يلا بينا ندعي

السلام عليكم ورحمة الله وبركاته

ازيكم يا بشر

عاملين ايه في رمضان ؟؟

خلاص العشرة الاواخر

….

…

وبمناسبة كده

افتكرت بوست كان على مدونة

هوندا

ان كل واحد فينا يعمل قايمة دعوات يدعي بيا في رمضان

فـنظرا لان الصفحات اللي بتتعمل هنا على البلوج مش  بتتشاف على الريدر

او ممكن حد بيدخل بس مبيكونش واخد باله منها

فبحمد لله عملت حاجة زي قائمة دعوات

في صفحة لوحدها اسمها

يلا بينا ندعي

موجودة على ايدك اليمين وانت بتقرأ البوست دا

هتلاقيها مع صفحة

Wish List

و

About me …

عايز اشوف ادعية حلوة هناك

سلاااااامـ

Ramdan2009

السلام عليكم ورحمة الله وبركاته

ازيكم يا بشر .. ايه اخباركم

واخبار الصيام معاكم

ان شاء الله الناس كلها تكون بخير

وانا ان شاء الله متفائل بجد ان رمضان السنة دي هيغيرنا كتيييير .. ان شاء الله

دلوقتي .. احنا قولنا .. رمضان بدأ  .. هتعمل ايه ؟؟؟

هنصوم .. وهنصلي .. وهنقرأ القرآن .. بإذن الله

تماااام جدااا .. ربنا معاك ومعانا

احنا كنا عايزين حاجة كمان .. فاكرها ؟؟ .. عايزين رمضان السنة دي يغيرنا كلنا ان شاء الله

انت بقى .. عملت ايه علشان تتغير ؟؟

نويت … ؟؟

تماااام جداا .. اول حاجة النية .. بس خد بالك لازم النية تكون خالصة لوجه الله تعالى

خد نية كبيرة

النية يا جماعة اهم حاجة .. خد نية كبيرة .. واكتبها وعلقها عندك في الاوضة

وصمم انك هتعملها السنة دي في رمضان ان شاء الله

اي حاجة مكنتش عارف تعملها في غير رمضان .. خد النية وقول انا هعمل كذا ان شاء الله

….

شوية اسئلة صغيرة كده ؟؟

هل … حطيت هدف ليك وقولت هعمله في رمضان ده ان شاء الله ؟؟

هل … توكلت على الله .. ونويت النية .. وحطيت الهدف .. واخذت الخطوة اللي بيها هتغير حياتك ان شاء الله ؟؟

هل … مثلا حطيت جدول لعباداتك في رمضان

ونويت وصممت انك تعمله على اد ما ربنا يقدرك ؟؟

جدول زي ده مثلا

…

…

ان شاء الله تكون الناس كلها .. استحضرت النية وحددت هدفها واخدت الخطوة “خطوة التغيير” … ان شاء الله

وهي انك تكتب الحاجة دي وتعلقها عندك وتنوي عليها … واهم حاجة انك تتوكل على الله

وان شاء الله ربنا هيساعدك فيها

…

نسأل كام سؤال كده في السريع ؟؟

كام … مسلسل اتفرجت عليه ومتابع حلاقاته لحد دلوقتي ؟؟

كام … برنامج تليفزيوني انت متابعه ومتابع المذيع بتاعه والناس اللي بيجيبهم ؟؟

كام .. وكام .. وكام ؟؟

طب … قريت كام جزء من المصحف لحد دلوقتي ؟؟

كام مرة … وانت بتصلي التراويح او الفجر دعيت لأهلك او اصحابك او معارفك او امتك .. ان ربنا يهديهم ؟؟

كام … برنامج اسلامي او ديني انت بتابعه لحد دلوقتي ؟؟

سواء على التليفزيون او بتنزله من على النت

يا جمــاعـــــــــــــــة

….

عايز اعرف

!!

كام واحد .. سمع عن حملة الـ 10 مليون ختمة للقرآن اللي معمولة السنة دي

في برنامج الاستاذ عمرو خالد

قصص القرأن – الجزء 2

؟؟

عموما … استيكر الحملة اهو

علشان اللي يحب يعرفها

….

الهدف من الحملة دي هو الوصول لـ 10 مليون ختمة للقرآن الكريم

وياريت نوزع الاستيكر ده .. وننشره في كل مكان

وفي عداد موجود على موقع الاستاذ عمر خالد

كل اما تختم ختمة ان شاء الله تروح تسجلها

….

بجد برنامج قصص القرآن السنة دي جميل جدا جداا جدااا

واسمعوه .. بجد الحلقات جميلة .. ومش هتندموا

الحلقات موجودة على اليويتوب

الحلقة الاولى هنا

وموجودة على موقع عمرو خالد برضه

هنا

….

كمان

برنامج الاستاذ مصطفى حسني

اسمه

قــــصة حـــــــب

بجد برنامج جميل جدااا جدااا جداااا

….

بيذاع كل يوم على قناة اقرأ الساعة 11 مساءا

ويعاد الساعة 5 فجرا على قناة اقرأ برضه

يا ناس ياللي مش عارفين تحسنوا علاقاتكم بالناس

شوفوا حب الرسول -صلى الله عليه وسلم-  لأصحابه .. وحبه لأمته التي لم يراها

بجد نفسي كل الناس .. كل الناس .. يسمعوا الحلقة الاولى في البرنامج ده

يااااه

بجد حلقة جميلة جدااا جداااا جدااااا

وفيها معاني حلوة اوووي

….

يارب اهدينا .. واهدي امة حبيبك سيدنا محمد -صلى الله عليه وسلم

ياااارب

يارب وحد صفوف امتنا .. واهدينا لكل خير دايما

يااااارب

يارب رمضان السنة دي يغيرنا .. يارب قوينا على انفسنا

يااااااارب

…

اللهم اغفر لي وللمؤمنين والمؤمنات .. المسلمين والمسلمات .. الاحياء منهم والاموات

{رَبَّنَا اغْفِرْ لِي وَلِوَالِدَيَّ وَلِلْمُؤْمِنِينَ يَوْمَ يَقُومُ الْحِسَابُ} (41) سورة إبراهيم

….

رَبَّنَا إِنَّكَ تَعْلَمُ مَا نُخْفِي وَمَا نُعْلِنُ وَمَا يَخْفَى عَلَى اللّهِ مِن شَيْءٍ فَي الأَرْضِ وَلاَ فِي السَّمَاء} (38) سورة إبراهيم

تَعْلَمُ مَا فِي نَفْسِي وَلاَ أَعْلَمُ مَا فِي نَفْسِكَ إِنَّكَ أَنتَ عَلاَّمُ الْغُيُوبِ} (116) سورة المائدة

….

شدوا حيلكم يا جماعة في رمضان

عدى 6 ايام .. والنهاردة 7

عايزين كلنا -ان شاء الله- نطلع من رمضان السنة دي واحنا مكتوب لكل واحد فينا

مــعـتــوق مــن الــنـــار

ياااااااارب

دعـــواتكـــم يا جـماعــة

قال رسول الله -صلى الله عليه وسلم- : ” دعوة المرء المسلم لأخيه بظهر الغيب مستجابة،عند رأسه ملك موكل

كلما دعا لأخيه بخير قال الملك الموكل به آمين، ولك بمثل ” … صدق رسول الله -صلى الله عليه وسلم

…

اللهم اشفني واشفي جميع مرضى المسلمين

ياااارب

…

يالا .. معلش البوست ده طويل شوية

خدوا بالكوا من نفسكوا

سلاااام

Ramdan Kareem

السلام عليكم ورحمة الله وبركاته

ازيكم يا بشر .. عاملين ايه ؟؟

انا هدخل في الموضوع بقى علطوووووول

كل سنة وحضراتكم طيبين

كل سنة والامة الاسلامية والعربية كلها بخير

بمنـاسـبـة شـهـــر رمــضـان الكـريم

كل سنة والامة الاسلامية كلها بخير .. ويااارب نشوفهم متحدين ومتجمعين بعد رمضان ده

ياااااااااااارب

….

….

اولا … طبعا بمناسبة شـهــر رمــضــان الكريم

غيرت الثيم بتاع البلوج .. اصل الثيم القديم كان طووول اوووي وشكله بقى عجيب اوووي

الصراحة كان في ثيم تاني حلووو مووت وعاجبني جدااا

لكن قولت اخلي ده في رمـضـان ان شاء الله

الثيم اللي محطوط ده شوفته على بلوج

ميتو افندي

وعجبني جدااا .. فقولت اجربه .. وكل سنة وانت طيب يا ميتو باشا

ثانيا بقى .. بمناسبة شـهـر رمـضــان الـكريم برضه

شوية كلام جمييل جميييل جميييل بجد

على بلوج صاحبي

احمد مسعود

بجد … كلام جميل جدااا .. وكلام مهم جداااا

ولازم كلكم تقرؤه

….

ثـالثـا بقى .. ودي مـهـمـة بـرضـه

عايزكم ان شاء الله وانتوا بتصلوا التراويح كده ان شاء الله .. او في صلاة الفجر

عايز الناس كلها تدعي ليا وكل المسلمين

ان ربنا يهدينا … ويوفقنا … ويثبتنا على دينا

ياااااارب .. إهدينا .. ياااااارب

وان شاء الله .. انا حاسس ان رمضان السنة دي هيغيرنا كتيييير .. ان شاء الله

ان متفائل جداا بصراحة

اننا هنبقى كويسين جداا بعد رمـضـان ده ان شاء الله

وهنتغير كتير .. ان شاء الله

بس ننوي الاول اننا هنتغير .. ونعاهد نفسنا على اننا هنتغير

للاحسن طبعا

وان شاء الله ربنا هيكون معانا .. بس اكيد كلنا لازم ندعي لبعض

لاننا لازم كلنا نخاف على بعض

لاننا في الاول وفي الاخر ” امة ” واحدة

خير امة اخرجت للناس

صح ؟؟

وافتكروا دايما وانتوا صايمين ان اذا جاء رمضان

عن ابي هريرة -رضي الله عنه- عن رسول الله -صلى الله عليه وسلم- قال : ” إذا جاء رمضان فتحت أبواب الجنة

وغلقت أبواب النار وصفدت الشياطين ” .. صدق رسول الله صلى الله عليه وسلم

ليه بقول كدااا

لان طوول ما احنا فاكرين الكلام ده .. عمر ما الشيطان هيقدر يقرب منك وانت في رمضان

وهتعمل الخير كله .. ومش هتبقى مستني حاجة من حد

وان شاء الله … ربنا يبعد عننا الشياطين في رمـضـان وبعد رمـضـان ان شاء الله

يااااااااااارب

اخـــر حــاجــة بـقـى

عايز الناس كلها بجد تخلي بالها من اللي جاي ده

….

….

مش كده ولا ايه ؟؟

يالا … كل سنة وانتوا طيبين … و رمضان كريم

وان شاء الله كلنا نخرج من رمضان ده .. واحنا كلنا عتقاء من النار

لان شهر رمضان

اوله رحمة .. واوسطه مغفرة .. واخره عتق من النار

متنسوش بقى .. دعواتكم

ربنا يهديني .. ويهدي جميع المسلمين .. ياااارب

سلاااااااااام

Happy Birthday To U “Hunikal” :D

السلام عليكم ورحمة الله وبركاته

النهاردة كلمتين صغيرين وماشي علطووول .. مش هطول

كنت عايز اقول حاجة كده قبل ما ادخل في الموضوع

الصاحب

ايه رأيكم في الصاحب .. اللي هو بين قوسين الصديق

ناس هتقولي ايه يا عم انت بتتكلم في ايه … دا الصديق دا حاجة كويسة جداا … الصديق .. وقت الضيق

بس انا بقى

مش هقول كده

الصديق … مش وقت الضيق بس

الصديق … وقت الضيق .. ووقت الفرح .. ووقت الحزن .. ووقت التهييس .. ووقت المزاكرة برضه

ووقت ……… حاجات كتييير جداااا

عارفين … الواحد لو جه يراجع نفسه ويشوف ايه اللي باقيله من كل اللي حصله في حياته

هتلاقوا ان الصديق الحاجة الوحيدة اللي بتتبقالك

بجد والله ومش بهزر

….

مهو فعلا … ﻻ  حبيب بيخلصلك .. و لا قريب بيسأل عنك -اﻻ لما بيكون محتاجك- .. ولا اي حاجة هتدوم معاك

….

في اﻻخر

بعد اما تخلص كل لفتك دي مع كل الناس اللي هتمر بيهم في حياتك

هترجع تاني

لصاحبك

تحكيله .. وتتكلم معاه .. وتقوله اسرارك

تقوله ايه اللي مضايقك .. وايه اللي مزعلك

تفضفضوا مع بعض .. وانت مطمن

انه هيحافظ على اسرارك

وبجد مش هيصدقني .. غير اللي عنده صاحب مخلص .. وفي .. جدع

…..

بصراحة انا مش بعرف اعبر .. لكن كل اللي اقدر اقوله ان الحمد لله ان ربنا رزق الواحد بأصحاب

جدعااان ورجالة بمعنى الكلمة

ممكن اقول حاجة

هنختصر بيها الكلام دا كله

ان فعلا الحاجة الوحيدة اللي ممكن تطلع بيها من خلال علاقاتك مع الناس

هيا

” صاحب جدع “

بس

*….*  *….*

النهاردة بقى … واحنا داخلين على يوم جديد

17 – 8 – 2009

دا بقى عيد ميلاد صاحبي

اسلام

” HuNiKaL“

وبما ان اللاب بتاعه بعافية شوية

- ادعوا ربنا يقومهوله بالسلامة -

فانا انتهزت الفرصة وقولت ادخل مخصوص عندي واعمله بوست

واقوله

كل سنة وانت  طيب يا صاحبي

وعقبال كده اما اشوفك قاعد في الكوشة كده .. وجمبك بت الحلال اللي تحبك

وان شاء الله السنة الجاية تكون حققت كل اللي نفسك فيه

يا كبير

ربنا يوفقك يا صاحبي .. وينولك كل اللي في بالك … ياااارب

….

….

….

Happy Birthday To You My Friend

Happy Birthday To You

Eslam

Everything Burns !!

السلام عليكم ورحمة الله وبركاته

امبارح انا كنت في اسكندرية .. ويارتني ما روحت

اليوم في اوله بديته بإبتسامة .. بضحك في وش الناس من ساعة اما نزلت من بيتنا

واﻻقي الرد في عنيهم بيقولولي انت ايه اللي مخليك مبتسم اووي كده

شايف الدنيا حلوة على الصبح ليه كده ؟؟

وانا اقول سيبك منهم .. خليني مع دماغي .. مهو محدش عارف حاجة

المهم بدأ اليوم .. حصلت مشاكل .. مش مهم هيا ايه ؟؟ .. وبعدين قولت اجي على نفسي علشان احلها

مهو برضه ﻻزم اليوم ميعديش وحش

وقولت هعمل للمشاكل

pause

وقولت اللهم اخزيك يا شوشو .. وقولت اكمل عادي

ورجعت رسمت اﻻبتسامة تاني

المهم .. الساعة جات 1 الظهر .. ودخلت فيلم

الف مبروووووك

كنت هموت وادخله بصراحة

فيلم جااامد جدااا جدااا جدااا … جدااا للصبح

وسبحان الله في مواقف كانت بتحصل فيه وانا كنت بقول انها هتحصل من قبل ما اشوفها

كأني شوفته قبل كده .. بس انا حاسس اني شوفت او قريت حاجة زي دي قبل كده

فيين مش عارف

لكن المهم ان الفيلم جااامد .. طلعت من الفيلم برضه راسم اﻻبتسامة .. مع ان اخره وحش اوووي

بس انا كنت متوقع اخرته دي .. وفضلت برضه راسم اﻻبتسامة

بس قلبي مكنش حاسس بخير

المهم … طالع من السينما .. جات عربية بسرعة غريبة في مكان مينفعش انها تمشي بسرعة فيه

المكان ده محطة الرمل قدام سينما فريال

بجد انا كنت هروح فيها النهاردة .. وكنتوا انتوا بقى بدل اما تقراوا البوست دي .. كنتوا هتقروا الفاتحة عليا

وتقولوا الله يرحمه كان اخر حاجة كان عايزها .. انه كان نفسه يبقى مبسوط

طبعا بعد اما العربية عدت كده على خير الحمد لله

بصتله وقولتله

ﻻااا … انا موت موتات احلى من دي بكتييييير

اييييييه .. البلد دي ملهاش كبير ولا ايه

بعدين لقيت العربية وقفت .. اممممممممم ياﻻ المسامح كريم بقى

هتيجوا معايا وانا بغير الواقع

وﻻ اروح لوحدي

….

مش عارف ليه كانت مدياني ظهرها .. مع اني كنت مديها تفاؤل .. وابتسامة بعرض البحر اللي طوول النهار

قاعد باصصله وبكلمه

وكل اللي يعدي يقول في نفسه دا اكيد مجنون .. بس مش مشكلة

المهم اني بكلمه .. وبحس اني لما بكلمه برتاح والله

والنهاردة وعلى الصبح كده .. قولتله كلام كتييير اووووي .. مش عارف بقى

كان نايم تقريبا

طبعا الواحد مفيش مانع انه يجي على نفسه ويعدي

لكن اهم حاجة انه يبقى عنده دم

ويفهم ان خلاص

Everything Burns !!

She sits in her corner

Singing herself to sleep

Wrapped in all of the promises

That no one seems to keep

She no longer cries to herself

No tears left to wash away

Just diaries of empty pages

Feelings gone astray

But she will sing

Chorus:

Everything burns

Everyone screams

Burning their lies

Burning my dreams

All of this faith

And all of this pain

Burning all down

Cause my anger reigns Everything burns …

By : “Ben Moody & Anastacia”

عارفين .. انا بجد مش عارف ايه اللي بيحصلي ده

وده بيحصلي ليه ؟؟

بس اللي واثق منه لحد دلوقتي

ان .. بعد اللي حصل النهاردة اخر حبة كانوا موجودين … خلاااص

وإن

….

….

Everything Burns !! … Everything Lost !!

and

“ يومين وارتاح “

حد فاهم حاجة ؟؟ طب حد مش فاهم حاجة ؟؟

عموما … اللي فهم يفهم اللي جمبه اللي مفهمش

وفي اﻻخر

لما كلكوا تفهموا ابقوا

فهموني

علشان انا معدتش فاهم حاجة

!!

سلاااااام

Come Back Again

السلام عليكم ورحمة الله وبركاته

احـــم احـــم

يــــارب يـا ســـاتر .. كح  كح

سوري يا جماعة .. اصلي مدخلتش بقالي كتير فلازم اسلم على اهل الدار

يمكن الاقي حد عايش حياته هنا ولا حاجة

يا ساتر يارب .. ايه ده .. كل ده تراب

الغيبة المرة دي طولت اووي مش كده .. معلش والله حقكم عليا

بس مكنش في نت والله

حتى لما كنت بروح المكتبة -مكتبة اسكندرية- مكنتش بعرف اكتب حاجة

لدرجة زي ما انتوا شايفين كده .. التراب مالي الدنيا ومحدش كان بيدخل ينفض ولا ينضف اي حاجة خالص

بجد يا جدعان .. لو لقيتوني انقطعت كده مرة واحدة بدون سابق انذار

حد يتطوع ويبلغ المطافي

لا بجد .. حد يبقى يدخل يشقر على المدونة .. يفتح الشبابيك كده .. ويهويها .. بس مينساش وهو ماشي

يقفل الشبابيك تاني .. احسن ارجع ملاقيش الكنز اللي انا مخبيه هنا

كنز ايه يا عم انت حلتك حاجة

احـــم احــــم .. ايه يا عم .. الناس قاعدة يا سيدي بلاش فضايح

المهم … حصلت في الفترة الاخيرة حاجات جااامدة جدااا جدااا

وحاجات غريبة اووووي

بداية : من اننا اخدنا اجازة من الشركة لحد يوم  1 – 8 من ساعة اما حصل ميتج في الشركة مع الناس اللي هيشتغلوا اللي هما احنا

المهم اننا اخدنا اجازة تقريبا من يوم الخميس 9 – 7

علشان هنزاكر حاجات ونرجع تاني نتسأل فيها .. وهيبقى في شوية حاجات كده .. هقول عليها بعدين متخافوش

حلو الكلام

المهم … جيت يوم  13 – 7 – 2009 .. الناس كلها تفتكر التاريخ ده

وانا عمري ما هنساه طبعا

ايه يا عم  ؟؟ … مش تقول ايه اللي حصل ؟؟

اه صحيح … سوري نسيت … في اليوم ده انا شديت الرحال وروحت رايح  لــ “محبوبتي” اسكندرية طبعا

محدش يفهم غلط

المهم قابلت صاحبي .. اسلام .. وكان معانا الحاج ” ابويا ” ونازلين ناويين اننا نشتري

لاب توب

المهم لقينا شوية لابات حلوين .. شوية ايه دا احنا تقريبا لفينا البلد كلها على لابات .. لغاية اما استقرينا على ده

…

…

ايون هو ده

Lenovo … N 500

حاجة لسه نوكيا منزلتهاش .. لسه بدري عقبال اما تنزل من نوكيا

انا كنت حاطط عيني عليه من فترة قبلها .. على اساس اني ممكن الاقي حاجة احسن

بس كده حلو .. الحمد لله

المهم طبعا مبروك عليا .. بس انا طلع عيني في موضوع اللابات ده لحد اما كنت هتجن بسببهم

وشوفت لابات بالهبل .. واسعار هبل برضه .. لحد اما الحمد لله وقعت في ده

مبروك عليا

…

طبعا .. انا بعامله بإحترام شديد جدااا .. مهو بقى ابني الصغير

اللي بيسألني دلوقتي .. امال هو عامل ايه معاك

اقوله والله مغلبني .. ومحيرني معاه

بس الحمد لله … لحد دلوقتي بعامله بإحترام

يارب هو كمان يعاملني بإحترام دايما

مهو معدش فاضل بينك وبين لابك … إلا الاحترام … الاحتراااااااااام

احترم لابك وعامله كويس .. يحترمك ويقدرك

بصو بقى .. هو اسلام قالي هتفضل كده شهرين .. وبعدين هتعامله بالجزمة

لا … بقى

انا عمري ما  هعامله وحش .. واللي هيعامله وحش من اصحابي او اي حد هو حر

هقلبله على الوش التاني

….*….*….

المهم بقى … تاني حاجة حصلت … كانت في الاسبوع اللي بعده علطووول

اللي المفروض انا بزاكر فيه بقى

حضرت الشنطة .. اللي بتتعب معايا دي .. وروحت طالع على مطروح

يوم الاحد 19 – 7 – 2009

مع اصحابي

بودي .. واحمد مسعود .. واسلام .. وانا طبعا

بين قوسين تيم  513 بس في مطروح

كان فرح اخت  محمد السيد صاحبنا .. مبرووووك ياض

و ” عقبالي “ … قولوا يااااااارب

المهم … الواحد راح  وخطف 3 ايام من العمر .. واجمل 3 ايام والله

واحلى حاجة الرجالة صحابنا اللي كانوا هناك .. عملوا احلى واجب معانا والله

بجد انا روحت مناطق بجد اجمل مناطق شوفتها في حياتي .. بعيد عن اللي كان بيحصلي ساعتها

والبرد اللي كان مبهدلني .. مكنتش انا بس هو كلنا تقريبا كنا واخدين برد

بس الحمد لله … انا وعبدالله اللي كنا جايبين البرد معانا واحنا رايحين

الحمد لله مبنجبش حاجة من بره

بس بجد هناك على البحر تنسى نفسك  .. وتنسى البرد .. وتنسى كل حاجة

انا مكنتش متخيل انا في مناطق بالجمال ده .. سبحان الله فعلا

انا كنت متوقع ان الحاجات دي في التليفزيون بس .. مكنتش متخيل انها في الواقع كده بصراحة

الصور بتاعتي بقى اللي مصورها بموبايلي انا هتلاقوها ان شاء الله على فليكر او الفيس بوك

هتلاقوا اكترها مناظر طبيعية حلوة اوووي

….

المهم رجعنا .. وانا بصراحة من جوايا مكنتش عايز ارجع

بس قولت كفاية كده .. احسن ممكن الواحد يفلس هناك ولا حاجة

اضطر ارجع في القطر .. يا اما هرجع ماشي .. واللي بيركب القطر عندهم ده

يا اما بينزل منه ميت .. يا اما عنده شلل اطفال .. وفي كلا الحالتين مينفعش يتعملك عمرة تاني

….

رجعت تاني بقى للبيت والمزاكرة … افتكرت بقى اني المفروض ازاكر علشان هيبقى في حاجة زي امتحان كده

يوم 1 – 8 .. فاكرين محدش ينسى اليوم ده

اووووووف .. انا ايه اللي رجعني بس .. منا كنت هناك مستريح والعملية قشطة

كويس .. ازاكر بقى .. لا خليها بكرة

يجي بكرة .. اخ .. خليها بعدو .. وبكرة يجر بعده لغاية اما جه يوم  1 – 8 ده

…

اكيد دلوقتي ناس هتقول انت يوم  1 -8 – 2009 ده يوم تاريخي في حياتك

وانا بقول بجد

اليوم ده فعلا .. ” اصعب يوم ” عدى عليا في حياتي

هبقى احكي عليه بعدين .. لان تقريبا الناس اللي عملوا ورد بريس بيشتكوا مني

اني بكتب كتييير

بس بيسيبوني .. علشان بنظم في كتابة الكلام

بحاول اخلي اللي بيقرا ميزهقش .. ولا انتوا ايه رأيكم في الموضوع ده

؟؟

بجد ربنا يكون في عونكم ياللي بتقروا .. دا اذا كان في حد بيقرا اصلا

بكرة اجيب عيال .. واخليهم يقعدوا يقروا البوستات كلها كلمة كلمة .. حرف حرف

هخليهم يلبسوا نضارات وهما في كي جي وان

طب وانت هتجيب عيال من غير حب ولا جواز ؟؟

اه يا خفيف .. هجيبهم من غير حب ولا جواز .. احنا فاضيين لسه هنحب ونجيب ” دباديب ” .. ولسه ” هنتجوز “ .. ونقعد 9 شهور وبعدين يجيلك عيل

يقرفك ويطلع عين اهلك وتصرف عليه دم قلبك

طب وليه وجع القلب .. انا اجيب عيال من اللي مبيكبروش دووول

واقعد ادلعهم والعب بيهم  … ولو فكروا يكبروا هقتلهم

هاهاهاهاها

طب وربنا وحش مفترس

كفاية كده بقى احسن انا هيست اوووووي

وهيبتدي يطلع مني كلام .. ملوش اي علاقة بالواقع الذي نحن بصدده الان والذي هو …؟

بس بس بس .. خلص .. قوم نام يا حبيبي الساعة 8 الصبح قوووم

طيب خلاص .. صباح الخير عليكم بقى

دعواتكم الله يكرمكم .. احسن انا اليومين دوول مش بيجيلي نووم خالص

ولما بنام بشوف حاجات غريبة والله يا جدع

يمكن من الحر .. اه هو الحر .. الحر بيعمل اكتر من كده والله

يالا .. ربنا يسترها عليا

….

اه صحيح .. ” كل سنة وانتوا طيبين ” بمناسبة النصف من شعبان

الحقوا جهزوا نفسكم بقى علشان رمضان خلاص قرب

يالا .. اشوفكم بخير ان شاء الله

في البوستاية الجاية

” سلاااام “

انا نجحت يا جدعاااان

السلام عليكم ورحمة الله وبركاته

ازيكم يا بشر

ايه اخبار اﻻجازة معاكم .. يارب الناس كلها تكون مستريحة وبيصيفوا كده

ومأنتخين ديايما علطووول

المهم ادخل في الموضوع اللي انا جاي اتكلم فيه

انا بحمد الله دلوقتي بتدرب في اسكندرية في شركة الحمد لله

مستواها كويس .. والناس اللي بتعامل معاهم بحمد الله ليهم سمعة كويسة

ودا يشرفني اني بشتغل معاهم

طبيعة الشغل حاليا .. يعني بتعلم حبة في الصيانة والهاردوير .. بس دي مش الوظيفة اﻻساسية

الوظيفة اﻻساسية .. هبقى اقوول عليها بعدين ان شاء الله

لما يجي وقتها

المهم …. يوم السبت اللي فات اللي هو  5- 7 – 2009

كان المفروض اني اسافر اسكندرية علشان نبدأ الشغل

لكن اتأجل السفر ليوم اﻻحد .. قولت قشطة احضر الهاكرز ديو يوم السبت

واﻻحد ابقى في اسكندرية

مسافر يوم اﻻحد وانا لسه بقول يا هادي في السفر ووصلت قدام محطة دمنهور

اﻻقي التليفون بيرن ترن ترن ترن

اﻻقي واحد حبيبي اوووي

اسمه بودي .. يعني عبدالله سعيد

بين قوسين … معلمي .. ودي بتاعته بس على فكرة

حقوق الطبع محفوظة لبودي ابن الحاج سعيد … وهو اول واحد يقولهالي

قشطة كده يا معلمي ؟؟

….

الو  … (انا في دمنهور والشنطة مطلعة عيني) .. ايوا يا عبدالله ازيك

بودي : اسلام انت فين ؟؟

انا في دمنهور .. مسافر اسكندرية .. خير ؟؟

بودي : يا خسارة (اكيد كان مفكر اني هحضر اليوم التاني للهاكرز) .. اصلي جبتلك النتيجة

!!

يا راجل ؟؟ طب ايه بقى ؟؟ هيا ظهرت على النت ؟؟

بودي : ﻻ انا روحت للدكتور علاء رياض وجبتهالك

طب قوول يا عبدالله … في مواد ؟؟

بودي : للاسف … (نهارك مش معدي هقتلك يا عبدالله لو في مواد) للاسف يا اسلام .. طلعت نضييييف

!!!

طبعا انا كنت ماسك الشنطة بإيدي وواقف متنح على السلم اللي بينزل للمحطة

ومستني الكلمة تطلع من عبدالله

اول ما قال للاسف .. الشنطة وقعت من ايدي .. قولت بس .. هتبقى زي كل سنة

لكن لما كمل الكلمة .. عارفين زي ما الواحد يكون مستني حاجة تحصل بفارغ الصبر

وتحصل .. او واحد مستني نتيجة الثانوية العامة ونفسه يدخل طب او كلية البترول دي

ويجيب النتيجة اللي هو عايزها بقى

….

طبعا عبدالله بيه .. كان بيلعب بأعصابي.. اصل انا اعصابي ناقصة

انا حاسس ان على ما اتخرج هيكون جالي شلل رعاش .. وشلل اطفال

طبعا انا مش مصدق .. فقولتله بجد يا عبدالله ؟؟

قالي اه يا عم .. وسمعت صوت الرجالة بيقولولي مبرووووك يا اهلاوووووي

Yeaaaaaaaaah

انا طلع مني صوت تقريبا الراجل رئيس المحطة وعساكر امن المحطة والناس اللي مستنيه القطر سمعوه

طبعا عبدالله بيه .. اللي كان بيلعب بأعصابي .. ربنا نجاه مني بصراحة يعني

لو كان قدامي كنت هقتله واسلم نفسي

المهم طبعا .. برضه عبدالله بيه معزووم .. عندي في البيت طبعا

ﻻني قولتهاله في التليفون .. ومينفعش ارجع في كلمتي

انت معزووم على اكلة محشي من بتاعت 513 يا عبدالله

فاكرها ياض ؟؟ والعزومة اون ﻻين اهو .. وفضايح بفضايح بقى

وبقوول عبدالله بس .. يعني مش اقول عبدالله .. اﻻقي اتوبيس الهرم جاي من المنصورة

وواقفين قدام البيت وبيقولوا عايزين محشي

المهم بعد اما قفلت مع عبدالله .. كان نفسي اركب القطر التاني واروح المنصورة

والله كنت هعملها .. بس افتكرت ان في شغل

نزلت بقى .. ورايح اقطع تذاكر .. وانا بقول في نفسي

اخيرااا … اخيرااا يا اسلام … جه اليوم الموعود

انا نجحححححححححححححححححححححت

نجححححححت يا جدعااااااااااان

ونضيييييييييييييييييف

اخيرااا … مش هيتكتبلي مستجد نخلف في الكرنيه اللي كنت مفضوح بيه ده

” الحــــمــــد لله “

اول ما وصلت الشركة روحت مشغلهم عبدالحليم

وحياة قلبي وافراحه .. والناجح -اللي هو انا طبعا- يرفع ايده .. هيييييييييييييييييييه

…

طبعا دي فرحة كنت مستنيها من زمااااااااان

والحمد لله يااارب انها جات قبل ما امووت .. احسن انا كنت حاسس انها مش هتيجي

والفرحة دي فرحتها برضه

هوندا

وانا فاكر يوميها .. انا كنت فرحان جدااا

ﻻني حاسس بمرارة مستجد تخلف على الكارنيه

وناس كتييير تانيين جربوا الفرحة دي

…

اخيراااا .. هشطبب عليها في الــ

Wish List

بتاعتي .. وهكتب جمبها انتهت سنة 2009

طبعا اول ما عرفوا في البيت .. وهات يا زغاريد .. متقولش الواد اخد اعفاء من الجيش

ولا بيتجوز لا سمح الله

بس انا عارف احساسهم .. اول مرة نضيف يا جدعاااان

برضه دي ليها طعم تاني خااالص

عموما .. اهي دي انا كنت مستنيها من زمان اني انجح نضيف دي

والحمد لله انها جات

وان شاء الله مواضيع كتير ترجع تتفتح تاني

وان شاء الله يبقى في اخبار حلوة …. ياااااااارب

ادعولي يا جدعان … الله يكرمكم

احسن الواحد اليومين دوول حاسس اني داخل على منعطف تاريخي

وهو اني نفسي انزل البحر ومش عارف

والله البحر قريب من الشقة .. بس والله مفيش وقت انزل الميه

محدش معاه مايوه زيادة

عايز ارجع بيتنا بقى … عايز اشوفهم عاملين ازاي بعد الخبر ده

اكيد اكيد .. هلاقيهم معلقين انوار على البيت

واخويا الصغير الاقيه مشغل

ونجحنا كله يرقص .. وفرحنا كله يرقص

هو اينعم النتيجة محجوبة لعدم سداد رسوم مواد التخلف اللي انا دفعتها

وامتحنت فيها

وتقريبا انا من اول الناس اللي دفعتها .. علشان اشتراك القطر وعلشان المدينة

بس عالم متخلفة .. الله يسهلهم بقى

انا اتصلت بيهم وادتهم كلمتين حلوين (كأني مكنتش عارفها بقى) وعرفت التقديرات وقفلت على كده

بس المهم اني طلعت غلي (اني مش شايف النتيجة) عليهم

المهم ان انا فرحاااااااااان .. وابويا كمان فرحان .. وزمان جوز خالني هو كمان فرحان

والعيلة كلها فرحان

واييييييييييه … انت بتقول ايييييييييييه ؟؟

مبقولش حاجة يا سيدي

انا كل اللي بقوله

الحمد لله الذي هدانا لهذا .. وما كنا لنهتدي لولا ان هدانا الله

بجد … شكرا لكل الناس اللي دعولي من قلبهم اني انجح السنة دي نضيف

وتتردلكم في اﻻفراح ان شاء الله .. او في اي مناسبة حلوة ليكم

بس اعزموني بس

وشكرا للرجالة اللي بيقفوا جمبي هنا في اسكندرية

والناس اللي حجزوا الدومين بتاعهم اسلام بيه

Hunikal

مبروووووووووك يا صاحبي

عقبال كده هبقى اما احط اللينك على الجديد بقى

وانا نجحححححححت يا جدعااااااااان

اه .. كنت هنسى

…

…

وعقبال كل اللي نتيجته لسه مظهرتش تظهر على خير

ويااارب ينجح هو كمان ونضيف ان شاء الله

الـــحمــد للــه

سلام

Happy birth day to me

السلام عليكم ورحمة الله وبركاته

كمان شوية الساعة هتبقى 12

لا يا رجل ؟؟ بجد ؟؟ تصدق مكنتش هعرفها لوحدي دي ؟؟

بقولك ايه .. واخد بالك انك كل مرة برضه تيجي في اليوم ده وتغلس عليا بدوون سبب كده

فاكر المرة اللي فاتت .. برضه غلست عليا ومخلتنيش اقووول اللي انا عايزه

بس البوست اللي فات حاجة .. والمرة دي حاجة تانية

امشي اطلع بره ياااض

النهاردة بقى .. او بمعنى اصح كمان شوية يعني  .. بعد اما تيجي 12 كده

يعني بالظبط يوم

” 21 – 6 – 2009 ”

هكمل الــ 20 سنة ان شاء الله

ياااااااااه .. الواحد بقاله 20 سنة عايش .. كتير برضه يا جدع

عموما

“ Happy Birth Day To Me “

واديني بقولها لنفسي اهو

كل سنة وانت طيب يا واد يا اهلاوي .. كل سنة وانت لوحدك ياض يا اسلام

زي اليوم ده السنة اللي فاتت .. كنت احسن من اليوم ده السنة دي

بس الحمد لله على كل شئ

وان شاء الله السنة الجاية تكون حققت اللي انت عايزة .. مش كده برضه ؟؟

وان شاء الله السنة الجاية تقدر تتخطى المحنات والازمات اللي انت فيها .. وتعمل حاجة احسن من اللي كان نفسك تعملها قبل كده … بإذن الله

هع

انا اللي طفيت الشمع اللي موجود في التورتة .. لوحدي برضه على فكرة

علشان انا بحتفل بعيد ميلادي النهاردة … انا والكمبيوتر والمدونة بتاعتي وبس

احنا الـ 3 بس .. حلوين اوي كده

ومش عايز حد تاني يوجع دماغي

واي حاجة هتوجع دماغي تاني … انا مش عايزها ابدااا

الكلام مفهوم … ؟؟

حتى لو مش مفهوم مش مشكلة .. متحطش في دماغك

المهم دلــوقتي إن انا عايز اقووول شوية حاجات انتظم عليها وعايزكم تدعولي اني انفذها

و الحاجات دي هخططها في دماغي كده وهتترسم .. ان شاء الله

وممكن تلاقوا “حسن شحاته” بيلعب بيها الماتش الجاي

وان شاء الله دي تبقى ” اهداف ” الواحد وهو في سن الــ 20 … ان شاء الله

نبدأ .. بسم الله

1. عايز انتظم في صلاة الفجر كل يوم في الجامع ان شاء الله .. ولحد اما اموت بإذن الله
2. احاول اكتر واكتر .. اني اخاطب الناس على قدر عقولهم
3. احاول اسيطر على نفسي شويتين زيادة .. لان بسبب شوية حزن صغيرين انا كنت هضيع نفسي … يالا الحمد لله ان الفترة دي عدت على خير .. وربنا يستر على اللي جاي
4. برضه احاول اسيطر على نفسي .. علشان مفيش حاجة في الدنيا تستاهل ان الواحد يزعل علشانها حتى لو كنت فاكر ان الحاجة دي .. اغلى حاجة عندك .. مسير الايام تعلمك ان مفيش حاجة اسمها غالية عندك
5. عايز اتعلم بايثون .. نظرا لان حصلت شوية ظروف قهرية .. منعتي اني ابدأ الكورس مع باشمهندس احمد سليمان .. فا هـحاول اتعلمها لوحدي ان شاء الله .. وقريب جدااا .. بإذن الله
6. عايز اكمل مشوار الجافا .. نفسي اكمل في سكة الــ web component “JSP” بس اعتقد ان دي مش هتبقى دلوقتي خااالص .. ممكن بعدين بعد اما اخلص تدريب … ادعولي اخلصه على خير ان شاء الله

بس خلاص ده كل اللي انا كنت عايز اقوله .. وربنا يوفقني اني انفذ اللي قولت عليه

ياااااااااارب

….

دعواتكم معايا يا بشر .. البوست دي غم شوية معلش

بس والله دا مش حاجة من اللي انا فيه دلوقتي .. معلش سامحوني

ويارب فك كرب كل مهموم يااااااارب

خدوا بالكوا من نفسكوا كويس .. ومتخلوش في اي زعل ما بينكم .. ومتخلوش الزعل يأثر عليكم

واقعدوا من غير زعل .. ان شاء الله

سلااااام

Egypt VS Italy

السلام عليكم ورحمة الله وبركاته

ازيكم يا بشر

النهاردة انا داخل اعتذر لانسان انا بحبه جدااا .. وبحترمه جدااا .. وكنت قولت عليه كلام مش حلو

النهاردة انا داخل اعتذر لـعصام الحضري … وارقص يا حضري

بجد بجد انا فرحان ان الحضري رجع لمستواه الحقيقي تاااني الحمد لله .. ربنا يحميك يا حضري

الحضري امبارح خلى اللاعيبة بتوع ايطاليا واقفين مذهولين

وخلى المدرب بتاعهم باصص للملعب كأن حد ضربه على قفاه وطلع يجري

الراجل بقى باصص للحضري وهو بيصد .. واقف مذبهل .. ويقول في نفسه

بقى ده اللي انا كنت بقول لو كان في حارس غيره كانت مصر فازت على البرازيل ؟؟

بقى ده اللي انا كنت معتبره نقطة ضعف المنتخب المصري ؟؟

الحمد لله … اللاعيبة كلهم كانوا رجالة امبارح .. والواد شوقي وحسني

والفنان ابوتريكة اكتر واحد جرى في الملعب امبارح والله

وحمص حمص حمص ……. يا حلاوة

الواد ده يا جدعااان … راجل راجل راجل .. كان شايل خط النص امبارح

وجاب الجون .. وكان بيدافع .. بجد بجد راجل

….

….

الراجل المعلق بتاع قناة

ART

صواته راح خالص … وانا كنت هتشل في اخر خمس دقايق اللي الحكم ضافهم في الاخر

كأنهم مستكترين علينا اننا نفوز ؟؟

هو حرام نفوز يا جدعاااان ؟؟

بس مش مهم … المهم ان انا فرحان .. والواد اخويا الصغير فرحان .. وابويا فرحان .. وجوز خالتي كمان فرحان .. واوووووووووو مصراووووووي

بجد بجد .. انا مش مصدق اننا كسبنا .. وكسبنا مييييين ؟؟

ايطاليا … ايطاليا يا جدعااااااااااااااان

كسبنا حامل اللقب … قال حامل اللقب قال … يروحوا يشوفوا اي حاجة تانية يحملوها بقى

محنا خلاص .. علـمـنا علـيــهم

واوووو مصراووووي

” ايه يا جدعان هنقضيها تشجيع بس ولا ايه ؟؟ كله يقول معايا .. اهم اهم اهم .. المصريين اهم “

انا مش مصدق يا جدعان ان جه اليوم والواحد شاف مصر كسبانه .. ومعلمه على ايطاليا

ياااااه .. الحمد لله فعلا

….

برضه .. الناس عمرها ما هتنسى اليوم ده

18 – 6 – 2009

انا بيتهيألي .. الناس عمرها ما هتنسى شهر 6 سنة 2009 ابدااااا

يالا .. ربنا يجعل ايامنا كلها افراح

قولوا … ااامين

و بعيدا عن كل الاحداث المؤسفة .. وعن كل التطورات اللي بتحصل -عندي- وفي المنطقة بأكملها

بس انا فرحان واخويا الصغير فرحان وابويا كمان فرحان …. واووووو مصراووووووي

سلاااام

elahlawy

Ubuntu and Egypt

السلام عليكم ورحمة الله وبركاته

ازيكم يا قوم .. ايش احوالكم

اليكم بقى اخر الانـبـاء

الاول

بحمد الله وصلت الابنتو 9.04 بسلامة الله الى ارض الوطن امس 15 -6-2009 في الساعة 11:55 صباحا

بتوقيت بيتنا برصه

وكالعادة صورتها ورفعتهالكم اهو

..

…

بجد الناس دووول بيعملوا حاجات روعة روعة

ربنا يوفقهم كمان وكمان

I Love Ubuntu .. Do you Love it ?

….

الخبر الثاني

احب ابارك لمنتخبنا الوطني اللي شرفنا الحمد لله ورفعوا راسنا قدام البرازيل

..

الهدف الاول

…

الهدفين الثاني والثالث

…

بجد بجد انا كنت متوقع اننا هنشيل من 6 لحد 12 .. مش عارف ليه ؟؟

وكان عندي امل ضعيف اننا نجيب جون الشرف

بس بجد بجد الحمد لله فعلا … اللاعيبة بتوعنا كانوا بيلعبوا رجالة في الملعب .. الا واحد بس اللي بيقف في الجون

مـا عليــنا منه .. علشان كل اما بتيجي سيرته بتنرفز

انا نفسي افهم .. هو حسن شحاته سايبه ليه ؟؟ … المفروض بعد ماتش الجزاير كان يرجعه بيتهم مع عمرو زكي

انا مش فاهم سر حب حسن شحاته للحضري .. والتاني اللي اسمه اوكا ده

بس الحق يقال .. اوكا الحمد لله لعب كويس شوية عن ماتش الجزاير .. دول فضحونا هناك يا عم

يالا .. الحمد لله انهم لعبوا كده .. انا فرحان جدااا جدااا ان ده لعب منتخبنا .. منتخب مصر

15-6-2009

التاريخ ده الناس هتفضل فاكراه طوول العمر .. والماتش ده الناس هتفضل تحكي وتتحاكى بيه لمدة 60 سنة قدام

ونقعد نحكي لعيالنا كده .. ونقولهم فين ايام زمااان .. ايام محمد شوقي كانت الكورة تخرج من رجلة عارفة طريقها للجون .. و محمد زيدان اللي كانت الكورة بتخرج من راسه زي المسطرة في الجون .. والفنان ابوتريكة اللي كان بيلعب وبيجري ولا كأنه عنده 20 سنة .. وكان بيرأس بتوع البرازيل كده وهما واقفين بيتفرجوا عليه

يااااااااه

ومش بعيد في يوم من الايام .. يجي ابني ويقعد على الجهاز ده .. لا لا ان شاء الله انا مش هعرفه اصلا ان كان في اجهزة بالشلل ده زي اجهزتنا

ممكن في يوم من الايام يجي ابني ويقعد يقرأ الحاجات اللي انا كاتبها دي .. ويقول ياااه يا بابا .. انت كنت بتشجع مصر اوووي كده .. على كده انت كنت بتحبها ولا ايام الماتشات بس ؟؟

طب … انا هشجع البرازيل بالعند فيك بقى

وانا اقعد اجري وراه في الشقة … واقوله تعالى يالا يا ابن ال .. تيييييييييييييت .. شجع بلدك ياااض

احــم احـــم

ايه يا عم متسيبني احلم شوية يا جدع .. دا انت غلس صحيح

” ايه يا جدعاااان … هنقضيها فرجة بس ولا ايه ؟؟ … واهم اهم اهم … المصريين اهم “

و اااووووووووووو مصراووووووي

….

ثالثا بقى وده الاهم

اليومين دوول انا تعبان شويتين -صحيا ومحدش يعرف على فكرة ومحدش حاسس بحاجة  .. متقولوش لحد بقى- وبجد انا محتاجلكم ؟؟

محتاج منكم … تدعولي ان ربنا يعدي اليومين الجايين دوول على خير

وحاجة كمان … ادعولي ان ربنا يوفقني واقدر اعمل حاجة في الاجازة دي

احسن انا مش عارف هيا مقفلة معايا ليه كده

بجد بجد دعواتكم ليا

خدوا بالكم من نفسكم .. وكل واحد يحرص على نفسه اليومين دوول

اقعدوا بالعافية

سلام