Come Back Again

Posted: August 6, 2009 in Uncategorized
Tags: ,

السلام عليكم ورحمة الله وبركاته

احـــم احـــم

يــــارب يـا ســـاتر .. كح  كح

سوري يا جماعة .. اصلي مدخلتش بقالي كتير فلازم اسلم على اهل الدار

يمكن الاقي حد عايش حياته هنا ولا حاجة

يا ساتر يارب .. ايه ده .. كل ده تراب

الغيبة المرة دي طولت اووي مش كده .. معلش والله حقكم عليا

بس مكنش في نت والله

حتى لما كنت بروح المكتبة –مكتبة اسكندرية– مكنتش بعرف اكتب حاجة

لدرجة زي ما انتوا شايفين كده .. التراب مالي الدنيا ومحدش كان بيدخل ينفض ولا ينضف اي حاجة خالص

بجد يا جدعان .. لو لقيتوني انقطعت كده مرة واحدة بدون سابق انذار

حد يتطوع ويبلغ المطافي

لا بجد .. حد يبقى يدخل يشقر على المدونة .. يفتح الشبابيك كده .. ويهويها .. بس مينساش وهو ماشي

يقفل الشبابيك تاني .. احسن ارجع ملاقيش الكنز اللي انا مخبيه هنا

كنز ايه يا عم انت حلتك حاجة

احـــم احــــم .. ايه يا عم .. الناس قاعدة يا سيدي بلاش فضايح

المهم … حصلت في الفترة الاخيرة حاجات جااامدة جدااا جدااا

وحاجات غريبة اووووي

بداية : من اننا اخدنا اجازة من الشركة لحد يوم  1 – 8 من ساعة اما حصل ميتج في الشركة مع الناس اللي هيشتغلوا اللي هما احنا

المهم اننا اخدنا اجازة تقريبا من يوم الخميس 9 – 7

علشان هنزاكر حاجات ونرجع تاني نتسأل فيها .. وهيبقى في شوية حاجات كده .. هقول عليها بعدين متخافوش

حلو الكلام

المهم … جيت يوم  13 – 7 – 2009 .. الناس كلها تفتكر التاريخ ده

وانا عمري ما هنساه طبعا

ايه يا عم  ؟؟ … مش تقول ايه اللي حصل ؟؟

اه صحيح … سوري نسيت … في اليوم ده انا شديت الرحال وروحت رايح  لــ “محبوبتي” اسكندرية طبعا

محدش يفهم غلط

المهم قابلت صاحبي .. اسلام .. وكان معانا الحاج ” ابويا ” ونازلين ناويين اننا نشتري

لاب توب

المهم لقينا شوية لابات حلوين .. شوية ايه دا احنا تقريبا لفينا البلد كلها على لابات .. لغاية اما استقرينا على ده

lenovo-3000-n500-laptop1

ايون هو ده

Lenovo … N 500

حاجة لسه نوكيا منزلتهاش .. لسه بدري عقبال اما تنزل من نوكيا

انا كنت حاطط عيني عليه من فترة قبلها .. على اساس اني ممكن الاقي حاجة احسن

بس كده حلو .. الحمد لله

المهم طبعا مبروك عليا .. بس انا طلع عيني في موضوع اللابات ده لحد اما كنت هتجن بسببهم

وشوفت لابات بالهبل .. واسعار هبل برضه .. لحد اما الحمد لله وقعت في ده

مبروك عليا

طبعا .. انا بعامله بإحترام شديد جدااا .. مهو بقى ابني الصغير

اللي بيسألني دلوقتي .. امال هو عامل ايه معاك

اقوله والله مغلبني .. ومحيرني معاه

بس الحمد لله … لحد دلوقتي بعامله بإحترام

يارب هو كمان يعاملني بإحترام دايما

مهو معدش فاضل بينك وبين لابك … إلا الاحترام … الاحتراااااااااام

احترم لابك وعامله كويس .. يحترمك ويقدرك

بصو بقى .. هو اسلام قالي هتفضل كده شهرين .. وبعدين هتعامله بالجزمة

لا … بقى

انا عمري ما  هعامله وحش .. واللي هيعامله وحش من اصحابي او اي حد هو حر

هقلبله على الوش التاني

….*….*….

المهم بقى … تاني حاجة حصلت … كانت في الاسبوع اللي بعده علطووول

اللي المفروض انا بزاكر فيه بقى

حضرت الشنطة .. اللي بتتعب معايا دي .. وروحت طالع على مطروح

يوم الاحد 19 – 7 – 2009

مع اصحابي

بودي .. واحمد مسعود .. واسلام .. وانا طبعا

بين قوسين تيم  513 بس في مطروح

كان فرح اخت  محمد السيد صاحبنا .. مبرووووك ياض

و ” عقبالي “ … قولوا يااااااارب

المهم … الواحد راح  وخطف 3 ايام من العمر .. واجمل 3 ايام والله

واحلى حاجة الرجالة صحابنا اللي كانوا هناك .. عملوا احلى واجب معانا والله

بجد انا روحت مناطق بجد اجمل مناطق شوفتها في حياتي .. بعيد عن اللي كان بيحصلي ساعتها

والبرد اللي كان مبهدلني .. مكنتش انا بس هو كلنا تقريبا كنا واخدين برد

بس الحمد لله … انا وعبدالله اللي كنا جايبين البرد معانا واحنا رايحين

الحمد لله مبنجبش حاجة من بره

بس بجد هناك على البحر تنسى نفسك  .. وتنسى البرد .. وتنسى كل حاجة

انا مكنتش متخيل انا في مناطق بالجمال ده .. سبحان الله فعلا

انا كنت متوقع ان الحاجات دي في التليفزيون بس .. مكنتش متخيل انها في الواقع كده بصراحة

الصور بتاعتي بقى اللي مصورها بموبايلي انا هتلاقوها ان شاء الله على فليكر او الفيس بوك

هتلاقوا اكترها مناظر طبيعية حلوة اوووي

….

المهم رجعنا .. وانا بصراحة من جوايا مكنتش عايز ارجع

بس قولت كفاية كده .. احسن ممكن الواحد يفلس هناك ولا حاجة

اضطر ارجع في القطر .. يا اما هرجع ماشي .. واللي بيركب القطر عندهم ده

يا اما بينزل منه ميت .. يا اما عنده شلل اطفال .. وفي كلا الحالتين مينفعش يتعملك عمرة تاني

….

رجعت تاني بقى للبيت والمزاكرة … افتكرت بقى اني المفروض ازاكر علشان هيبقى في حاجة زي امتحان كده

يوم 1 – 8 .. فاكرين محدش ينسى اليوم ده

اووووووف .. انا ايه اللي رجعني بس .. منا كنت هناك مستريح والعملية قشطة

كويس .. ازاكر بقى .. لا خليها بكرة

يجي بكرة .. اخ .. خليها بعدو .. وبكرة يجر بعده لغاية اما جه يوم  1 – 8 ده

اكيد دلوقتي ناس هتقول انت يوم  1 -8 – 2009 ده يوم تاريخي في حياتك

وانا بقول بجد

اليوم ده فعلا .. ” اصعب يوم ” عدى عليا في حياتي

هبقى احكي عليه بعدين .. لان تقريبا الناس اللي عملوا ورد بريس بيشتكوا مني

اني بكتب كتييير

بس بيسيبوني .. علشان بنظم في كتابة الكلام

بحاول اخلي اللي بيقرا ميزهقش .. ولا انتوا ايه رأيكم في الموضوع ده

؟؟

بجد ربنا يكون في عونكم ياللي بتقروا .. دا اذا كان في حد بيقرا اصلا

بكرة اجيب عيال .. واخليهم يقعدوا يقروا البوستات كلها كلمة كلمة .. حرف حرف

هخليهم يلبسوا نضارات وهما في كي جي وان

طب وانت هتجيب عيال من غير حب ولا جواز ؟؟

اه يا خفيف .. هجيبهم من غير حب ولا جواز .. احنا فاضيين لسه هنحب ونجيب ” دباديب ” .. ولسه ” هنتجوز “ .. ونقعد 9 شهور وبعدين يجيلك عيل

يقرفك ويطلع عين اهلك وتصرف عليه دم قلبك

طب وليه وجع القلب .. انا اجيب عيال من اللي مبيكبروش دووول

واقعد ادلعهم والعب بيهم  … ولو فكروا يكبروا هقتلهم

هاهاهاهاها

طب وربنا وحش مفترس

كفاية كده بقى احسن انا هيست اوووووي

وهيبتدي يطلع مني كلام .. ملوش اي علاقة بالواقع الذي نحن بصدده الان والذي هو …؟

بس بس بس .. خلص .. قوم نام يا حبيبي الساعة 8 الصبح قوووم

طيب خلاص .. صباح الخير عليكم بقى

دعواتكم الله يكرمكم .. احسن انا اليومين دوول مش بيجيلي نووم خالص

ولما بنام بشوف حاجات غريبة والله يا جدع

يمكن من الحر .. اه هو الحر .. الحر بيعمل اكتر من كده والله

يالا .. ربنا يسترها عليا

….

اه صحيح .. ” كل سنة وانتوا طيبين ” بمناسبة النصف من شعبان

الحقوا جهزوا نفسكم بقى علشان رمضان خلاص قرب

يالا .. اشوفكم بخير ان شاء الله

في البوستاية الجاية

سلاااام

Comments
  1. BooDy says:

    ألف مبروك على اللاب🙂

    و حمدلله على السلامة يا معلمي😀

  2. SimbaGirl says:

    welcome back
    ومبرووك على اللاب توب

    //
    يا خفيف .. هجيبهم من غير حب ولا جواز .. احنا فاضيين لسه هنحب ونجيب ” دباديب ” .. ولسه ” هنتجوز “ .. ونقعد 9 شهور وبعدين يجيلك عيل
    //
    طيب ربنا يكون فى عونك ياللى فى باالى😀

  3. Hunikal says:

    مش كفاية ان اسمك اسلام وكمان جايب Lenovo😀 اية دة هي عدوى
    وحشتني يبني من زمان مكتبتش حاجة اللف مبروك علي اللاب مع اني اول واحد عارف
    بس سدئني هم شهرين او 3 بالكتير و هتعامل اللاب بالجزمة و انا مديلك تاريخ و هنشوف :))
    سلام يا كبير🙂

    • elahlawy says:

      اه يا عم عدوى لينوفو .. محسسني اني جايبه من وراك ليه مش عارف .. مع انك كنت شايف الفلوس وهيا بتتدفع يعني😆
      ان شاء الله هنطفشهم .. ونخليهم يكرهوا اللابات علشان زرار الفنكشن اللي بره ده😆
      ومحدش هيقعد اﻻ ومعاه كارنيه العضوية بتاعه
      ان شاء الله يا ريس الموضوع بتاعنا لو تم واخدناها تاني السنة دي هنفذ الفكرة دي🙂
      مش هعامله بالجزمة .. اخري يوم ما هزعل منه اووي .. شبشبين وهصالحه في ساعتها😆

  4. 3laa says:

    مبروك على اللاب توب وعقبال ما تتجيب فنوس رمضان

  5. Ahmed Samir says:

    يااااااه بس كده طيب حيث كده بقى سيب اليوزر نيم والباسوورد وانا هروقلك البلوج كل اول شهر كده 😆😆
    والففففففف مبروك ياسيدي على اللاب يتربى ف عزك ان شاء الله سميته ايه ؟؟😆😆
    وحمد الله ع السلامه ياكوتش🙂

    • elahlawy says:

      يا سلام يا احمد حبيبي والله انت اللي هتقوم بالمهمة بقى يا بطل
      هسيبلك الباسورد تحت المشاية اللي على عتبة ورد بريس ان شاء الله😆
      حبيبي يا ابو سامية😆
      الله يبارك فيك يا حبي .. سميناه حنفي على اسم جدو
      ايه ده ؟؟ … يعني انا هيبقى اسمي ابو حنفي
      لالالالالالالالا
      اسمه لينوفو يا عم .. اهو ده ارحم😆
      الله يسلمك يا كبير🙂

  6. taitos7 says:

    الف مبروك على اللاب
    “انتم السابقون ونحن اللاحقون”

    have a nice vacation

    • elahlawy says:

      الله يبارك فيك يا حبي
      ناوي تعملها وتجيبلك عيل .. يالا ربنا معاك🙂
      مبروك مقدما ان شاء الله

      have a nice vacation

      Thanks man
      u too …🙂

  7. taitos7 says:

    i already have one

    Dell ya man

    • elahlawy says:

      يا راجل !!
      مبروووووووووووك عليك يا جميل🙂
      يتربى في عزك ان شاء الله🙂
      دلوقتي عندنا 3 كتائب
      كتيبة 1 : مشجعي لينوفو .. ودول موجود منهم 2 بس😆
      كتيبة 2 : مشجعي الدل انت وعبدالله بس … صح ؟
      انا بموت في الدل وربنا .. مش عارف بحبهم كده وخلاص🙂
      كتيبة 3 : اﻻتش بي .. ودول اكتر ناس موجودين لحد دلوقتي🙂

  8. My Fate says:

    ألف مبروك على الاب
    متاخرة قوي بس ظروف بقي
    إحساس حلو جداا أول ما الواحد يفتحه كده وتحس أنه ابنك🙂
    وأنا كملت الموضوع للأخر بس بعد كده ممكن تحط مصاصة هدية فى الأول عشان الواحد يتسلي بيها🙂
    ويا رب دائما كده المواضيع تبقي مفرحة
    والأخبار حلوة كده
    سلااام

    • elahlawy says:

      الله يبارك فيكي يا
      My Fate
      وﻻ متأخرة ولا حاجة .. وربنا يخرجك من الظروف دي على خير ان شاء الله🙂
      مصاصة !!
      جديدة دي🙂
      ممكن اشوف الموضوع ده برضه😆
      نورتي البلوج🙂

  9. الف مبروك يا معلمي على الاب يتربى في عزك معلش متاخره شويه علشان كنت مسافر
    بس انت ليك وحشه يا كوتش خلينا نشوفك

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s