يلا بينا ندعي

السلام عليكم ورحمة الله وبركاته

ازيكم يا بشر

عاملين ايه في رمضان ؟؟

خلاص العشرة الاواخر

….

…

وبمناسبة كده

افتكرت بوست كان على مدونة

هوندا

ان كل واحد فينا يعمل قايمة دعوات يدعي بيا في رمضان

فـنظرا لان الصفحات اللي بتتعمل هنا على البلوج مش  بتتشاف على الريدر

او ممكن حد بيدخل بس مبيكونش واخد باله منها

فبحمد لله عملت حاجة زي قائمة دعوات

في صفحة لوحدها اسمها

يلا بينا ندعي

موجودة على ايدك اليمين وانت بتقرأ البوست دا

هتلاقيها مع صفحة

Wish List

و

About me …

عايز اشوف ادعية حلوة هناك

سلاااااامـ

Come Back Again

السلام عليكم ورحمة الله وبركاته

احـــم احـــم

يــــارب يـا ســـاتر .. كح  كح

سوري يا جماعة .. اصلي مدخلتش بقالي كتير فلازم اسلم على اهل الدار

يمكن الاقي حد عايش حياته هنا ولا حاجة

يا ساتر يارب .. ايه ده .. كل ده تراب

الغيبة المرة دي طولت اووي مش كده .. معلش والله حقكم عليا

بس مكنش في نت والله

حتى لما كنت بروح المكتبة -مكتبة اسكندرية- مكنتش بعرف اكتب حاجة

لدرجة زي ما انتوا شايفين كده .. التراب مالي الدنيا ومحدش كان بيدخل ينفض ولا ينضف اي حاجة خالص

بجد يا جدعان .. لو لقيتوني انقطعت كده مرة واحدة بدون سابق انذار

حد يتطوع ويبلغ المطافي

لا بجد .. حد يبقى يدخل يشقر على المدونة .. يفتح الشبابيك كده .. ويهويها .. بس مينساش وهو ماشي

يقفل الشبابيك تاني .. احسن ارجع ملاقيش الكنز اللي انا مخبيه هنا

كنز ايه يا عم انت حلتك حاجة

احـــم احــــم .. ايه يا عم .. الناس قاعدة يا سيدي بلاش فضايح

المهم … حصلت في الفترة الاخيرة حاجات جااامدة جدااا جدااا

وحاجات غريبة اووووي

بداية : من اننا اخدنا اجازة من الشركة لحد يوم  1 – 8 من ساعة اما حصل ميتج في الشركة مع الناس اللي هيشتغلوا اللي هما احنا

المهم اننا اخدنا اجازة تقريبا من يوم الخميس 9 – 7

علشان هنزاكر حاجات ونرجع تاني نتسأل فيها .. وهيبقى في شوية حاجات كده .. هقول عليها بعدين متخافوش

حلو الكلام

المهم … جيت يوم  13 – 7 – 2009 .. الناس كلها تفتكر التاريخ ده

وانا عمري ما هنساه طبعا

ايه يا عم  ؟؟ … مش تقول ايه اللي حصل ؟؟

اه صحيح … سوري نسيت … في اليوم ده انا شديت الرحال وروحت رايح  لــ “محبوبتي” اسكندرية طبعا

محدش يفهم غلط

المهم قابلت صاحبي .. اسلام .. وكان معانا الحاج ” ابويا ” ونازلين ناويين اننا نشتري

لاب توب

المهم لقينا شوية لابات حلوين .. شوية ايه دا احنا تقريبا لفينا البلد كلها على لابات .. لغاية اما استقرينا على ده

…

…

ايون هو ده

Lenovo … N 500

حاجة لسه نوكيا منزلتهاش .. لسه بدري عقبال اما تنزل من نوكيا

انا كنت حاطط عيني عليه من فترة قبلها .. على اساس اني ممكن الاقي حاجة احسن

بس كده حلو .. الحمد لله

المهم طبعا مبروك عليا .. بس انا طلع عيني في موضوع اللابات ده لحد اما كنت هتجن بسببهم

وشوفت لابات بالهبل .. واسعار هبل برضه .. لحد اما الحمد لله وقعت في ده

مبروك عليا

…

طبعا .. انا بعامله بإحترام شديد جدااا .. مهو بقى ابني الصغير

اللي بيسألني دلوقتي .. امال هو عامل ايه معاك

اقوله والله مغلبني .. ومحيرني معاه

بس الحمد لله … لحد دلوقتي بعامله بإحترام

يارب هو كمان يعاملني بإحترام دايما

مهو معدش فاضل بينك وبين لابك … إلا الاحترام … الاحتراااااااااام

احترم لابك وعامله كويس .. يحترمك ويقدرك

بصو بقى .. هو اسلام قالي هتفضل كده شهرين .. وبعدين هتعامله بالجزمة

لا … بقى

انا عمري ما  هعامله وحش .. واللي هيعامله وحش من اصحابي او اي حد هو حر

هقلبله على الوش التاني

….*….*….

المهم بقى … تاني حاجة حصلت … كانت في الاسبوع اللي بعده علطووول

اللي المفروض انا بزاكر فيه بقى

حضرت الشنطة .. اللي بتتعب معايا دي .. وروحت طالع على مطروح

يوم الاحد 19 – 7 – 2009

مع اصحابي

بودي .. واحمد مسعود .. واسلام .. وانا طبعا

بين قوسين تيم  513 بس في مطروح

كان فرح اخت  محمد السيد صاحبنا .. مبرووووك ياض

و ” عقبالي “ … قولوا يااااااارب

المهم … الواحد راح  وخطف 3 ايام من العمر .. واجمل 3 ايام والله

واحلى حاجة الرجالة صحابنا اللي كانوا هناك .. عملوا احلى واجب معانا والله

بجد انا روحت مناطق بجد اجمل مناطق شوفتها في حياتي .. بعيد عن اللي كان بيحصلي ساعتها

والبرد اللي كان مبهدلني .. مكنتش انا بس هو كلنا تقريبا كنا واخدين برد

بس الحمد لله … انا وعبدالله اللي كنا جايبين البرد معانا واحنا رايحين

الحمد لله مبنجبش حاجة من بره

بس بجد هناك على البحر تنسى نفسك  .. وتنسى البرد .. وتنسى كل حاجة

انا مكنتش متخيل انا في مناطق بالجمال ده .. سبحان الله فعلا

انا كنت متوقع ان الحاجات دي في التليفزيون بس .. مكنتش متخيل انها في الواقع كده بصراحة

الصور بتاعتي بقى اللي مصورها بموبايلي انا هتلاقوها ان شاء الله على فليكر او الفيس بوك

هتلاقوا اكترها مناظر طبيعية حلوة اوووي

….

المهم رجعنا .. وانا بصراحة من جوايا مكنتش عايز ارجع

بس قولت كفاية كده .. احسن ممكن الواحد يفلس هناك ولا حاجة

اضطر ارجع في القطر .. يا اما هرجع ماشي .. واللي بيركب القطر عندهم ده

يا اما بينزل منه ميت .. يا اما عنده شلل اطفال .. وفي كلا الحالتين مينفعش يتعملك عمرة تاني

….

رجعت تاني بقى للبيت والمزاكرة … افتكرت بقى اني المفروض ازاكر علشان هيبقى في حاجة زي امتحان كده

يوم 1 – 8 .. فاكرين محدش ينسى اليوم ده

اووووووف .. انا ايه اللي رجعني بس .. منا كنت هناك مستريح والعملية قشطة

كويس .. ازاكر بقى .. لا خليها بكرة

يجي بكرة .. اخ .. خليها بعدو .. وبكرة يجر بعده لغاية اما جه يوم  1 – 8 ده

…

اكيد دلوقتي ناس هتقول انت يوم  1 -8 – 2009 ده يوم تاريخي في حياتك

وانا بقول بجد

اليوم ده فعلا .. ” اصعب يوم ” عدى عليا في حياتي

هبقى احكي عليه بعدين .. لان تقريبا الناس اللي عملوا ورد بريس بيشتكوا مني

اني بكتب كتييير

بس بيسيبوني .. علشان بنظم في كتابة الكلام

بحاول اخلي اللي بيقرا ميزهقش .. ولا انتوا ايه رأيكم في الموضوع ده

؟؟

بجد ربنا يكون في عونكم ياللي بتقروا .. دا اذا كان في حد بيقرا اصلا

بكرة اجيب عيال .. واخليهم يقعدوا يقروا البوستات كلها كلمة كلمة .. حرف حرف

هخليهم يلبسوا نضارات وهما في كي جي وان

طب وانت هتجيب عيال من غير حب ولا جواز ؟؟

اه يا خفيف .. هجيبهم من غير حب ولا جواز .. احنا فاضيين لسه هنحب ونجيب ” دباديب ” .. ولسه ” هنتجوز “ .. ونقعد 9 شهور وبعدين يجيلك عيل

يقرفك ويطلع عين اهلك وتصرف عليه دم قلبك

طب وليه وجع القلب .. انا اجيب عيال من اللي مبيكبروش دووول

واقعد ادلعهم والعب بيهم  … ولو فكروا يكبروا هقتلهم

هاهاهاهاها

طب وربنا وحش مفترس

كفاية كده بقى احسن انا هيست اوووووي

وهيبتدي يطلع مني كلام .. ملوش اي علاقة بالواقع الذي نحن بصدده الان والذي هو …؟

بس بس بس .. خلص .. قوم نام يا حبيبي الساعة 8 الصبح قوووم

طيب خلاص .. صباح الخير عليكم بقى

دعواتكم الله يكرمكم .. احسن انا اليومين دوول مش بيجيلي نووم خالص

ولما بنام بشوف حاجات غريبة والله يا جدع

يمكن من الحر .. اه هو الحر .. الحر بيعمل اكتر من كده والله

يالا .. ربنا يسترها عليا

….

اه صحيح .. ” كل سنة وانتوا طيبين ” بمناسبة النصف من شعبان

الحقوا جهزوا نفسكم بقى علشان رمضان خلاص قرب

يالا .. اشوفكم بخير ان شاء الله

في البوستاية الجاية

” سلاااام “

Cairo_ICT_2009_Trip

السلام عليكم ورحمة الله وبركاته

ازيكن يا بشر .. اصلي عندي برد من امبارح

ندخل في الموضوع

…

التلات اللي فات اللي هو 10-2-2009

روحنا معرض كايرو ICT

بجد انا مقدرش اقوول غير انها كانت رحلة جااامد جدااا جدااا

بعيدا عن الاحداث اللي حصلت في الرحلة

بس فعلا رحلة جاامد جداا

الواحد قابل ناس جامدين جداا جداا .. وناس محترمين اخر حاجة يعني

..

اول ما دخلت لقيت صوت طالع .. بيقول في سيشن جافا نت بينز

عرفت مكانها وبعدين قررت اني احضرها

طلعت الدور التاني ادور على مكانها لحد اما لقيته الحمد لله

..

حضرت طبعا واللي كان بيشرح راجل من الهند .. مش بيتكلم غير انجليزي بس

مبيعرفش عربي خااالص

طبعا علشان الواحد الانجليزي بتاعه كويس .. قعدت مطأطأ وداني معاه

وكنت مركز جداا في كل كلمة بيقولها

بصراحة .. والله راجل جااامد جدااا جدااا

…

بعد اما خلص طلعت انا واصحابي وناس كانوا معانا في الرحلة

طلعت وبدأت بالاسئلة .. وكلمته انجليزي وسبحان الله فهم الانجليزي بتاعي

ورد عليا وانا كمان فهمته وربنا

ياااااااه .. بجد انا كنت مبسوووط جدااا .. هو اينعم كان في كلام بيقع مني

بس اغلبية الكلام انا كنت فاهمه والحمد لله

سألته شوية اسئلة بما اني راجل واخد جافا SE

فسألته عن النت بينز وشوية عن الـ J Boss

وعن الجافا EE

والواد ضياء سأله عن اهنو احسن في الشغل لواحد مبتدئ النت بينز ولا انك تكتب الكود من اوله وكده

وبصراحة الراجل جاوب على كل حاجة .. والحمد لله الناس كانت فاهمة جداا

بعدها اخدنا صورة معاه وكانت حلوة جداا

…

….

طلعنا بعديها على سيتي ستارز

فعلا .. الحاجات دي تدل ان مصر لسه فيها حاجة عدلة تتشاف والله

طبعا مش هقدر اتكلم اكتر من كده

بس فعلا حاجة تحفة

والاحلى بقى من دا كله .. الشلة كلها كانت موجودة وكانت التهييس شغال على ودنه

في الاتوبيس

واحنا راجعين طبعا لعبنا اللعبة المشهورة بتاعتنا

وهيسنا احلى تهييس

…

ياريت لو الواحد يقدر يطلعها كل سنة

…

تحية خاصة لاحلى شلة .. والناس بتوع الكات اللي كانوا منورين الاتوبيس

والناس التانيين .. والناس اللي فوق والناس اللي تحت

واييييييييييييييه .. انت بتقوووول اييييييه

…

سلاااااااااااام

…

….

صورتي مع عمي الكبير

New_Style

السلام عليكم ورحمة الله وبركاته

ازيكم يا بشر

يارب تكونوا بخير .. والعالم اللي قاعدين في بيوتهم

يارب يكونوا كويسين

انا بحقد على اللي قاعد في بيته .. وكل يوم يصحى الظهر ولا هامه اي حاجة

يالا .. اجازة سعيدة عليكم ان شاء الله

…

النهاردة وبعد مرور اسبوع من البهدلة والرخامة والرزالة من التربية العسكرية

وجندي مجند : عبووود عبده عبد العاطي

احدثكم الان من بيتنا

هيييييييييييييييه .. تصفيق حااااد … بس خلاص كفاية كده

وانا الحمد لله كويس .. بس الصحة مش كويسة .. الحمد لله

عندي بررررد

مـــا عــلينا بــقــى

ندخل في المهم

…

انا غيرت الثيم وعايز اعرف رايكم

بصراحة هو جااامد جداا .. والصورة اللي فوووق جااامد اووووي

بجد تحسسك كده بحاجة مش فاكر اسمها ايه ؟؟

هسيبها ليكم تقولوا رأيكم فيها …. حلو ؟؟

اصلي زهقت من اللون الاسود .. وكمان مبوظ لون البلوج

انا كل لما ادخله .. احس اني داخل .. اعزي

يالا .. الله يرحمه كان راجل طيب اووووي

اجازة سعيدة عليكم .. ومحدش يفكر ياخد تربية عسكرية

روح ادفع الغرامة ولا تاخدهاش .. وبكرة تقولوا اسلام قال

سلااااام عليكم

Stop_:(

السلام عليكم ورحمة الله وبركاته

اولا : شكرا لكل الناس اللي اهتمت وردت في البوست اللي فات

والناس اللي مهتموش وقروا بس شكرا على مرورهم برضه

واسف لو كان حد قرأه وادايق يعني او قال : وانا مالي باللي جرالك  .. واحنا ذنبنا ايه تعذبنا معاك

اه نفسك وانت حر فيها لكن ليه تعذب غيرك معاك ؟؟

اولا : البلوج ده اسمه

Elahlawy’s Weblog

يعني مدونة الاهلاوي اللي هو انا .. يعني انا مضربتش حد على ايده وقولتله يدخل عندي

ولا عمري اجبرت حد انه يرد هنا

انا اسف في الاسلوب .. لكن الردود اللي سمعتها استفذتني جداا

والحمد لله ان الواحد بيقدر يسيطر على نفسه

انا بس كنت بوضح الفكرة

تاني حاجة : انا قولت في اول البوست الناس اللي بتحارب الاكتئاب او مش عايزة تكتئب

متدخلش ولا تقرا البوست …. وبرضه دخل .. طب اعمل ايه بقى ؟؟

….

انا اصلا مكنتش ناوي اكتب تاني على البلوج .. وانت برضه عندك حق وعلشان كده

انا من النهاردة قررت ما هو ات

..

من النهاردة داخل اقول اني خلاص معتش هكتب حاجة في الفترة دي

ولا الايام الجاية لحد اما احوالي تتحسن شوية

والسبب ظروف نفسية .. حااادة

في الفترة اللي فاتت دي حصل اللي كنت خايف منه

مع اني كان نفسي ميحصلش .. وخصوصا اننا في فترة الامتحانات

عملت كل حاجة .. ولأول مرة اجي على نفسي بالطريقة دي

ولاول مرة اعمل حاجات عمري ما عملتها ولا توقعت في يوم اني في يوم اعملها

ولا توقعت ان يحصلي كده … ابدأأا … انا معملتش حاجة علشان دا كله

كان كل يوم جديد يبدأ .. كان يبقى عندي امل ان كل حاجة ترجع زي الاول واحسن

واقول الايام الحلوة صعب تهون

واقعد اقنع نفسي بـ ” القلب الطيب ” اللي كان دايما بيسامح من غير تفكير

لحد اما جه اليوم اللي خلاص ” طفح الكيل ” زي ما بيقولوا .. لحد اما قولت

لا … كفاية كده

اه .. بقولها بأعلى صوت ليا … لا … كفااية اوووي لحد كده

…

من النهاردة خلاص … امل اتجوزت ومعدش في امل .. ولا سعيد

وواضح ان الست كان عندها حق لما قالت : وعايزنا نرجع زي زمان .. قول للزمان ارجع يا زمان …. وكفاية بقى تعذيب وشقى

كانها كانت عارفة باللي هيحصل

…

كان كل ده في سبيل اني مضيعش مني حاجة ” كانت ” غالية عندي اوووي

والحمد لله ان الواحد لسه عايش ومجرالوش حاجة

يالا .. ربنا يستر على الامتحانين اللي فاتوا .. ويهون عليا ويستر في اللي جاي

….

من النهاردة : تم الرجوع للثيم الاسود

….

من النهاردة : مش موجوووووووود في اي حتة

او بمعنى اصح واخد اجازة طويييلة

بس ممكن تلاقوني هنا على

513 Beta Room

وده البلوج الرسمي بتاعنا من المعسكر الخاص بينا

معسكر 513

الحاجة الوحيدة اللي باقية ليا في البلد دي

….

كل اللي عايزه منكم دعواتكم ليا اليومين الجايين دووول

وربنا يسترها علينا

ويوفقنا كلنا

ويارب انجح السنة دي … ياااارب

….

In the End … I wanna say some thing to u

I will go on .. without u .. without our dream

I will go Lonely

Now …  my heart will go .. with its pain

really .. i can not go

cause … I am already dying

…

My door was always open .. but now i locked it

So .. It is the END of this Story

Yes it is the END .. but to Start another life without u .. Far from u

It will be my life

The life of torment

…

Sometimes good bye is the only way

So … Good Bye

….

Sorry : I am Not Available

Sorry : Comments are closed

2009 عندي غير كل الناس

السلام عليكم ورحمة الله وبركاته

ملحوظة : البوست ده خطر للناس اللي بتحارب الاكتئاب

والناس اللي مش عايزة تكتئب

ولو عندكم اطفال او اي حد يهمكم تحت 18 سنة .. لا انصح لهم بقراءة هذا البوست

….

من الواضح ان توقعاتي الحلوة للسنة دي اللي كنت كاتبها على مدونة حبيبي

Bingo

كلها بدأت في التناقص

هيا لسه هتبدأ .. مهي بدأت خلاص

اولها حصل بضرب غزة .. والسكوت التام من جانب الدول العربية

…..

…..

المصدر

…..

اكيد الصورة صعبة جداا جداا

اللهم اهلك اليهود الملعونين .. اللهم دمرهم تدميرا

اللهم زلزل الارض من تحت اقدامهم

اللهم انصر الاسلام واعز المسلمين …. يااارب

….

تاني حاجة لما دخلت الامتحانين بتوع امبارح

واحد عملي .. والتاني شفوي

وطبعا كالعادة .. صباح الطناش .. و لا حليت في العملي ولا جاوبت في الشفوي

طلعت وقولت الحمد لله .. وان شاء الله ربنا هيعوضني بحاجة كويسة

طلعت من الامتحان الاخير راضي وحمدت ربنا .. وقولت مش مشكلة

لسه بنلعب في الامتياز برضه

وبرضه اللي يعرفوني .. يعرفوا اني كل سنة بلعب على الامتياز

اقل من الامتياز مبلعبش

طبعا انا كل ده وبحاول ابعد عن اللي ميتسماش … الاكتئاب طبعا

كل اما الاقي نفسي هقرب منه .. اروح جايب نفسي علطوول من هناك

…..

تالت حاجة بقى قابلت ميتو حبيبي وقالي على خبر بمليون جنيه

NetBeans Platform Certified Training

وقالي انها في الجيزة و امتى بقى .. 3 و 4 و 5  يناير

قولت مش مشكلة انا فاضي ومش مشكلة الامتحانات اهم 3 ايام وكده كده

كنت هقعدهم في البيت ومش هزاكر فقررت اني اروح

طلعت مشكلة السفر واني ابات في القاهرة .. قولت مش مشكلة هتتحل ان شاء الله

خلاص اما قررت وكل حاجة تمام الاقي حاجة كمان عايزنها

لازم يكون معاك لاب توب علشان تشتغل عليه

بس .. كده باظت

طب انا هجيب لاب في يومين ازاي يعني .. فكرت استلف لاب من اي حد

قولت مين …. اللي هيفرط في الاب بتاعه 3 ايام بحالهم

دا لو لابي عمري ما هسيبه نص ساعة بعيد عني

رجعت البيت وحكيتلهم على الموضوع قالولي روح بس جات حكاية الاب دي

هو طبعا ان شاء الله جاي .. بس انا دماغي مش رايقة عشان انزل واجيب لاب

وبعدين الوقت مزنوق جداا

راحت دي كمان … قولت مش مشكلة وقولت الحمد لله

….

رابع حاجة كان في شوية زعل بين شوية ناس وكان في محاولة مني لتصليح الامور

بما انها سنة جديدة .. وداخلين على امتحانات ومش عايز اي ازمة جديدة تحصلي

لان السنة دي تالتة يعني مش هزار .. ولازم ميبقاش في مواد .. ان شاء الله

لان كده هيبقى فيها دبح

قعدنا .. و حاولت والله اني اصلح كل حاجة .. والله العظيم حاولت

بس يظهر مش مكتوبلي ان يحصلي حاجة كويسة في اول يوم في السنة دي

سنة 2009

طبعا المحاولات فشلت .. وكل واحد راح لطريقه

بعد الحوار الجميل ده .. الدنيا مطرت .. طبعا كان لازم تمطر علشان اليوم يخلص

وكل حاجة تنتهي

طوول عمري بحب المطر .. وبحب امشي في المطر

طوول عمري اقول ان المطر سعادة .. ورومانسية .. وحب وحاجات كتيير

ولما كان حد يقولي غير كده … كنت اقوله لا .. انت غلطان

من النهاردة بقى .. من يوم 1/1/2009 … انا بكره المطر .. ومش بحب الشتاء

….

خامس حاجة بقى .. بعد اما روحت البيت في اليوم اللذيذ ده

1/1/2009

دخلت البيت والدنيا بتمطر على اخرها .. قولت وايه يعني

دخلت البيت وسلمت على ابويا وامي ” ربنا يخليهملي ” وحكيتلهم على موضوع النت بينز والشهادة وان مينفعش اروح من غير لاب

طبعا الخبر نكد عليهم … روحت داخل اوضتي وقفلت على نفسي الباب

وقولت اشغل قرآن وروحت رايح قاعد على السرير

وقعدت افكر في اللي حصلي النهاردة وكلام واحد صاحبي قالهولي في القطر واحنا مروحين

فجأة روحت في النوم

….

النهاردة الصبح بقى اللي هو 2/1/2009

اقوم من على السرير مخضوض .. سامع ناس بتصوت .. الكمبيوتر والنور مطفيين

قولت ايه اللي حصل .. البلد بتولع ولا ايه ؟؟

قمت بسرعة افتح البلوكونة .. الاقي ناس في اخر الشارع بتصوت

طب صوتهم داخل لحد عندي في الاوضة ليييييه ؟؟

معرفش في ايه ؟؟

طب كده قشطة اوووووي

هو انا ناقص

يالا وماله .. كده زي الفل

….

تحديث

اخر اخبار 2009 وعمايلها

يوم الجمعة اللي فاتت اليوم اللي صحيت فيه على صويت

كان عندي ماتش … طايرة طبعا

وروحت ونزلت ولعبت .. والحمد لله لعبت حلو

بس يظهر ان في حد ضرب الفرقة عين

1-

خسرنا الماتش وده كان اخر فرصة لينا

2-

طبعا انا كنت حاسس ان هيجرالي حاجة .. فنزلت عملت شوية تسخين خفيف

والحمد لله كانت كويسة .. روحت رابطها ولابس عليها الانكل .. وروحت نازل

في نص الماتش .. حصل اللي كنت عامل حسابه رجلي لفت

بس الحمد لله منزلتش عليها .. طبعا الحمد لله اني كنت رابطها والا كان هيبقى جبس علطوول

طلعت شوية .. وبعدين نزلت تاني وكملت وهيا وجعاني طبعا

بس مفيش حد حاسس بحاجة غيري .. وانا نفسي اكمل لعب

3-

بعد ما نزلت بشويتين كده .. محمود زميلي في الفريق كان في نقطة هو طالع بلوك

وهو نازل .. نزل على الارض وقع وبيصوت

كله جرى عليه .. لقينا الواد ماسك ركبته ومش قادر يحركها

يااادي النيلة .. استر يارب

اخدنا الواد وروحنا وجيبناله ميه وتلج الحمد لله  كان في دكتور في الفريق التاني واحنا كان معانا دكتور علاج طبيعي

روحنا طالعين  بيه على صيدلية واخد حقنة الدكاترة قالوله عليها وكاتبوله مرهم

لحد يوم تاني يوم اما يروح للدكتور .. عمل اشعة وتحاليل

قاله ممكن يكون تمزق في الاربطة او الغضروف .. بس المرة دي في الركبة عنده

ربنا معاك يبني والله .. امتحاناته كمان اسبوع

4-

النت فاصل من يوم الجمعة من ساعة ما رجعت من الماتش

يالا هيا هتيجي على النت يعني

سلااااام

والف الف شكر يا  2009

عاملة معانا احلى واجب والله

….

سلام بقى

علشان هقوم اعيط شوية

New-Style

السلام عليكم ورحمة الله وبركاته

ازيكم يا بشر

يخرب بيت التعود اللي الواحد بقى فيه ده  لازم كل بوست اكتب ازيكم يا بشر

حاجة تخنق … ما علينا

….

النهاردة بعد الصلاة بعد اما رجعت البيت – بحمد الله – جاي افتح الورد بريس

لقيتهم غيروا شوية حاجات في المين بورد

بس بصراحة هايلة

فطلعت في دماغي اغير الاستايل … واهو بمناسبة تغيير استايل المنتدى بتاعنا برضه

فأنا ايه بقى قولت اغير انا كمان الاستايل الاسود ده

بصراحة انا كنت حاطه علشان شاكله عاجبني ومريحني في البورد من جوه

مش نظرية اكتئاب ولا حاجة

…

فا وانا بقلب في الاستيلات كده لقيت ده وشكله جااااامد موووووووت

فحطيته

ايه رايكم فيه بقى ؟؟

واهو برضه دعوة لترك الاكتئاب … وحبة تفاؤل بقى

دعـوة … مااااشي … ارحمونا بقى من الاكتئاب

كل اما اجي اعمل حاجة الاقي قدامي اكتئاب .. والعملية مش ناقصة

والواحد بيشرب “  كركديه ” اليومين دووول كتييير .. علشان ميجليش اللي انتوا عارفينه

يالا ….. تفائلوا .. تعشوا .. تنتعشوا …. مزمز ميراندا

….

يالا … كل ستايل وانتوا طيبين

سلاااااام

3ayesh_we_mesh_3ayesh

السلام عليكم ورحمة الله وبركاته

ازيكم يا بشر

اديني رجعت تاني اهو علشان اقرفكوا واطلع عينكوا في القراية … هههههههههههه

و بقالي حوالي شهر و 8 ايام مكتبتش حاااجة خاااالص

من اخر بوست بتاع العيد

ايام الكحك والبسكوت … اصله كان عيد بقى … فاكرين

بس … بجد فعلا مكنش ليا نفس اكتب اي حاجة خااالص

وخصوصا ان الشهر ده من اصعب الشهور اللي عدت على الواحد في حياته كلها

يمكن لك عزيزي القارئ ان تتخيل ما حدث لي في هذا الشهر … ايه ده ؟؟

هيا هتقلب فصحى ولا ايه ؟؟

وبعدين في حاجة كمان

اصلا النت كان فاصل طووول الشهر ده ولما بدأ يتعدل .. جات الدنيا شتت تلج

فالسويتش باظ والاكسس اللي فوق السطح اتكسر … محدش يستغرب

حصل كده فعلا والله

غير اني بقى في المدة اللي فاتت دي حطمت كل الارقام القياسية ليا في حاجات كتييييييير

اكيد طبعا كل واحد الفضول بيدفعه انه يعرف ايه الحاجات اللي انا كسرت الارقام القياسية فيها .. صح ؟؟

وانا اكيد هقولكم طبعا

الحاجات اهي

..

البرد … اطول فترة البرد يقعد فيها معايا …. طبعا علشان مش بهتم بنفسي

النوم … وده عملت ارقام حلوة في قلة النوم .. وكنت بعمل بعدها ارقام حلوة في النوم برضه

عدم الاكل … ودي بجد من الحاجات اللي فعلا عملتها .. وقعدت ساعات كتييير

الاكتئاب … مع اني ضده ومش بحبه لاني عارف اضراره كويس .. بس ساعات بيقدر يسيطر عليا

وده نتيجة للفراغ بتاع المدينة .. وعدد الساعات اللي الواحد بيضيعها في السفر

وحاجات تانية كده  -نفسي تخلص بقى- علشان انا زهقت

مع ان الواحد كان بيحاول يشغل نفسه بحاجات مفيدة … بس برضه

ان شاء الله هحاول اكتب بوست عن الفراغ واضراره والوقت و اسباب تضييع الوقت …. بس حد يفكرني ياااااريت يعني

…..*…..*…..*…..*…..

نصيحة محدش يحاول او حتى يفكر يحطم الارقام القياسية لنفسه

علشان بجد هتتعبوا … ومش اي تعب

اللهم بلغت .. يالا اشوفكم بخير في البوست الجاي .. ان شاء الله

سلاااااام

New Mother Board G31

السلام عليكم ورحمة الله وبركاته

ازيكم يا بشر

برضه … ليكم وحشة والله كل يوم بتزيد عن اليوم اللي قبله … هاااااااااااانت

…….

النهاردة اخيرا … وبعد عناء السنين … وبعد الدوخة واللف والمشاوير … الواحد حقق تاني امنية ليه

الحمد لله … بعت البوردة القديمة بتاعتي اللي كانت مدوخاني ومطلعة عيني

GIGA BYTE  848 … Free

DDRAM 1 …. 256

وكانت جايبالي الضغط والسكر والهبل والانفلونزا و …. هتقولوا طب ايه اللي جاب الانفلونزا ؟؟

منا كنت مخرجها بره الكيسة خااااالص ومشغل عليها المروحة 24 ساعة … نظاام تهوية عااااالي جداااا يعني

وياريتها كانت بتشتغل

…….

طبعا …. الجهاز ده محدش يسألني انت كنت جايبه بكام … وبعت البوردة والرامة وكارت الشاشة بكام

علشان هعيط

…..*…..*…..*…..*…..*…..*…..

لكن … اخيرا

الحمد لله … بعتها  -بتمن رخيص اه بس الحمد لله خلصت منها ومن ذلها-  وجبت بوردة

GIGA BYTE  … G31

تقريبا اخر اصدار من جيجا بايت نزل السوق

اصلي بشجع شركة جيجا بايت موووووووووووووت … زي الاهلي بالظبط

وكارت شاشة بلت ان 256

وجبتلها طبعا رامة كويسة علشان تدلع براحتها

…..*…..*…..*…..*…..*…..*…..

ربنا يقويني عليها بقى

واحافظ عليها

احسن انا خلااااااااااااص … جبت اخري وزهقت من الاجهزة وقرفها

…..*…..*…..*…..*…..*…..*…..

على فكرة الاسعار اللي عبدالحميد كان كاتبها

على المدونة بتاعته

هنا

الاسعار دي كل سنة وانتوا طيبين

خلااااااااااااااااااص

بـــــــــح

بأمانة الاسعاااااااااااااااااااار نزلت خااااااااااااااااالص

واللي عايز يعرف عنوان الشركة يقول

ويروح يتأكد بنفسه

New Style

السلام عليكم ورحمة الله وبركاته

….

..

ازيكم يا بشر

ليكم وَحشة والله

….

كنت عايز اخد رأيكم في الاستايل الجديد ده

اصله بصراحة عجبني اوووي … وخصوصا ان في حاجات بتحصل كده

ربنا يستر منها

الواحد شكله داخل على مووود اكتئاب … ربنا يستر

المهم … ده من الاخر ده استفتاء

وياريــت

تقولوا رأيكم

Please say ur Opinion

…

يالا سلااااااااااااااام

__