انا نجحت يا جدعاااان

Posted: July 9, 2009 in Hasebat ... FCI
Tags:

السلام عليكم ورحمة الله وبركاته

ازيكم يا بشر

ايه اخبار اﻻجازة معاكم .. يارب الناس كلها تكون مستريحة وبيصيفوا كده

ومأنتخين ديايما علطووول

المهم ادخل في الموضوع اللي انا جاي اتكلم فيه

انا بحمد الله دلوقتي بتدرب في اسكندرية في شركة الحمد لله

مستواها كويس .. والناس اللي بتعامل معاهم بحمد الله ليهم سمعة كويسة

ودا يشرفني اني بشتغل معاهم

طبيعة الشغل حاليا .. يعني بتعلم حبة في الصيانة والهاردوير .. بس دي مش الوظيفة اﻻساسية

الوظيفة اﻻساسية .. هبقى اقوول عليها بعدين ان شاء الله

لما يجي وقتها

المهم …. يوم السبت اللي فات اللي هو  5- 7 – 2009

كان المفروض اني اسافر اسكندرية علشان نبدأ الشغل

لكن اتأجل السفر ليوم اﻻحد .. قولت قشطة احضر الهاكرز ديو يوم السبت

واﻻحد ابقى في اسكندرية

مسافر يوم اﻻحد وانا لسه بقول يا هادي في السفر ووصلت قدام محطة دمنهور

اﻻقي التليفون بيرن ترن ترن ترن

اﻻقي واحد حبيبي اوووي

اسمه بودي .. يعني عبدالله سعيد

بين قوسين … معلمي .. ودي بتاعته بس على فكرة

حقوق الطبع محفوظة لبودي ابن الحاج سعيد … وهو اول واحد يقولهالي

قشطة كده يا معلمي ؟؟

….

الو  … (انا في دمنهور والشنطة مطلعة عيني) .. ايوا يا عبدالله ازيك

بودي : اسلام انت فين ؟؟

انا في دمنهور .. مسافر اسكندرية .. خير ؟؟

بودي : يا خسارة (اكيد كان مفكر اني هحضر اليوم التاني للهاكرز) .. اصلي جبتلك النتيجة

!!

يا راجل ؟؟ طب ايه بقى ؟؟ هيا ظهرت على النت ؟؟

بودي : ﻻ انا روحت للدكتور علاء رياض وجبتهالك

طب قوول يا عبدالله … في مواد ؟؟

بودي : للاسف … (نهارك مش معدي هقتلك يا عبدالله لو في مواد) للاسف يا اسلام .. طلعت نضييييف

!!!

طبعا انا كنت ماسك الشنطة بإيدي وواقف متنح على السلم اللي بينزل للمحطة

ومستني الكلمة تطلع من عبدالله

اول ما قال للاسف .. الشنطة وقعت من ايدي .. قولت بس .. هتبقى زي كل سنة

لكن لما كمل الكلمة .. عارفين زي ما الواحد يكون مستني حاجة تحصل بفارغ الصبر

وتحصل .. او واحد مستني نتيجة الثانوية العامة ونفسه يدخل طب او كلية البترول دي

ويجيب النتيجة اللي هو عايزها بقى

….

طبعا عبدالله بيه .. كان بيلعب بأعصابي.. اصل انا اعصابي ناقصة

انا حاسس ان على ما اتخرج هيكون جالي شلل رعاش .. وشلل اطفال

طبعا انا مش مصدق .. فقولتله بجد يا عبدالله ؟؟

قالي اه يا عم .. وسمعت صوت الرجالة بيقولولي مبرووووك يا اهلاوووووي

Yeaaaaaaaaah

انا طلع مني صوت تقريبا الراجل رئيس المحطة وعساكر امن المحطة والناس اللي مستنيه القطر سمعوه

طبعا عبدالله بيه .. اللي كان بيلعب بأعصابي .. ربنا نجاه مني بصراحة يعني

لو كان قدامي كنت هقتله واسلم نفسي

المهم طبعا .. برضه عبدالله بيه معزووم .. عندي في البيت طبعا

ﻻني قولتهاله في التليفون .. ومينفعش ارجع في كلمتي

انت معزووم على اكلة محشي من بتاعت 513 يا عبدالله

فاكرها ياض ؟؟ والعزومة اون ﻻين اهو .. وفضايح بفضايح بقى

وبقوول عبدالله بس .. يعني مش اقول عبدالله .. اﻻقي اتوبيس الهرم جاي من المنصورة

وواقفين قدام البيت وبيقولوا عايزين محشي

المهم بعد اما قفلت مع عبدالله .. كان نفسي اركب القطر التاني واروح المنصورة

والله كنت هعملها .. بس افتكرت ان في شغل

نزلت بقى .. ورايح اقطع تذاكر .. وانا بقول في نفسي

اخيرااا اخيرااا يا اسلام … جه اليوم الموعود

انا نجحححححححححححححححححححححت

نجححححححت يا جدعااااااااااان

ونضيييييييييييييييييف

اخيرااا … مش هيتكتبلي مستجد نخلف في الكرنيه اللي كنت مفضوح بيه ده

الحــــمــــد لله

اول ما وصلت الشركة روحت مشغلهم عبدالحليم

وحياة قلبي وافراحه .. والناجح –اللي هو انا طبعا– يرفع ايده .. هيييييييييييييييييييه

طبعا دي فرحة كنت مستنيها من زمااااااااان

والحمد لله يااارب انها جات قبل ما امووت .. احسن انا كنت حاسس انها مش هتيجي

والفرحة دي فرحتها برضه

هوندا

وانا فاكر يوميها .. انا كنت فرحان جدااا

ﻻني حاسس بمرارة مستجد تخلف على الكارنيه

وناس كتييير تانيين جربوا الفرحة دي

اخيراااا .. هشطبب عليها في الــ

Wish List

بتاعتي .. وهكتب جمبها انتهت سنة 2009

طبعا اول ما عرفوا في البيت .. وهات يا زغاريد .. متقولش الواد اخد اعفاء من الجيش

ولا بيتجوز لا سمح الله

بس انا عارف احساسهم .. اول مرة نضيف يا جدعاااان

برضه دي ليها طعم تاني خااالص

عموما .. اهي دي انا كنت مستنيها من زمان اني انجح نضيف دي

والحمد لله انها جات

وان شاء الله مواضيع كتير ترجع تتفتح تاني

وان شاء الله يبقى في اخبار حلوة …. ياااااااارب

ادعولي يا جدعان … الله يكرمكم

احسن الواحد اليومين دوول حاسس اني داخل على منعطف تاريخي

وهو اني نفسي انزل البحر ومش عارف

والله البحر قريب من الشقة .. بس والله مفيش وقت انزل الميه

محدش معاه مايوه زيادة

عايز ارجع بيتنا بقى … عايز اشوفهم عاملين ازاي بعد الخبر ده

اكيد اكيد .. هلاقيهم معلقين انوار على البيت

واخويا الصغير الاقيه مشغل

ونجحنا كله يرقص .. وفرحنا كله يرقص

هو اينعم النتيجة محجوبة لعدم سداد رسوم مواد التخلف اللي انا دفعتها

وامتحنت فيها

وتقريبا انا من اول الناس اللي دفعتها .. علشان اشتراك القطر وعلشان المدينة

بس عالم متخلفة .. الله يسهلهم بقى

انا اتصلت بيهم وادتهم كلمتين حلوين (كأني مكنتش عارفها بقى) وعرفت التقديرات وقفلت على كده

بس المهم اني طلعت غلي (اني مش شايف النتيجة) عليهم

المهم ان انا فرحاااااااااان .. وابويا كمان فرحان .. وزمان جوز خالني هو كمان فرحان

والعيلة كلها فرحان

واييييييييييه … انت بتقول ايييييييييييه ؟؟

مبقولش حاجة يا سيدي

انا كل اللي بقوله

الحمد لله الذي هدانا لهذا .. وما كنا لنهتدي لولا ان هدانا الله

🙂

بجد … شكرا لكل الناس اللي دعولي من قلبهم اني انجح السنة دي نضيف

وتتردلكم في اﻻفراح ان شاء الله .. او في اي مناسبة حلوة ليكم

بس اعزموني بس

وشكرا للرجالة اللي بيقفوا جمبي هنا في اسكندرية

والناس اللي حجزوا الدومين بتاعهم اسلام بيه

Hunikal

مبروووووووووك يا صاحبي

عقبال كده هبقى اما احط اللينك على الجديد بقى

🙂

وانا نجحححححححت يا جدعااااااااان

اه .. كنت هنسى

images

وعقبال كل اللي نتيجته لسه مظهرتش تظهر على خير

ويااارب ينجح هو كمان ونضيف ان شاء الله

الـــحمــد للــه

سلام

Comments
  1. SimbaGirl says:

    Congratulation

  2. dodo610 says:

    والله وعملتها
    الف مبروك يا برنس

    • elahlawy says:

      والله وعملوها الرجالة ورفعوا راس مصر بلدنا🙂
      عملتها يا عم ضياء😆
      الله يبارك فيك يا حبي

  3. مبرووووووووووووووك يا اسلام بيك
    تصدق انت واد تيت انا حاجز عزومة المحشى من ايام 513 وكمان انا كنت جمب بودى
    انا معزوم اجبارى😛

    مبروك يا صديكى وعقبال التخرج ان شاء الله

    • elahlawy says:

      الله يبارك فيك يا ميتو يا حبي
      يا ميتو باشا انت تيجي من غير عزومة
      طب خلاص ابقى تعالى يا عم🙂
      وادام هيا اجباري بقى يبقى
      تيجي برضه يا جميل😀
      الله يبارك فيك يا صاحبي

  4. taitos says:

    الف مبروك ياماااااااااااااان

  5. Ahmed Samir says:

    ههههههههههههه ايه عبد الله بس دي !!!!
    امال انا اذا ماكنتش واقف جمب عبدالله وهو بيقولك وقولتلك مبغووووك كمان 😆😆😆
    1000 مبروووووووووووووووووووووووووووووووووووووووك يا اهلاوي
    والله فرحتلك ياجدع وانا قولت للعيال ساعتها هتلاقي الاهلاوي هيشطبها من الويش ليست بتاعته😉
    وربنا يوفقك يا “معلمي ” وتولعها الصيف ده ان شاااااء الله😀
    وعقبال السنه الجايه والبكالوريا والمشروع والجيش وااااااااااااااايه دي هتبقى هيصه والله😆
    حبيبي يا اهلاوي والله هات بوسه😀

    • elahlawy says:

      خلاص يا احمد والله .. تعالى مع عبدالله
      مش انا قولت .. هيجيبوا اتوبيس😆
      الله يبارك فيك يا حبي .. واكيد طبعا شيلتها من الويش ليست كمان😆
      مقولنا معلمي بتاعت عبدالله بس😀
      ايه يا عم دا كله .. طب قول نخلص الاجازة دي على خير
      ويكون الواحد عمل اللي هو عايزه .. وبعدين نقوول مفيش جيش ان شاء الله
      علطوول كده😀
      والله انت كمان حبيبي يا ابو سامية
      خد دي
      امواااااااااااااااااااااااااااااااااه😀

  6. MMF says:

    Congratualtion Islam

  7. BooDy says:

    الف مبروك يا معلمي😀😀

    الاتوبيس الأول اكتمل خلاص … شكلنا هنحتاج اتوبيس تاني كده😛

    والله فرحتلك جدا لما عرفت نتيجتك🙂
    حتى الراجل استغرب لما لقاني فرحان كده😀

    تصحيح بسيط …
    انا جبت النتيجة من الشئون مش من دكتر علاء😀

    اهم حاجة انك للأسف …

    نجحت😀

    • elahlawy says:

      الله يبارك فيك يا بودي يا حبيبي
      اتوبيسين ؟؟
      طب عارفين العنوان ؟؟
      هع هع هع هع هع هع😆
      افرحلك .. يوم فرحك يا عبدالله يابن الحاج سعيد
      قووول يااااارب🙂
      من دكتر علاء او من الشئون مش فارقة
      المهم انك انت اللي جبتها يا جميل😀
      وللاسف تاني برضه ؟؟
      شكلك عايز تنضرب😆

  8. H0s4m says:

    ألف مبروك يا معلم
    أنا أول مرة أعلق في المدونة صراحة بس متابع جيد ليك لإنه اسلوبك في الكلام كويس جداً وحلو🙂

    بس كان عندي سؤال دلوقتي انا عايز اروح دورة في اسكندرية انا من اسكندرية علي فكرة بس مش لاقي مركز مستواه عالي في php و css

    تعرف تفيدني بما إنك من حاسبات ومعلومات أظن ؟؟

    • elahlawy says:

      الله يبارك فيك يا حسام
      نورت البلوج .. ويارب دايما يكون عاجبك علطووول ان شاء الله🙂
      كفاية كده احسن اتغر ولا حاجة😆
      انا اعرف مركز تدريب في اسكندرية حلو اوووي ومشهور جداا واعتقد انك عارفه كمان
      1
      نيو هورايزون … المكان : رشدي الترام – الديب مول الدور العاشر .. وفي المركز الرئيسي جمبهم فيلا كده برضه .. جمب البنك الاهلي تقريبا رشدي برضه
      بصراحة دوول اعلى مستوى في اسكندرية .. بس اسعارهم عالية شوية وممكن تلاقي خصومات هناك — روح وشوف برضه🙂
      2
      الاكاديمية البحرية – ميامي – هناك برضه الناس جامدين ومستواهم كويس
      والسمعة حلوة برضه .. الاسعار بقى اول ما تدخل هتلاقي ناس هناك هيقولولك على كل حاجة🙂
      لو معجبكش الكلام ده قووول – وانا اشوفلك غيره

      ولو عايز حاجة في المنصورة – انا ممكن ادلك على ناس جامدة جدااا
      بس انت تقشر😀
      واي خدمة يا معلم … وايون انا حاسوباتي -من حاسبات يعني- جامعة المنصورة🙂
      نورت البلوج يا باشا

  9. key of life says:

    ألف مبروك يا بشمهندس علي النجاح الحلو دا
    وعقبال السنة الي جايه والتخرج إن شاء الله
    سلام

  10. Hunikal says:

    مبرووووووووووووووووووك🙂

  11. My Fate says:

    ياااه الواحد اتاخر
    بس ألف مبروك والله الواحد فرح فعلا
    وعقبال باقى الويش ليست
    ويا رب يفضل البلوج منور بحاجات مفرحة على طوووول
    ده بس عشان شهر 7 ده شهر عظيم🙂
    سلاااااااام

  12. elahlawy says:

    وﻻ تاخير ولا حاجة تنوري في اي وقت يا
    my fate
    الله يبارك فيكي .. وان شاء الله نفرحلك في اي مناسبة سعيدة ان شاء الله🙂

    وعقبال باقى الويش ليست
    ويا رب يفضل البلوج منور بحاجات مفرحة على طوووول

    ااااااامين ياااااااااااااارب
    حلوة اووي الدعوة دي … شكراااا جدااا🙂
    انا بحب شهر سبعة بس مش في كل السنين
    بس السنة دي لازم يتحب علشان الاخبار الحلوة دي .. ولانه بعد شهر 6 اللي فيه عيد ميلادي .. فعلشان كده ساعات مبحبوش😆
    نورتي يا فندم🙂

  13. My Fate says:

    هههههههه
    لنفس السبب ده بأكره شهر 8
    عشان بيخلص شهر 7 اللى فيه عيد ميلادي😀
    كويس أن طلع فيه ناس تانية كده🙂
    بس على طول شهر 7 حلو طبعا🙂

  14. Mohamed says:

    الف مبروك يا باشا وعقبال الناس كلها ان شاء الله
    بالتوفيق

  15. هوندا says:

    الف مبروك عقبال التخرج🙂

  16. mna says:

    الاول الف مبروك ويارب ديما من نجاح لنجاح

    انا كمان دافعة المصاريف وكاتبين كدا مش عارفة اعمل ايه

    هو حضرتك كلية ايه واتصلت بمين؟

    ياريت حضرتك ترد عليا بسرعة

    • elahlawy says:

      كلية حاسبات ومعلومات – جامعة المنصورة
      والموضوع ده كان السنة اللي فاتت🙂
      عموما هو انا اتصلت بشئون الطلبة وقالولي ان في خطأ عندهم وهيصلحوه
      وادوني النتيجة بتاعتي في التليفون
      بس🙂

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s