي حاجة

فاضلك ايه ؟؟

ولا حاجة

تعمل حاجة لنفسك .. وعيش حياتك .. لنفسك واهلك .. و بـــــــــــــــــــــس

مش عايز حاجة من الدنيا تاني

ماشي

اديني متأقلم وبحاول اتعايش بقالي اكتر من 45 يوم اهو

بس انا مستحمل ليه

ما تولع الدنيا .. وتولع كل حاجة .. وانا اولع معاها .. ايه اللي هيحصل ؟؟

ولا حاجة

بس نفذ لو كنت جدع

الاسبوع ده بقى انا اشتغلت … ومع الناس والفئة اللي كنت نفسي اشتغل معاهم .. في المنصورة حاليا .. وباللغة اللي كان نفسي اشتغل بيها

وميه ميه .. وكله تمام دلوقتي

بس فعلا .. ده كنت مخططله .. وكان نفسي يحصل .. بس مع حاجات تانية

وللاسف … مش كل حاجة بنعوزها بتحصل

انا بجد بتعدي عليا ساعات وغالبا بالايام

ببقى خلاص .. كل حاجة قـفـلت في وشي .. وعلى وشك الانتحار .. بس ارجع في كلامي واقول لا .. هتتعدل ان شاء الله

بتجيلي ساعات دماغي بتقفل قفلة طين

ولا بفهم .. ولا بكتب الكود ولا اي حاجة

وبفضل حاطط ايدي على خدي ومتنح للشاشة

طب اعمل ايييييييييييييه ؟؟؟

حاجة غريبة بتحصلي

كل ما بنزل شارع الجلاء .. او على المشاية .. ربنا بيوعدني بواحد من صاحبي يقعد يقلب عليا اللي فات

ويفكرني .. او انا بفتكر لوحدي

ايام

وتحصلي حالة غريبة .. بفضل ساكت مبلم ومن جوايا ببكي

….

لييييييييييييييييييييييييييييييه … بجد كده كتييييييييييييييير

بتحصلي شوية حاجات بجانب الافكار المجنونة اللي شوفتوها والحاجات اللي مش بقولها لحد

وكاتمها جوايا .. واقول ان شاء الله هتحصل .. لحد ما دماغي قربت تنفجر

من ضمن الحاجات دي بقى

انا عندي 2 ولاد تييييت .. بيتخانقوا جوايا علطووول

واللي عارفني كويس .. هيعرف ان الاتنين اللي جوا دماغي دووول

الاول : شخص طيب .. ايجابي .. يكره الروتين والحياة السلبية العادية .. بيحارب الاكتئاب وكل الظروف الوحشة .. ومتفائل دايما

والشخص التاني : شخص ابن تييييت .. مكتئب .. سلبي الى ابعد الحدود .. بيسيطر عليا ويتملكني

بيجي زي ما تقولوا كده في الوقت الصح

…

انا ماسكني الفترة دي التاني ده

والله يا جدعان مبهدلني اخر بهدلة .. وكل ما الاولاني يحاول يخلي الدنيا كويسة

ويقولي .. يبني فكك .. بكرة تروق وتحلى .. ان شاء الله

التاني

يرجع يسودها تاني .. ويقعدوا يضربوا في بعض كأنهم في حلبة مصارعة والحبال بتاعتها الاعصاب اللي جوه دماغي

بيضربوا بعض جامد اووي الفترة دي

طب اعمل ايه يا عم ؟؟

ياااااااااااارب عدلها … ياااااااااااارب افرجها من عندك

ياااااااااااارب

بجد انا تعبااااااااااااان جداااااااااااا … ونفسي اعيط

بقولك ايه ؟؟ قوم نام ؟؟

تصبح على خير

بكرة هتبقى كويس ان شاء الله

بكرة الخميس وانت مروح لاهلك .. بعد اسبوع من تعب الاعصاب والشد الذهني

ان شاء الله بكرة هتبقى كويس

سلاااااام

……

اسف بجد على الاسلوب اللي كتبت بيه

بس فعلا انا اعصابي تعبانة جدااا الفترة اللي فاتت دي وبالاخص الساعتين اللي فاتوا دووول

دعواتكم

فكرة مجنونة

السلام عليكم ورحمة الله وبركاته

شوية افكار مجنونة بتيجي على بال الواحد .. ودي فكيرة من ضمنهم

ونفسي اشوفها بتتحقق

قبل ما اموووت

طبعا عارفين محطة سيدي جابر – اسكندرية

وعارفين اللي بيتعمل فيها … واللي مش عارف بقى

فــ ” محطة القطر بتاعت سيدي جابر” بتتجدد

وعاملين محطة تانية مؤقتا عقبال اما تجديد القديمة يخلص

المحطة دي يا بشر

كل محافظ جديد بيجي اسكندرية بيجددها

اخر واحد كان “اللواء عبد السلام محجوب” تقريبا .. الراجل ده كان مخلي اسكندرية جااامدة جدااا

-واهالي اسكندرية كانوا بيموتوا فيه-

المهم ان “اللواء عادل لبيب” .. وهو محافظ اسكندرية الحالي

-واللي اهالي دمنهور معرفوش قيمته غير بعد اما مشي-

المهم ان المحافظ الحالي معجبوش النظام في محطة سيدي جابر

فجات فكرة انهم

يجددوها ويعملوا فوقها مول او حاجة زي كده وده اللي اعرفه وسمعنه من الناس اللي هناك

واللي ماسك الموضوع ده على حسب اللي شوفته

شركة المقاولون العرب

….

خلاص … ادي محطة سيدي جابر واللي بيحصل فيها

نسيبها شوية دلوقتي وهنرجعلها تاني

….

قدام المحطة بقى في موقف عربيات ملاكي كبـيـر جدااا بياخد تقريبا مش اكتر من 40 او 50 عربية بالكتير

وفي معظم اﻻحيان بيكون فاضي والعربيات راكنة جمبه .. بره سور الموقف يعني

اكيد علشان بفلوس

طبعا موقف زي ده وفي مكان زي ده .. اكيد جامد جداا خصوصا انه هيحافظ على عربيتك وكده

المهم اخر مرة كنت في اسكندرية الاتنين اللي فات ومعدي انا وصاحبي

اسلام

رايحين سموحة بصيت للموقف بتاع العربيات وافتكرت الفيديو ده

..

….

دي حلقة من برنامج خواطر خمسة للاستاذ احمد الشقيري

برنامج هادف جداا .. ياريت تسمعوه .. كان بيجي في رمضان .. والحلقات موجودة على اليوتيوب

بيقارن في خمس دقايق بس .. بين حياة الناس في اليابان .. او بمعنى اصح زي ما قال

على كوكب اليابان

وحياة المصريين او العرب على الكوكب بتاعنا

المهم

نطت في دماغي الفكرة دي

فاكرين محطة سيدي جابر واللي بيحصل فيها ؟؟ .. ايون .. كانت بتجدد وهيعملوا فوقها مول او اي حاجة

طب دلوقتي

الناس دوول عندهم مساحة كبييير جدااا اللي هيا مساحة موقف العربيات اللي مرمي جمب المحطة

ومفيش عربيات بتدخله علشان غالي وبعدين محنا سايبين العربيات جمب الموقف وميه ميه وخلاص

طب شوفتوا الفيديو … صح ؟؟

“حد فهم انا عايز اقول ايه”

احنا ممكن نشيل الموقف ده ونعمل موقف ياباني من اللي بيطلع وينزل ده علشان حبة العربيات اللي مرمين في الموقف دوول

اه

اشمعنى يعني فانوس رمضان .. و الساعة اللي انت ﻻبسها .. و النضارة بتاعتك

و الموبايل .. دا حتى الشراب يا جدع في منه صيني و ياباني

ليه بقى مناخودش الفكرة دي منهم وننفذها هنا

زي الساعة والموبايل والنضارة والشراب

ليه بناخد حاجة نستهلكها وتبوظ بعد يومين .. ومبناخودش حاجة لمصلحتنا تفيدنا وتفيد بلدنا

فاكرين المثال بتاعهم

بتاع السنارة ….. والسمكة

واحد يقولك : طب اليابان ومعندهاش مساحة تعمل فيها اي حاجة .. احنا مالنا محنا عندنا المساحات كبيرة والحمد لله

طب مهو المقاولون العرب اللي في اسكندرية .. الدنيا داقت بيهم فعملوا فوق محطة القطر مول

ماشي دا كويس علشان السياحة والسياح اللي بيسافر بالقطر والحاجات الحلوة دي

الله ينور

لكن ليه سايبين المساحات الفاضية دي كلها .. قدام المحطة ممكن نعمل

موقف ياباني

من ابو 5 متر في 7 متر .. وبياخد لحد 32 عربية

كده هيتبقى مساحة كبيرة جداا

ممكن نعمل جمبه برجين مستريحين او 3 ابراج كمان .. ولو العربيات كتيرة نعملهم جراج تحت اﻻرض زي اللي في

سان ستيفانوا

“مهو تكاليف بتكاليف بقى .. وكله هيبقى خير ليك يا عبد القوي”

مهو اللي خلاهم يعملوا موول فوق المحطة

يجيبوا الخلاط وشوية اﻻسمنت والرمل والزلط والحديد الكتير جداا اللي بيشتغلوا بيهم في المحطة

ويتزحزحوا شوية على جمب كده ويعملوا الفكرة دي

في المكان الفاضي ده

اول دورين في كل برج .. ممكن يتعمل فيهم مووول كويس .. او يتعمل فيهم فرع لــ “فتح الله “ …. مثلا

وبقيت البرج يتعمل فندق مثلا علشان اللي مسافر مثلا والقطر فاته وعايز يبات ليلة جمب المحطة

مثلا يعني

او بلاش الفندق ويخلوه شقق بس .. بس يسيبولي شقة احسن انا عايز شقة ومش ﻻقي شقق

واهو برضه حلينا مشكلة السكن في اسكندرية

منطقة سموحة مش محتاجة تجميل .. فعلا هيا جميلة من غير حاجة

كفاية عمو صاحب معصرة “مكة“ .. اللي موجودة هناك “جمب موقف العربيات اللي بقول عليه فوق ده” .. الراجل ده

على فكرة عنده عصير جامد جداا اسمه

عصير بوريو

ايون هو اللي بيتاكل ده … بس ده بيتشرب بقى

نصيحة جربوه

المهم الناس فهمت انا عايز اقول ايه

يارب .. في يوم من اﻻيام اشوف حاجة زي دي اتنفذت

ﻻني انا بعشق اسكندرية

اكيد ناس كتير خطرت ببالهم الفكرة دي بعد الفيديو .. بس مش عارفين ينفذوها او مش عارفين يقدموا اﻻقتراح لمين

زي حلاتي كده

بس برضه لو اتنفذت الفكرة دي في يوم من اﻻيام

ابقوا احجزولي شقة

ياﻻ … سلااااااام

لحظة سعادة

السلام عليكم ورحمة الله وبركاته

ازيكم يا بشر

كل سنة وانتوا طيبين .. وبصحة .. وسعادة .. ودايما فرحانيين كده

الدنيا بتلف وتمشي .. وﻻ بـ توقف علشان فرح حد وﻻ علشان حزن حد

لحظات كتير بتمر على الواحد منها الحلو ومنها الوحش

ومنها اللي بيقعد يفتكر فيها ذكرياته

الحلوة والوحشة

ممكن تكون اسعد لحظات حياتك انك لما بتبقى مع قريب او صاحب او حبيب او في مكان معين

ليه ذكريات جميل معاك او مكان انت بتحبه جداا

-زي كوبري ستانلي كده مثلا-

صح

اي حد فينا كده

لكن بالنسبة لي اسعد لحظة في حياتي .. لما بشوف ابتسامة جميلة على وش اي حد

مش شرط صاحب او قريب

اي حد بشوفه راسم ابتسامة جميلة بفرح جداا علشانه

وبفرح اكتر لو كانت اﻻبتسامة دي انا السبب فيها

مش عارف ليه بس هو احساس بيجيلي وخلاص .. فببقى فرحاان اكتر منه

امبارح بقى كان عندنا فرح بنت خالتي

يعني اختي التانية

كله كان فرحان ومبسوط .. اللي فرحان علشان المكان .. واللي فرحان علشان اللمة والعيلة .. واللي فرحان علشان القرايب والصحاب

واللي فرحان بالغناء والدي جي والكلام ده

لكن

انا كنت سعيد ﻻني شوفت في عين “بنت خالتي” و زوجها “محمد” ابتسامة حلوة

ابتسامة

رضا .. و فرحة .. و اطمئنان .. و سعادة .. و استقرار

بجد

كنت فرحااان جدااا  وسعيد لدرجة ﻻ توصف

يارب يعيشوا مع بعض في تبات ونبات ويخلفوا صبيان وبنات

يارب يعيشوا في هنا وحب وسعادة طوول العمر .. ويرزقهم بالذرية الصالحة

ياااارب

امبارح مرت عليا لحظة سعادة

هو اينعم الواحد راح عليه ماتش اﻻهلي .. بس مش مشكلة

بس كنت فرحان جداا طوول الوقت

لحظات حلوة بتعدى في ثواني .. واكتر لحظة حلوة فعلا في اﻻخر خالص

وهما ماشيين بقى وطالعين من القاعة خلاص

ومروحين

الناس كلها حواليهم وجمبيهم فرحانين ومبسوطين علشانهم

ياااااااه بجد احساس عالي عالي اووي يعني

يارب اجعل السعادة في كل قلوب وعيون كل الناس

زي السعادة اللي في قلوب كل عبادك اللي بيحبوك يارب

وكل اللي بيحبوا بعضهم فيك يااارب

قبل ما اخلص بقى

هقولكم موقف مضحك حصل امبارح .. واحنا بنزف العروسة بعد الفرح

سبناها وزفينا عروسة تانية

اه والله .. معرفش جات ازاي .. عربية العروسة راحت في حتة والناس كلها راحت في حتة تانية

كان في اكتر من 5 افراح امبارح

يارب وفق كل الناس وكل اللي عايزين يتجوزوا

وانا بصراحة مش عارف الناس متسربعة على موضوع الجواز اليومين دوول ليه

على كل حال ربنا يوفق الجميع

وعقبالكم جميعا

محدش يقولي عقبالك … ماشي

انا اتقالي امبارح كلمة عقبالك دي تكفيني 6 سنين

مفيش حد كان بيسلم عليا اﻻ لما يقولها

كفاية

ياﻻ .. سلااااام

Happy Eid

السلام عليكم ورحمة الله وبركاته

ازيكم يا بشر

اعلنت دار الافتاء المصرية

ان بكرة العيد

هيييييييييييييييييييييه

كل سنة وحضراتكم “جميعا” طيبين

وعيد سعيد على ” كل” الناس

وربنا يتقبل منا ومنكم صالح الاعمال في رمضان

يااااااااارب

وتكونوا دعيتوا كويس امبارح .. وتكون ليلة القدر فعلا كانت امبارح

…

موقف عجيب

موقف عجيب حصل قدام الجامع

الراجل المؤذن بيقول في المايكروفون بتاع الجامع بعد صلاة العشاء .. ان كل سنة وانتوا طيبين وبكرة العيد

ومفيش صلاة تراويح النهاردة

كلام جميل

تطلع من الجامع تلاقي 2 سواقين

الـ 2 نازلين وسايبين عربياتهم وافقة في الشارع

ونازلين يتخانقوا مع بعض

والله قدام الجامع

!!

انا شوفت المنظر ده وفضلت واقف مذبهل

قولت

ايون .. كده فعلا رمضان خلص .. الشياطين رجعت تاني

فواحد كان معدي فسمعني .. قعد يضحك

قالي : الشياطين رجعت اهو .. هنعمل ايه بس

يالا .. كل سنة وانت طيب

….

كل سنة وانتوا طيبين .. وعيد سعيد عليكم ان شاء الله

وربنا يجعل ايامكم كلها سعيدة

ويبعد عنكم الزعل

العيد فرحة .. يعني اللي مزعل حد – واعتقد ان محدش بيزعل حد في رمضان .. صح ولا ايه ؟؟ –  يبقى يصالحه

ماشي

…

….

ودي بقى وردة علشان خاطر العيد

سلااام

الكومنتات مفتوحة لبعد العيد ان شاء الله

يالا اللي في نفسه يقول حاجة يقولها

بس متنسوش الكحك