Posts Tagged ‘الجيش’

السلام عليكم ورحمة الله وبركاته

ازيكم يا بشر

🙂

انا عارف اني بقالي زمن مكتبتش حاجة بس معلش انشغلت شوية الفترة اللي فاتت دي بحاجات كتيرة جدااا

!

اولا : شكرا لكل اللي دعولي في موضوع الجيش ده

الحمد لله انا اخدت اعفاء نهائي

🙂

وعملت افراح على الاخ : تويتر افندي -حفظه الله- , والاخ فيس بوك

اول مرة احب شعري النهاردة  #Sh3roA7mer

الكابتن ابو شعر احمر – مين انا – هو في غيرك #Sh3roA7mer

في حد شعره احمر يدخل الجيش .. اتقالتلي النهاردة في الكشف #Sh3roA7mer #elgeesh

ودي لما اخدت الشهادة

من امام الكلية احيكم , اخدت اعفاء الحمد لله 🙂 .. واخدت الشهادة المؤقتة 🙂 .. ومع الناس الكويسة .. لولولولولي , لولولولولولي مبرووووك عليا

ودي لما كنت مع اصحابي في فطومة من موبايل عبدالله

tweeting from Fatoma with my friends .. Nice time

دي كانت لحظات سعادة في حياتي عمري ما هنساها

🙂

ثانيا : شكرا لكل اللي دعولي بزمة , وشكرا للرجالة اللي قضيت معاهم احلى فطار واحلى يوم

وشكرا لمنطقة التجنيد اللي طلعوا عيني علشان يدوني شهادة الاعفاء

كان يوم ب شهر من الايام بتاعتنا دي

😀

..

دي كانت في شقة عبدالله بعد اما قضينا احلى يوم مع بعضينا

شكرا يا عبدالله

ان شاء الله نكرر الفطار ده كل سنة يا رجالة

🙂

الحمد لله .. اللهم لك الحمد كما ينبغي لجلال وجهك وعظيم سلطانك

See this post also on BooDy’s Blog

🙂

سلااام

Advertisements

حاسس اني … رايح الجيش !!

Posted: August 15, 2010 in Me
Tags: ,

السلام عليكم ورحمة الله وبركاته

ازيكم يا بشر .. عاملين ايه في الصيام

؟

يارب تكونوا بخير

🙂

ساعات قليلة , واطلع على منطقة التجنيد في المنصورة علشان الكشف الطبي بتاع الجيش

الاتنين 16 – 8 – 2010  .. 6 رمضان لسنة 1431

الساعة 6 ونص صباحا

لازم اكون موجود في منطقة التجنيد – سندوب

ولازم تكون كل حاجتي معايا

اوراقي : كلها جاهزة ومتصورة – شعري : حلقته وقصرت السوالف – الاشعة بتاعت رجلي اللي كانت مكسورة وربنا يستر ودي تطلعني

!!

فاضل اخر حاجة

دعواتكم ليا ان ربنا يسترها معايا بكرة ان شاء الله

🙂

مش عارف اقول ايه بصراحة

انا اول مرة من ايام نتيجة الثانوية – اشوف اهلي بالقلق ده

قاعدين يكلمولي الناس , وبيدعولي وبيوصوا الناس تدعيلي … وعلى الحال ده بقالهم اسبوعين تقريبا

اسبوعين عايش في قلق وتوتر – لحد اما قربت اتجنن خلاااااااااص

😀

بس هما معذورين – اصلي كنت عاملهم رعب في موضوع الجيش ده

😆

بس والله دلوقتي مش فارقة ..  إعفاء او  عسكري او  حتى  ظابط

يمكن لو دخلت ظابط هبقى على الاقل عارف ال 3 سنين الجايين في حياتي هعمل فيهم ايه

!!

ربنا يكتبلي اللي فيه الخير – ويرضيني بيه

ياااااارب

🙂

….

انا عدت عليا فترة من اصعب الفترات اللي مريت بيها في حياتي كلها

حالة اكتئاب فظيعة – وبعدين حالة لا مبالاة وملل قاتل – وبعدين حاولت اهدي نفسي شوية

واقعد اقنع في نفسي ان الدنيا مش مستاهلة .. وان الحياة مش بتدي لحد كل حاجة

وبعدين دخل رمضان والبرامج الدينية

رحلة للسعادة – عمرو خالد …. خواطر 6 – احمد الشقيري

اتعلمت شوية حاجات وشوية أدعية حلوة من “رحلة للسعادة” … برنامج جميل فعلا ياريت تتابعوه

🙂

والحمد لله .. الحالة النفسية يعني بدأت تتظبط شوية .. محتاج شوية وقت بس

والحمد لله على كل شئ

🙂

دعواتكم ليا .. انا فعلا محتاج كل دعوة دلوقتي

ربنا يسترها معايا ياااااارب

سلام

اوراق الجيش

Posted: July 21, 2010 in Uncategorized
Tags:

السلام عليكم ورحمة الله وبركاته

دي الاوراق المطلوبة لشاب التجنيد

1-

البطاقة الشخصية … وتصورها شوية صور كتير كده

2-

فيش جنائي حديث … وده اللي اسمه الفيش الاول , واللي مطلعوش يلحق يطلعه بسرعة

بيروح اي قسم فيه كمبيوتر ويقوله عايز فيش مستعجل علشان الجيش

بياخد منك 15 جنيه وبياخد بصماتك على الكمبيوتر وبيصورك كمان , ويقولك تعالى خده بكرة

3-

اصل بطاقة التجنيد 6 جند … الورقة البيضا الصغيرة دي , واللي ضاعت منه يروح يطلع واحدة من القسم

واسمها بدل 6 جند , ورقة صفراء كبيرة

4-

اصل المؤهل – او الافادة .. والدفعة التانية لازم اصل المؤهل

5-

اصل شهادة الميلاد – كمبيوتر

6-

شوية صور ليك , مش اقل من 4 صور – 4 * 6

7-

فصيلة دم من مستشفى حكومي – ولازم تكون من مستشفى حكومي وتتأكد من انها مختومة  ودي بتاخدها وانت واقف

8-

قيد عائلي – وده مش شرط انت اللي تعمله ممكن والدك او اي حد قريبك بس تديله كل البيانات الخاصة بعيلتك

وده حاولوا تطلعوه بدري , علشان بياخد وقت

9-

اخر حاجة واللي تعتبر اصعب حاجة

قسيمة الزواج — لو انت متجوز

😀

……….

اخر حاجة خالص بقى

تاخد الكلام اللي فات دا كله وتروح واخد بعضك وطالع على القسم اللي سعادتك تابع ليه

وتروح تديلهم الكلام ده

وهناك هتلاقي جندي مجند قاعد مخصوص علشانك

🙂

وهو بقى هيعملك حاجة اسمها الفيش الثلاثي .. وبعد اما تخلص هيديك المعاد اللي هتروح فيه منطقة التجنيد بتاعتك

علشان تبتدي الكشف بتاعك

وربنا معاكم ومعانا

اي حد عنده اي اسئلة او استفسارات يسأل هنا وانا تحت امره

سلاااام

🙂

اللي هيحصل بعد كده وانت في منطقة التجنيد تقدروا

تقروه هنا على بلوج

عبدالحميد ابراهيم

الدفعة التانية “نص تاني – مواليد 1-7” نصيحة تبدأ تعمل ورقك على نص 9

علشان تلحق تخلص بدري

علشان هتبدأ الكشف من يوم 1 – 10

وربنا معاكم جميعا

🙂