اﻻهلاوي في الجامعة

….

New Post @ our Blog  513 Beta Room

elahlawy fe el-gam3a

So … It’s my first Vacation

انا نجحت يا جدعاااان

السلام عليكم ورحمة الله وبركاته

ازيكم يا بشر

ايه اخبار اﻻجازة معاكم .. يارب الناس كلها تكون مستريحة وبيصيفوا كده

ومأنتخين ديايما علطووول

المهم ادخل في الموضوع اللي انا جاي اتكلم فيه

انا بحمد الله دلوقتي بتدرب في اسكندرية في شركة الحمد لله

مستواها كويس .. والناس اللي بتعامل معاهم بحمد الله ليهم سمعة كويسة

ودا يشرفني اني بشتغل معاهم

طبيعة الشغل حاليا .. يعني بتعلم حبة في الصيانة والهاردوير .. بس دي مش الوظيفة اﻻساسية

الوظيفة اﻻساسية .. هبقى اقوول عليها بعدين ان شاء الله

لما يجي وقتها

المهم …. يوم السبت اللي فات اللي هو  5- 7 – 2009

كان المفروض اني اسافر اسكندرية علشان نبدأ الشغل

لكن اتأجل السفر ليوم اﻻحد .. قولت قشطة احضر الهاكرز ديو يوم السبت

واﻻحد ابقى في اسكندرية

مسافر يوم اﻻحد وانا لسه بقول يا هادي في السفر ووصلت قدام محطة دمنهور

اﻻقي التليفون بيرن ترن ترن ترن

اﻻقي واحد حبيبي اوووي

اسمه بودي .. يعني عبدالله سعيد

بين قوسين … معلمي .. ودي بتاعته بس على فكرة

حقوق الطبع محفوظة لبودي ابن الحاج سعيد … وهو اول واحد يقولهالي

قشطة كده يا معلمي ؟؟

….

الو  … (انا في دمنهور والشنطة مطلعة عيني) .. ايوا يا عبدالله ازيك

بودي : اسلام انت فين ؟؟

انا في دمنهور .. مسافر اسكندرية .. خير ؟؟

بودي : يا خسارة (اكيد كان مفكر اني هحضر اليوم التاني للهاكرز) .. اصلي جبتلك النتيجة

!!

يا راجل ؟؟ طب ايه بقى ؟؟ هيا ظهرت على النت ؟؟

بودي : ﻻ انا روحت للدكتور علاء رياض وجبتهالك

طب قوول يا عبدالله … في مواد ؟؟

بودي : للاسف … (نهارك مش معدي هقتلك يا عبدالله لو في مواد) للاسف يا اسلام .. طلعت نضييييف

!!!

طبعا انا كنت ماسك الشنطة بإيدي وواقف متنح على السلم اللي بينزل للمحطة

ومستني الكلمة تطلع من عبدالله

اول ما قال للاسف .. الشنطة وقعت من ايدي .. قولت بس .. هتبقى زي كل سنة

لكن لما كمل الكلمة .. عارفين زي ما الواحد يكون مستني حاجة تحصل بفارغ الصبر

وتحصل .. او واحد مستني نتيجة الثانوية العامة ونفسه يدخل طب او كلية البترول دي

ويجيب النتيجة اللي هو عايزها بقى

….

طبعا عبدالله بيه .. كان بيلعب بأعصابي.. اصل انا اعصابي ناقصة

انا حاسس ان على ما اتخرج هيكون جالي شلل رعاش .. وشلل اطفال

طبعا انا مش مصدق .. فقولتله بجد يا عبدالله ؟؟

قالي اه يا عم .. وسمعت صوت الرجالة بيقولولي مبرووووك يا اهلاوووووي

Yeaaaaaaaaah

انا طلع مني صوت تقريبا الراجل رئيس المحطة وعساكر امن المحطة والناس اللي مستنيه القطر سمعوه

طبعا عبدالله بيه .. اللي كان بيلعب بأعصابي .. ربنا نجاه مني بصراحة يعني

لو كان قدامي كنت هقتله واسلم نفسي

المهم طبعا .. برضه عبدالله بيه معزووم .. عندي في البيت طبعا

ﻻني قولتهاله في التليفون .. ومينفعش ارجع في كلمتي

انت معزووم على اكلة محشي من بتاعت 513 يا عبدالله

فاكرها ياض ؟؟ والعزومة اون ﻻين اهو .. وفضايح بفضايح بقى

وبقوول عبدالله بس .. يعني مش اقول عبدالله .. اﻻقي اتوبيس الهرم جاي من المنصورة

وواقفين قدام البيت وبيقولوا عايزين محشي

المهم بعد اما قفلت مع عبدالله .. كان نفسي اركب القطر التاني واروح المنصورة

والله كنت هعملها .. بس افتكرت ان في شغل

نزلت بقى .. ورايح اقطع تذاكر .. وانا بقول في نفسي

اخيرااا … اخيرااا يا اسلام … جه اليوم الموعود

انا نجحححححححححححححححححححححت

نجححححححت يا جدعااااااااااان

ونضيييييييييييييييييف

اخيرااا … مش هيتكتبلي مستجد نخلف في الكرنيه اللي كنت مفضوح بيه ده

” الحــــمــــد لله “

اول ما وصلت الشركة روحت مشغلهم عبدالحليم

وحياة قلبي وافراحه .. والناجح -اللي هو انا طبعا- يرفع ايده .. هيييييييييييييييييييه

…

طبعا دي فرحة كنت مستنيها من زمااااااااان

والحمد لله يااارب انها جات قبل ما امووت .. احسن انا كنت حاسس انها مش هتيجي

والفرحة دي فرحتها برضه

هوندا

وانا فاكر يوميها .. انا كنت فرحان جدااا

ﻻني حاسس بمرارة مستجد تخلف على الكارنيه

وناس كتييير تانيين جربوا الفرحة دي

…

اخيراااا .. هشطبب عليها في الــ

Wish List

بتاعتي .. وهكتب جمبها انتهت سنة 2009

طبعا اول ما عرفوا في البيت .. وهات يا زغاريد .. متقولش الواد اخد اعفاء من الجيش

ولا بيتجوز لا سمح الله

بس انا عارف احساسهم .. اول مرة نضيف يا جدعاااان

برضه دي ليها طعم تاني خااالص

عموما .. اهي دي انا كنت مستنيها من زمان اني انجح نضيف دي

والحمد لله انها جات

وان شاء الله مواضيع كتير ترجع تتفتح تاني

وان شاء الله يبقى في اخبار حلوة …. ياااااااارب

ادعولي يا جدعان … الله يكرمكم

احسن الواحد اليومين دوول حاسس اني داخل على منعطف تاريخي

وهو اني نفسي انزل البحر ومش عارف

والله البحر قريب من الشقة .. بس والله مفيش وقت انزل الميه

محدش معاه مايوه زيادة

عايز ارجع بيتنا بقى … عايز اشوفهم عاملين ازاي بعد الخبر ده

اكيد اكيد .. هلاقيهم معلقين انوار على البيت

واخويا الصغير الاقيه مشغل

ونجحنا كله يرقص .. وفرحنا كله يرقص

هو اينعم النتيجة محجوبة لعدم سداد رسوم مواد التخلف اللي انا دفعتها

وامتحنت فيها

وتقريبا انا من اول الناس اللي دفعتها .. علشان اشتراك القطر وعلشان المدينة

بس عالم متخلفة .. الله يسهلهم بقى

انا اتصلت بيهم وادتهم كلمتين حلوين (كأني مكنتش عارفها بقى) وعرفت التقديرات وقفلت على كده

بس المهم اني طلعت غلي (اني مش شايف النتيجة) عليهم

المهم ان انا فرحاااااااااان .. وابويا كمان فرحان .. وزمان جوز خالني هو كمان فرحان

والعيلة كلها فرحان

واييييييييييه … انت بتقول ايييييييييييه ؟؟

مبقولش حاجة يا سيدي

انا كل اللي بقوله

الحمد لله الذي هدانا لهذا .. وما كنا لنهتدي لولا ان هدانا الله

بجد … شكرا لكل الناس اللي دعولي من قلبهم اني انجح السنة دي نضيف

وتتردلكم في اﻻفراح ان شاء الله .. او في اي مناسبة حلوة ليكم

بس اعزموني بس

وشكرا للرجالة اللي بيقفوا جمبي هنا في اسكندرية

والناس اللي حجزوا الدومين بتاعهم اسلام بيه

Hunikal

مبروووووووووك يا صاحبي

عقبال كده هبقى اما احط اللينك على الجديد بقى

وانا نجحححححححت يا جدعااااااااان

اه .. كنت هنسى

…

…

وعقبال كل اللي نتيجته لسه مظهرتش تظهر على خير

ويااارب ينجح هو كمان ونضيف ان شاء الله

الـــحمــد للــه

سلام

Agaza !!

السلام عليكم ورحمة الله وبركاته

ازيكم يا بشر

النهاردة في مواضيع كتير جدااا

نبدأ بــ : اولا

مبرووووك للنادي الاهلي لفوزه بالدوري .. اينعم الخبر قديم شويتين بس مكنش في وقت اكتب عن الفوز

لكن دا ميمنعش اني احتفل … و … اااي ااآآآآو .. قال ايه عايزين ياخدوه

واووووووووه اهلاووووووي

….

….

ثانيا

احب ابارك لكل الحاسوباتية .. بمناسبة انتهاء العام الدراسي وسناريو الامتحانات

وبداية وقت الطحن والشغل والحاجات الحلوة

وكل سنة وانتوا طيبين .. وعقبال اما نخلص بقى من الرواية دي

علشان بصراحة الفيلم بيرخم اوووي في اخره

اهو … فاضلنا زلطة ونطلع بره

يالا ربنا يعديها على خير ومن غير موااااد يااااارب

قولوا ااامين

….

ثالثا بقى

حاجة تخنق اوووي لما كل اما تمشي خطوتين تلاقي حد مقابلك يقولك

شوفت الماتش ؟؟

اه يا جدعان شوفته .. والله العظيم شوفته

احلف بإيه اني شوفته

انا شوفت الماتش يا جدعاااان .. وشوفت الخيبة التقيلة بتاعت منتخبنا الوطني العريق

وشوفت الحضري وهو بي تييييييييييييييييييييت .. والاعيبة الـ تيييييييييييت اللي حرقوا دمي

انا كده شكلي هقعد أ تيييييييييييييت للصبح

….

بس انا رغم كل الحزن والزعل اللي زعلته .. الا اني لما افتكر الاعلان بتاع شجع مصر

اموووت من الضحك

…

وكما قال الاخ العزيز ميتو افندي

” كأس العالم مش هيجيلنا ولا في تاكسي .. ولا توك توك .. ولا حتى على عربية كارو “

…

واد يا  بنا .. انت و ابو الاسرار

ايه هنقضيها فرجة بس ولا ايه ؟؟ … اهم اهم اهم المصريين اهم

….

رابعا بقى

فاكرين مواضيع التدخين .. والولاعة والكبريت

جزء 1 … و جزء 2

الموجودين تحت تاج .. صحتك ثروتك … على يمينك وانت بتفتح البلوج

شايفين

المهم … ان المواضيع دي بحمد الله موجودة على مدونة عراف

الاخ العزيز صاحب مدونة عراف .. جزاك الله خيرا على مساهمتك في نشر المواضيع

قال تعالى :- { وَتَعَاوَنُواْ عَلَى الْبرِّ وَالتَّقْوَى وَلاَ تَعَاوَنُواْ عَلَى الإِثْمِ وَالْعُدْوَانِِ} (2) سورة المائدة

صدق الله العظيم

….

خامسا … واخر حاجة بقى

عايز اقول كلمة من قلبي والله

بجد شباب المنصورة … رجالة رجالة رجالة … ربنا يحميكم ياااارب

بجد احنا طلعنا احسن من غيرنا كتيييييييير والحمد لله

طبعا عايزين تعرفوا انا بقول كده ليه ؟؟

انا كنت في القاهرة امبارح – الثلاثاء 9/6/2009 -  في مهمة رسمية عائلية

ونزلت جامعة عين شمس

اللي الناس كلها مفكرة انها حاجة مفيش بعد كده .. بجد بجد

احنا احسن منهم بكتييير .. سواء في التعليم او في النظافة او … اي حاجة

انا النهاردة فعلا عرفت قيمة المنصورة

الشباب اللي هناك عموما .. عارفين الشباب الامور .. ايوووون هو ده

تحس كده ان الشباب اللي هناك .. لذيذ .. بمعنى لذيذ يعني … ومش عايز اتكلم كتييير

بجد بعد اللي شوفته النهاردة

انا عندي امل بجد ان ربنا هيكرمنا كلنا ان شاء الله .. الشباب اللي بيتبهدل ده وبيطلع عينه

ربنا هيجازيه كل خير ان شاء الله

ربنا يوفقنا كلنا يارب .. ونبقى كده شباب زي الفل ونفرح اهالينا بينا يااااااارب

….

طولت عليكم .. صح .. يالا معلش .. اصل البلوج كان واحشني اوووي

خدوا بالكم من نفسكوا .. واقعدوا بالعافية

اجازة سعيدة

سلاااااااااااااام

….

اهلاوي … ولو حصل لمصر زي الماتش اللي فات كده .. هشجع نيجريا

بــــــــس

Befor Exams

السلام عليكم ورحمة الله وبركاته

اليكم اخر الانباء

اعلنت اذاعتنا المحلية ان السيد : اسلام محمد ضياء .. ( آني ) .. وشهرته الاهلاوي

قد انضم الى منظمة من غير شعر

اسلام باشا من غير شعر

ونظرا لانه خلاص مسافر الجيش .. احم .. قصدي المدينة

وداخل على امتحانات

ادعوله .. ربنا يعلي مراتبه .. مراتبه ومخداته

ربنا يهديه يااااااارب .. ويوفقه وينجح السنة دي نضيييف

يااارب

يارب تنجح يا تتح

الا صحيح .. انا شكلي اتعديت من بتوع سي اس ولا ايه  ؟؟

متابع بريزون بريك .. بنام كل يوم بعد الفجر واصحى الظهر مش شايف قدامي وافوق العصر

حلقت زلبطة .. هو مش زلبطة بالظبط يعني

بس انا اديتها رقم 1 .. بصراحة مهانش عليا اشيله كله

هذا وقد اعلن انه -ان شاء الله- في اجازة لحد بعد الامتحانات

وكل سنة وانتوا طيبين

الله يكرمكم .. ادعولي ربنا يهديني .. واطلع السنة دي نضيف ان شاء الله

يالا … زاكروا كويس

اقعدوا بالعافية

..

..

Exams

السلام عليكم ورحمة الله وبركاته

ازيكم يا بشر .. يارب تكونوا كلكم بخير يااارب

اعتذر عن عدم كتابة بوستات في الفترة اللي فاتت دي بسبب امتحانات الميدتيرم + الجهاز كان في المدينة

والان احدثكم من على جهازي من ( بيت العز ) اللي هو بيتنا

في الاونة الاخيرة .. حصلت احداث غريبة وعجيبة منها الحلو ومنها اللي مش

والحمد لله كله عدي على خير

بحمد الله خلصنا المشروع بتاع مادة الاعمال الالكترونية

Online Exam

وتم تسليمه للدكتور في موقف زي الفل قدام الكشك .. في الشارع وربنا

كان مروح وانا لحقته قبل ما يمشي .. فاخد مني الاسطوانة اللي عليها المشروع واخد الشيتات مننا

ومشي .. وكل سنة وانتوا طيبين .. يومها فعلا انا اتشليت كذا مرة .. من كذا حدث ورا بعضه

لذلك في نهاية اليوم السعيد ده  .. اتخذت قرار قدام رجالة سي اس اصحابي

واعلنتها وانا بكمال قواي العقلية .. واعلنتها صريحة واضحة وقدام كل الناس

وهو

اني -ان شاء الله- لن اتعامل نهائيا مع اي طالب ” اي اساوي “ في مشروع التخرج بإذن الله

وناوي انه يشلني

لان بجد اعصابي مش مستحملة .. والحمد لله ان المشروعين بتوع الترم ده عدو على خير

لاني افوت كل حاجة الا الشغل اللي انا تعبان فيه .. علشان محدش يقول عليه وحش .. او ملوش لازمة

او الراجل ده مبيعرفش يشتغل حاجة

قولنا نشتغل يبقى نشتغل ونتعب شوية .. مش اقول لواحد ينفذ حاجة … وميعملهاش

دي بقى بتعصبني جداا .. وبتشلني جدااا جداااا

هل انا غلطان في الكلام ده  ؟؟

وبعدين دا مش تعب .. هو احنا عملنا ايه ؟؟ ده مش حاجة بالنسبة للي حيحصل فينا في الشركات بره

المشكلة ان الناس مش متعودة انها تشتغل تحت ضغط

“ Working Under Stress “

طب هتشتغلوا بره ازاااااي ؟؟ … حد يفهمني ؟؟

وعلى ذلك فقد قررت ان اتنحى تماما ونهائيا عن اي منصب رسمي توليته في هذا القسم اي اس

وهو تيم ليدر .. اخدت ايه انا من التيم ليدر يعني غير حرقة الدم

وان اعود الى صفوف الجماهير اشتغل زيي زي اي واحد بيشتغل كود في الجروب

واوعد اللي انا هشتغل معاهم ان شاء الله

اني مش هفتح بوقي بكلمة الا اذا كانت في سياق شغلي والمطلوب مني و ان شاء الله هتجدوا مني احلى مجهود واجدع شغل

بإذن الله

واتمنى انهم يخلوا المجموعات بتاعت مشروع التخرج تكون من اقسام مختلفة

ياااااااااارب

….*….*….

نيجي بقى للموضوع اللي انا كنت عايز اتكلم عنه

كل سنة وانتوا طيبين بمناسبة قدوم امتحانات الفاينال .. وايام المزاكرة والدح وتقطيع الكتب والبلاي ستيشن

اعادها الله عليكم بكل خير .. ومزاكرة .. وشغل .. وناجحين دايما بإذن الله

واللي عايز تقدير .. يقولي .. هبقى ادعيله دعوة سبيشيال

هنا انا بدعي للي عايز يعدي نضيف .. بس

والحاج ديوك .. لازم يمسي عليكم بنفسه طبعا

ولاول مرة السنة دي

….

….

“امتحانات فاينال 2009 برعاية ديوك “

” مش هتبطل شرب قهوة “

….

حتى لو محوا كلمة صن .. وخلو الناس تبطل جافا .. وشالوا الاوبن سورس

هتفضل دايما في قلبي يا

DUKE

….

….

بس برضه عمر ” دم “ الاوبن سورس ما يروح كده بالساهل

شايفين … فيييين قعدة زمان وشرب القهوة .. واحنا بنسمع الست … ياااااااااه

فينك يا جوزلينج .. تشوف اللي حصل لصن من بعدك

….

يالا … ضحكتم شوية اهو

زاكروا كويس بقى .. ومتنسوش … تدعولي … اني انجح نضيف بس

وان الاهلي ياخد الدوري … يااارب

..

يــــالا …. ســلااااام

اقعدوا بالعافية

elahlawy

Mafeesh Korsat

السلام عليكم ورحمة الله وبركاته

طبعا الناس كلها عرفت ان مشروع التعاون الطلابي

اتلغى

ايون اتلغى .. ومعدش في كورسات لا جافا ولا اوراكل ولا سي شارب

عارفين ليه ؟؟

اقولكم انا ليه ؟؟ … علشان الطلبة اتمنعوا انهم يدخلوا من باب الكلية الرئيسي

وأجبروا انهم يدخلوا من الباب الخلفي -باب الخدامين- .. عارفين ليه كمان ؟؟

علشان الميدتيرم بقى اسبوع واحد .. وسميناه اسبوع النفخ ؟؟

عارفين ليه كمان ؟؟

علشان هذه الكورسات اللي احنا بنديها للطلبة “ببلاش” هتعطلهم عن السكاشن

والطلبة هيبوظوا اجهزة المعامل بتاعت الكلية اللي هيا اساسا مبتشتغلش

!!

ابتسموا جميعا .. انتم في حاسبات

محدش سأل نفسه هو ليه بيحصلنا كده ؟؟

علشان احنا لازم نبقى زي هندسة .. للاسف بنقلد الاخرين تقليد اعمى

• هندسة بيمتحنوا الميدتيرم كله في اسبوع واحد
• مفيش حد في هندسة بيعمل حاجة تعليمية تفيد الطلبة ببلاش واي حد بيعمل كده ياخد قاعة وياخدها بفلوس ويشرح اللي هو عايزة .. زي الكات كده مثلا
• باب دخول مخصص للناس الكبيرة اما الطلبة من الباب البعيد
• لو حد اتعرف عنه انه بيفهم .. نهاره مش معدي .. انت بتفهم ليه ؟؟
• احنا عايزينك متفهمش حاجة غير اللي بنديهالك في الكلية بس

عرفتوا بقى ليه الكورسات اتلغت ؟؟

يالا .. هيصوا يا طلبة حاسبات

…

واللي يحب يتعلم .. مكانه بره .. مش في الكلية

كليتك علشان تتعلم حاجات ….. مفيدة طبعااا

كليتك بتخاف عليك .. انك تضيع وقتك في كورسات ملهاش لازمة

بتخاف عليك انك تسيب المحاضرة ولا السكشن اللي انت اكيد بتبقى مركز فيها

وبتبقى قاعد مستمتع جدااا من الدكتور او المعيد

لانه بيديك مادة علمية مفيدة وعظيمة جدااا جدااا .. وهتنفعك في الشغل بعد كده

محدش سأل نفسه ليه اي خريج لما بيطلع مش بيلاقي شغل غير لما بيطلع عينه

ويقولوله خد كورسات برمجة و داتا بيز و لغات و … مش عارف ايه ؟؟

محدش سأل نفسه ليه هما عاملين معهد اي تي اي ؟؟

اكيد علشان الطلبة لما بيخلصوا كليه .. بيطلعوا بطيخ ولا فاهمين حاجة ولا عارفين اي حاجة فابيدخلوا المعهد ده علشان يتعلموا حاجة تنفعهم في الشغل بره

محدش يعرف واحد طالع من الكلية ودخل اي تي اي .. وقال احنا كنا في الكلية ولا بناخد حاجة

محدش يعرف واحد خلص معهد اي تي اي .. وقالك اعمل البدع وادخل المعهد ده ؟؟

انا عن نفسي والله العظيم اعرف ناس في المعهد دلوقتي

بيقولولي احنا ولا كنا نعرف اي حاجة بعد الكلية .. كنا طاحنين نفسنا مزاكرة في الكلية وجبنا تقدير .. لكن مفيش شغل فدخلنا المنحة .. والحمد لله دلوقتي احنا نعرف حاجات كتيير

و يقولولي … نصيحة ادخل معهد اي تي اي

طب ليه مناخدش المنحة دي اثناء الدراسة ؟؟

ليه مثلا ميعملوش حاسبات 5 سنين .. واخر سنة دي تبقى المنحة ؟؟

على الاقل الواحد يتعلم حاجة عدلة قبل ما يدخل الجيش

…

في النهاية .. مش هقول غير حاجة واحدة بس .. واظن انتوا عارفينها

؟؟

حسبي الله ونعم الوكيل … مفيش فايدة فيهم يا حاج سعد

…

قولنا هنعمل تعاون وندي كورسات … قالوا ببلاش ؟؟

قولنا ماااشي

نخليها لله .. والوطن .. و حاسبات … ومش عايزين منها حاجة

اهو كفاية ناخد ثواب في الناس

بس عايزين معامل .. قالوا لا

طب هنشرح فين ؟؟

طب وانتوا هتشرحوا ايه ؟؟ .. وليه ؟؟

محنا قولنا هنديهم برمجة وداتا بيز .. وببلاااش .. علشان الناس تتعلم حاجة

قالوا : الطلبة داخلة على امتحانات .. مش عايزين حاجة تشغلهم

طب .. حصتين في الاسبوع .. وكل حصة ساعتين .. والمعامل فاضية

ومحدش هيتعطل

لا بقى .. انا قولت كلمة ومش هرجع فيها

واللي في دماغي في دماغي

مفيش ندوات ولا كورسات .. ومفيش تعاون طلابي .. ومفيش حد هيتعلم

ويانا  .. يا انتم في البلد دي

…

اعمل ايه بس ياربي … اللهم لا اعتراض على حكمك يااارب

…

رسالة الى اتحاد الطلبة .. وطلبة نظام الجودة

بجد بجد .. شكرا جدااا على المجهود اللي عملتوه علشان نفيد الطلبة

احتسبوا الاجر والثواب عند ربنا .. وربنا يسامح اللي كان السبب

…

سلام عليكم .. وخدوا بالكم من نفسيكم كويس

زاكروا كويس علشان الميدتيرم

وركزوا على الدراسة علشان تعدوا الـ 4 سنين بتقدير كويس

وبعديها تطلعوا تاخدوا منحة اي تي اي … والله اعلم اذا كنتم هتتقبلوا ولا لا ؟؟

صحيح … نسيت اقولكم ان بيبقى في اختبار قبول للمنحة دي ؟؟

…

ربنا يوفقكم لكل خير .. يااارب

سلاااااااااااام

….

واحد طهقان

My_Session_Feedback

السلام عليكم ورحمة الله وبركاته

ازيكم يا بشر

ملحوظة : البوست ده طويل .. اللي عايز ينجز نفسه يدخل اولا  و ثانيا .. ويدخل على رابعا علطووول

اولا

بحمد الله اديت امبارح السيشن بتاعتي

Having a cup of java – Introduction to J2SE

والحمد لله ربنا وفقني

وزمايلي كمان .. اسلام وتامر .. الحمد لله ربنا وفقنا

السيشنز دي كان الهدف الاساسي منها .. اننا نفيد طلبة اولى وتانية حاسبات بالاخص

ونعرفهم يعني ايه برمجة ؟؟  ويعني ايه ويب ؟؟  ويعني ايه داتا بيز ؟؟

بس .. للاسف مفيش ناس من 1 و2 حضروا غير عدد قليل جداا جداا

بس ياريت فعلا اللي حضروا يكونوا استفادوا

احنا هنشرح لو في المدرج طالب واحد بس .. يكون عايز يتعلم حاجة

!!

ثانيا

بشكر كل الناس اللي حضروا في السيشن .. والله بجد انا مبسووط جدااا وفرحان اوووي

وشكرا للناس اللي كانوا ماسكين الكاميرات وبيصورونا سواء فيديو او صور

شكرا بجد لكل الناس اللي اهتمت وحضرت .. بجد حضوركم ده على راسي من فوق والله

اردهالكم في الافراح ان شاء الله

طبعا .. بعد اما خرجت قولت اشوف ردود افعال الناس .. الحمد لله كنت كويس

ولما شوفت نفسي في الفيديو بتاعي .. فعلا كنت كويس .. الحمد لله فعلا

…

ثالثا

سامحوني .. كان في حاجات كتييير كنت عايز اتكلم فيها في الاول .. بس للاسف نسيتها .. وهقولكم ليه  ؟؟

…

انا بجهز الكلام والسلايدز .. من يوم التلات تقريبا

لكم ان تتخيلوا .. كمية المعاناة اللي كنت بعانيها وانا بكتب السلايدز على الاوفيس 2007

علشان تطلع حلوة

واقعد اختار الخلفيات .. ونوع الخط  .. واحط صور .. واشيل واحذف واعدل

لحد اما تقريبا كنت هتجن

لحد يوم الجمعة الساعة 3.30  بليل .. الحمد لله .. خلصت .. اخيراااااااااااااا

…

طبعا الرجالة نزلوا وسابوني في الاوضة لوحدي

طيب افتح السلايدز بقى اراجعها .. لقيت النور قاطع .. ااااااااااااااااه

طب استنى شوية .. استنى .. لحد اما وصلت الساعة 12 – بعدين 12.15

لا

بس خلاص .. لا انا عايز اراجع .. ادور على اي لاب في الدور عايز 5 دقايق بس ابص على السلايدز

كل اما اروح لواحد الاقي لابه مخلص شحن

طب كده قشطة اوي … مراجعتش .. طيب … روحت لابس وواخد لاب واحد زميلي

في الاوضة اللي جنبي .. طبعا مكنش مشحون والكهرباء قاطعة

اخدته ونزلت الكلية .. وشغلته والحمد لله راجعت على السلايدز

…

قبل ما تيجي معاد السيشن بتاعتي روحت فاتح الاب وسطبت التكست باد و الـ

JDK

ومجربتهومش .. بس الحمد لله ربنا ستر والاب مفضحنيش ادام الناس

كتبت الحمد لله الكود واشتغل … والاهلاوي بيمسي عليكوا …. مساء الفل

بصراحة انا كنت داخل عامل حسابي على كل حاجة علشان لو حصل ان الكود مشتغلش

كنت عامل صور ..  للكود ومرحلة الــ

Run

…..*…..*…..

رابعا بقى

ودي اهم حاجة واللي عامل علشانها الموضوع ده

اسمحولي اخد رأيكم في شوية حاجات كده

هتبقى مهمة ليا بعد كده اكيد

وارآئكم طبعا على راسي من فوق طبعا .. ومتخافوش سعة الصدر اللي عندي تكفي الناس كلها وزيادة يعني

بليز … عايز ارأئكم وبكل صراحة

…

1. رأيكم في السلايدز ؟؟
2. طريقة الشرح وتوصيل المعلومة .. بالنسبة ليا كأول سيشن رسمية اعملها ؟؟
3. الأداء مني .. في طريقة الشرح ؟؟
4. الحاجات اللي خرجت بيها عن السلايدز كانت كويسة ولا لا ؟؟
5. وهل دي شتت تفكير الناس ولا لا … مع العلم اني والله عملت كده علشان الناس متملش او تزهق وتمشي

….

ارجوكم .. ارآئكم بكل صراحة ؟؟

ويا سلام بقى لو تحطوها درجات .. كل حاجة تحطلها كام من 10

اللي هيحط اقل من 9.5  .. هو حر

واللي عنده اي اقتراح يتفضل يحطه .. وكلي آذان صاغية

…

اخر حاجة بقى … طبعا … اللي عايز ينزل

السلايدز

هنا

…

الكتب

SL – 110

SL – 275

وفي كمان للي عايز .. اللي عايز كمان يقول ؟؟

…

Some Pic 2 Love Java

here

…

Pic of … how to run java on ur Pc

here

…

Text Editor

textpad

…

Download Java SE Development Kit 6u11 with NetBeans IDE 6.5 Bundle

here

…

اتمنى اني اكون افدت الناس بحاجة .. واكون قدرت اوصل اي معلومة

وربنا يكرمكم ان شاء الله .. ويوفقكم كلكم

…

….

سلااااام

Fci_Sessions

السلام عليكم ورحمة الله وبركاته

ازيكم يا بشر

معلش البوستات بقت قليلة الفترة اللي فاتت دي

اصلي في المدينة .. وجهازي في المدينة

وزي ما بيقولوا … المدينة  ايه ؟؟ … بيتك الثاني

احــم  احـــم

ندخل في الموضوع بقى علطوول

المايك معاك يا عم .. اتفضل اتكلـم

…

اعزائي المشاهدين .. والمستمعين .. مش عارف ايه اللي جاب المستعمين هنا

بس مـا علينا

يوم السبت الجاي ان شاء الله

14 – 3 – 2009

هيكون في ندوات في ارض الوطن .. بكلية الحاسبات والمعلومات جامعة المنصورة

يقدمها طلاب الكلية

الندوات ان شاء الله هتكون كالأتي

1. Java Programming … By Eslam Mohamed Diaa El-Din
2. Web 2.0 … By Eslam Mahmoud Abd El-Moneim
3. Oracle … By Tamer Kamal Ahmed

….

بمدرج 1 كلية الحاسبات والمعلومات من الساعة 2 الى الساعة 5

…

1. Java from 2  : 3 m
2. Web 2.0 from  3 :  4 m
3. Oracle from 4 : 5 m

…

انتهى البيان

…

ان شاء الله محضرلكم سيشن جااامدة ان شاء الله

وهتكون مفيدة وممتعة بإذن الله

…

عايز الناس كلها تحضر .. واللي مش هيجي هو حر

واللي هيجي عيزة يقعد ينتشر في المدرج كله

ميسيبش بنش الا لما يقعد عليه … فاهمين ؟؟

على فكرة انا هاخد الغياب في المحاضرة .. وهيبقى في درجات بونس

وفي مفاجأة عاملها .. طبعا مش هقولها

المفاجأة بقى : ممكن اعملكم جوايز كويسة في السيشن .. محدش يقولي اني قولت على المفاجأة

هستناكم .. يوم السبت من 2 : 5 ان شاء الله

سلااااام

Ay_Kalam

السلام عليكم ورحمة الله وبركاته

ازيكم يا بشر

طبعا البوستات قليلة اليومين دوول … امتحانات بقى

ربنا معانا كلنا ان شاء الله

….*….*….

النهاردة بقى انا داخل ارمي كلمتين وماشي علطووول

بس بجد بجد كلمتين من القلب للقلب

النهاردة داخل امتحان شفوي لمادتين ومع بعض

عشر دقايق وخرجت … الحمد لله الدكتور امتحنا وخرجنا بلا اصابات ولا ضحايا

طبعا الناس اللي في الكلية هتفهمني

…..

يا جماعة انا اي اس .. انا فودافون

واللي مش عارف يعني ايه اي اس

Information System

وده احد الاقسام الموجودة عندنا في كلية حاسبات

…..

انا مش داخل اتكلم عني انا داخل اتكلم عن حبايبي الناس بتوع سي اس

Computer Science

الناس دوول عندهم مادة بمادتين ودكتورين

والله مش بهزر

الدكتور الاول دكتور ميه ميه .. بس للاسف حصلت ظروف قهرية خلت الدكتور

ميكملش المادة معاهم .. فجابولهم دكتور تاني دخل وشرح مادة تانية وقالهم دي عليكم

سألوه : طب والاولانية بتاعت الدكتور الاولاني .. قالهم : برضه عليكم

شرح وميه ميه ودخل في المنهج .. لقى الدكتور الاول الاساسي رجع الحمد لله

فقال : خلاص بقى .. رجع الدكتور وكمل المنهج بتاعهم .. مش كده وبس

لا … ولازم يخلص الكتاب كمان

الناس دوول بجد صعبانين عليا جداااا .. مش كفاية اللي هما فيه .. لا يجي عليهم دوول كمان

يعني تلاقي الطلبة في دفعة حاسبات سنة ثالثة منقسمين 3 اقسام

تلاقي ماشي في الكلية 3 انواع

النوع الاول : ماشي وحاطط “الهاند فري” في ودنه وطوول النهار ماشي في الجامعة

رايح جاي .. ومستني محاضرته تبدأ علشان يدخل يريح نفسه من المشي شوية

يا اما متشوفش وشه الا ساعة المحاضرة او السكشن بس

وتلاقيه يكلمك في كل حاجة

كورة ماشي .. طبيخ ماشي .. داتا بيز ماشي .. برمجة مش كله بيفهم برمجة بس ماشي

الازمة الاقتصادية في امريكا .. واحوال البورصة .. دا على حسب اهتماماته يعني

دا بتاع اي اس …. من الاخر فاااااااااضي

….

النوع التاني : تلاقيه ماشي تايه .. مش شايف اللي حوليه .. زهيامر علطوووول

تلاقيه داخل من بوابة الجامعة “نايم” ويصحى وهو في المدرج او في السكشن

تلاقيه كل اسبوع يعمل حاجة غريبة .. يحلق زلبطة .. يخلص بريزون بريك ويتفرج على لوست

يعمل سكور جديد في الفيفا او البرو (سوكر) .. حاجات من دي يعني

تلاقيه في الجامعة علطووول .. تسأله المواد بتاعتك ايه ؟؟ يرد عليك يقولك المواد بتاعت سنة تانية

دا اذا رد عليك اصلا … تلاقيه ماشي مع شلة كده وغالبا بيكونوا مهيسين طوول الوقت

دا نتيجة اللسعان …. اه وتلاقيه شايل كتب علطوووول وممكن تلاقي معاه مراجع عمرك ما شوفتها

ولا عمرك تعرف تشيلها

حياته كلها الجوريزمات

دا بقى بتاع سي اس …… بجد ربنا معاهم

….

النوع التالت بقى : وده نوع فريد جدا واول مرة يظهر في الساحة الحاسوباتية

وده تلاقيه .. سبحان الله شوية تلاقيه قالب على اي اس “فاضي يعني” .. وشوية تلاقيه قلب سي اس

تلاقي دماغه ساعات بتسلع .. وساعات تلاقي دماغه معلية وعامل دماغ حلوة اووووي

برضه ممكن احيانا كتير ممكن تلاقيه فااااضي

بس يعيني عندهم مادتين لدكتورين من بره الكلية .. المادتين دوول مطلعين عينهم

ببساطة لانهم مش عارفين نظام الدكتورين دووول

برضه تلاقيه ضارب السماعات في ودنه .. وعامل دماغ .. او فاتح الاب ” الوكمان ” بتاعه وقاعد بيسمع

برضه برمجة وشبكات وداتا بيز والحياة حلوة عنده

دا بقى بتاع اي تي .. القسم الجديد اللي عندنا

Information Technology

…..

طبعا دوول الناس اللي عندنا انا بقول كده طبعا بهزار

مجرد مزحة يعني .. وياريت محدش ياخدها بحساسية … الموضوع مجرد هزار

طبعا انا حاسس بمعاناة الجماعة بتوع سي اس

ويارب يوفقكم كلكم يااااااااارب

وربنا يوفقنا كلنا وننجح السنة ويارب اللي نفسه في حاجة تحقق ان شاء الله

….

يالا اشوفكم بخير في البوستاية الجاية ان شاء الله

سلااااااااااااام

Ana we el-Natiga

السلام عليكم ورحمة الله

كيف حالكم إيفيري ون … والله وحشتوني موووت مووووت يعني

طبعا اخر واحد يكتب عن النتيجة بتاعته هو انا … كالعادة يعني

الحمد لله يا جماعة … عديت

بس زي ما تقولوا بقى … حاجة كده زي النكد اللي بيطلع يوم الفرح بين العريس والعروسة

وتلاقيهم ماسكين في خناق بعض

وحالفين على الطلاق … زي مسرحية سك على بناتك كده … فاكرينها … هههههههههه

… احـــم احــــم …

انا نسيت نفسي ولا ايه ؟؟؟

المهم … يحكى ان كان عندنا مادة اسمها الجريمة … الجريمة لا تفيد طبعا … لكن هيا اسمها كده

” جوانب اخلاقية “

حاجة كده زي حقوق انسان … ملهاش لازمة ولا ليها اي كيان … هيا حاجة كده

محطوطة علشان الكلية تخنق بيها على الطلبة بتوعها … وتزود مواد وخلاص

قال يعني احنا ناقصين مواد

المهم … المادة دي … الظاهر والله اعلم … انها حرام ينضاف ليها درجات رفع … مع انها مادة زي بقيت المواد

لكن ان شاء الله المحاولات جارية لرفعها

ادعولها تترفع  … اصلها تقيلة اوووووي

…..*…..*…..*…..*…..*…..*…..

المهم … الحمد لله على كل شئ

وزي ما قولت دي زي النكد اللي بيطلع ليلة الفرح او يوم عيد الجواز … حاجة ملهاش لازمة بتطلع زي الــ …….  وخلاص

المهم … الف مليون مبروك لكل الدفعة … الناس الحلوين … شباب حاسبات

ربنا معانا ياااااااااااارب … ننجح كل سنة ونطلع نضييييييييييف

ياااااااااااااااااااااارب

يالا … سمعونا بقى زغروطة حلوة لاحلى ناس … شباب حاسبات

الشباب الأمووووور

……………………………..

ملحوظة : الرجالة مسموحلهم يزغردوا ….. لو بيعرفوا  …. هههههههههههههههههههه

……………………..

……….

..

يالا كفاية كده بقى …. سلاااااااااااااام