Posts Tagged ‘خدها نصيحة واسمع كلامي’

السلام عليكم ورحمة الله وبركاته

ازيكم جميعا

🙂

امبارح قولت .. حد يشتري قلب ؟

وواضح ان الناس كلها راضية بحالها .. ومحدش عايز يشتري .. والمزاد لسه مفتوح على فكرة

😆

النهاردة بقى عايز اقول شوية كلام

مهم شويتين

وربنا يجعل كلامنا خفيف عليكم وتستحملونا

😀

اولا …. وقبل ما ادخل في موضوعي عايز اقول شوية حاجات حصلت للواحد ممكن لو حصلت لأي حد

هايخد في وشه ويتشائم .. ويسود اليوم على نفسه وعلى اللي حواليه

حصلت امبارح حاجة من افظع الحاجات اللي ممكن تحصل للواحد في حياته

من غير سابق انذار .. او اي حاجة

اختصارا

كملت يومي عاادي جدااا .. طبعا مخي مش بيبطل تفكير

سلبي + ايجابي ….. وخدوا بالكم من الحتة دي كويس ﻻن ده موضوعنا

المهم خرجت بره وﻻقيت رجلي مودياني عند معرض الكتاب اللي ورا البغل في المنصورة

روحت ولقيت ايدي رايحة عن قسم التنمية البشرية في المكتبة

ولقيتها بتطلع -اللي هيا ايدي برضه- كتاب للدكتور ابراهيم الفقي اسمه

التفكير السلبي و التفكير اﻻيجابي

جبته ومكنش ليا نفس اقراه .. بس جبته وانا عندي اقتناع اني هتغير بعد الكتاب ده

قولت قبل كده  اني باخد كورس

Soft Skills & Communications

بصراحة كل مرة احساسي بيزيد وبتعلى طاقتي اكتر وبيزيد حماسي اكتر

مش عايز اقولكم انا كنت رايح امبارح وجوايا كمية طاقة سلبية

تكفي ال 25 طالب اللي كانوا قاعدين معانا .. واﻻنستركتور نفسه اللي واخد كمية دبلومات وشهادات في الموضوع ده

ﻻ حصر لها

راجل عظيم فعلا .. بيعرف ازاي يتعامل ازاي مع كل نفس موجودة في الحيز بتاعه

سواء -النفس دي- كانت محبطة .. متفائلة .. مخنوقة منه .. متضايق عموما .. مخنوقة من حياتها

امبارح .. كانت اجمد حصة حضرتها

🙂

بجد بجد في اثناء الكورس ولحد نهايته انا عمال بندمج وبصحصح .. وبفوووق .. وبنسى همومي وبفكر ايجابي جداا

وكل الطاقة السلبية اللي كانت جوايا اختفت

وده تأثير الراجل علينا كلنا طبعا

وان شاء الله البوست الجاية .. هتبقى عن التأثير على اللي حواليك

سواء صحابك او اللي تعرفهم واللي متعرفهمش …. من خلال تعاملاتك مع الناس

🙂

طبعا طوول الليل وانا ال 2 وﻻد التييييييت اللي عندي-كنت حكيتلكم عنهم قبل كده- كان عندهم ماتش مصارعة جوايا

😆

المهم ….. كان عندي تسليم تاسك مهمة جداا في المشروع النهاردة .. والمفروض اني هشرح للناس اللي معايا الكود اللي كتبته

بكل بساطة

نزلت الصبح عامل اني ناسي كل حاجة وﻻ اكن حاجة حصلت .. حضرت سكشنين من واقع 4 سكاشن المفروض احضرهم في 3 فترات

محدش يقولي ازاي

كان ﻻزم اخد غيابي في 4 سكاشن + المشروع .. والمشروع فترة لوحده خااالص

😆

…..*…..*….

المهم كان عندي ميتنج بس مش تبع المشروع .. كان مع ناس مهمين

اثناء انتظاري ليهم .. طلعت الكتاب كان معايا في شنطتي .. وقعدت اقرا فيه

من هنا بقى يبدأ موضوعنا فعليا

بكل بساطة الراجل (ابراهيم الفقي) من اول 15 – 20 صفحة

غير تفكيري تماما وثبتني على التفكير اﻻيجابي واللي المفروض اتعامل بيه في حياتي كلها

بكل بساطة

قالك ايه الحاجات اللي بتخليك -تدفعك- تفكر تفكير سلبي في حياتك كلها

  1. البعد عن الله سبحانه وتعالى
  2. البرمجة السابقة .. اللي انت اتبرمجت عليها وانت صغير .. وبقت عاداتك واللي بعد كده بقت طباعك
  3. عدم وجود اهداف محددة
  4. الروتين السلبي
  5. المؤثرات الداخلية
  6. المؤثرات الخارجية
  7. العيش في الماضي
  8. التركيز السلبي
  9. حالة المزاج المنخفض
  10. الصحبة السلبية
  11. بعض وسائل اﻻعلام

….

طبعا … يعني بعد اما تعرفوا الحاجات دي كلها وتأثير كل حاجة فيهم على البني ادم

حاجة واحدة بس منهم ممكن تخرب حياتك كلها -مش بس تبعد وتكره- ﻻ دي تخليك تنشر الكره ده في كل مكان على وجه اﻻرض

وبين الناس كلها

هتبقى انت بقيت عبارة عن طاقة سلبية ليها رجلين وماشية على اﻻرض

تخيل معايا بقى .. كل واحد فينا مشي بعكس ال 11 حاجة اللي موجودين فوووق

وكل واحد فينا يتخيل حياته عاملة ازاي بعدها

ويثبت -يفرمل- بقى على كده

وانا بقولكم اهو .. بإذن الله هتبقى الحاجة اللي انت عايزها بعد كده ان شاء الله

🙂

…..*……*….

انا تخيلت نفسي امبارح اني طلعت قلبي وبعته او رميته .. وعيشت من غير قلب .. وﻻ مشاعر وﻻ احاسيس

بكل بساطة .. حسيت اني همشي في الشارع وفي حفرة موجودة في جسمي

اعصابي باردة جدااا .. اللي هيتعامل معايا مرة او اتنين .. هيكرهني بعد كده ومش هيكلمني

ببساطة مفيش تعامل مع الناس .. ﻻن محدش هيرضى يتكلم معاك اطلاقا

بالظبط .. فاكرين الموضوع بتاع ازاي تبقى غلس

.. وحاجة من ضمنهم انك تغلس على واحد وهو بيكلمك في موضوع مهم

بإنك تقول نكتة .. او تقاطعه وهو بيتكلم .. ساعتها انا اضمنلك ان الشخص ده

هيكرهك

بكل بساطة برضه

هبقى انسان ملوش اي ﻻزمة في الحياة .. عايش علشان يعيش … وبس

انا تخليت نفسي كدا .. في الحالة اللي كنت فيها قبل الكورس طبعا

حسيت ساعتها ان خلاص حياتي كلها بقت جحيم …. طب ليه وعشان ايه دا كله ؟؟

……*…….*…..

فاقترحت على نفسي اني اقابل ناس مهمين واتكلم معاهم .. علشان نشوف ابعاد القضية

اختصارا للموضوع

اكتشتفت اني في ناس -من غير اي سبب- عندها حب السيطرة والزعامة والقيادة

وناس كتيير كده على فكرة

وبصوا بقى .. من اﻻخر .. دي النقطة التانية في موضوعي النهاردة

وبجد ركزوا شوية

هو انا لما اسأل اي واحد سؤال واقوله .. ممكن تقولي ايجابيات موضوع معين ؟؟

وافضل مركز معاه على الحاجت اﻻيجابية

وبعدين يطلع فجأة يقولي … طب ليه مبصتش على السلبيات

ايه ده ؟؟؟ لييييييييييه ؟؟؟ يا سيدي طب وليه نبص على السلبيات ونحبط نفسنا ونكره حياتنا

وبعدين التفكير الايجابي اللي كنت بتكلم عليه … وربنا كان كله على ارض الواقع وﻻ خيال وﻻ احلام

كله من الحقيقة

…..*……*…..

معلش اسمعوني واعصروا على الشاشة شوية لمون علشان الحتة اللي جاية دي خطييييرة

من فترة ليست ببعيدة كان في موضوع شاغل بالي كده ومحيرني وكنت محتاج حد .. يديني رأيه في الموضوع ده

وكمان اكون بثق فيه

”  ليه الثقة ؟؟

  • ﻻن مش اي حد تديله ودانك وتخليه يأثر عليك في اي حاجة في حياتك
  • هتبقى فين شخصيتك انت لما كل من هب ودب ماسك ودنك وعمال يلعب في دماغك
  • مهما كان الشخص كبير .. في حاجة عند كل واحد فينا اسمها ” التقبل الذاتي ” .. ان مثلا انت مش راضي عن شخصيتك وﻻ عن تصرفاتك وﻻ عن شكلك وﻻ عن حياتك

فـ اي واحد معندوش التقبل الذاتي ده هتلاقيه رامي ودنه مع كل الناس

ده يقوله كلمة حلوة تفرحه … وده يديله رأي يهدمله حياته كلها

طب مش واخدين بالكم .. انه مهما قال على نفسه انه عندي -بفتح النون وكسر الدال- ومخه تخين .. برضه معندوش شخصية

بدليل انه محاوش يفكر “ولو للحظة” في مشاكله ويحلها هو بنفسه

بدل اما يروح للاخرين مهما كانوا .. ﻻن اﻻخرين مهما كانوا مش عارفين كل حاجة عن مشاكلك وحياتك …. صح ؟

لمجرد انه شخص عايز ياخد رأي حد .. والمشكلة اﻻكبر انه زي ما قولت قبل كدا مش عارف هو عايز ايه ؟؟

عدم وضوح الهدف

فالبتالي .. اي حاجة هتحصل , هياخد رأي اي حد ويرميله ودانه .. حتى لو كان الشخص اللي هيديله النصيحة ده مش عارف جوانب القضية كلها

فييين شخصيتك انت ؟؟

انت لغيت نفسك من الحياة لمجرد انك بتمشي بأراء وتفكير واسلوب الاخرين في الحياة

عارفين ان كل واحد فينا مختلف تماما عن التاني

حتى لو كانوا في صفات بينهم قريبة من بعض اووي .. حتى لو كانوا اخوات .. بس في حاجات كتييير جدااا مختلفين فيها

وربنا خلقنا كده

…..*……*…..

نيجي بقى الشخصية القيادية واللي عندها حب الزعامة والقيادة

واللي اكتسبتها سواء من البيئة اللي عايشة فيها او اتربت على كده

المهم بقى …. الشخصية دي ادام هيا محطوطة في الموقف ده .. يبقى ﻻزم يكون عندها حسن تصرف

ازااااااااي

يعني مثلا .. ميحكمشي -مش يحكم- بمبدأ الباب اللي يجيلك منه الريح سده واستريح

احب اعرفكم اني بكره المبدأ ده جداااا .. واحب اعرفكم اكتر بالمبدأ ده وهو ما يسمى بمبدأ

الهروووب

”  الهروب من الواقع واللجوء للافكار السلبية ظنا منا انها هتساعدنا في تجاوز مشاكلنا

دلوقتي

  • لو انا حبست نفسي في بيتنا .. واستسلمت للمشاكل .. وقولت خلااص مش عايز اشوف حد وﻻ اتكلم مع حد .. بذمتكم ده هروب وﻻ مش هروب ؟
  • لو انا قعدت في بيتنا .. اﻻحساس السلبي هيزيد عندي وخلاص .. اذن انا استسلمت للواقع .. وكل سنة وانتوا طيبين بقى .. وابقى قابلني لو نجحت او شوفت نجاح في حياتك
  • وﻻ تقدير وﻻ نجاح وﻻ تقدم .. وﻻ نجاح في حياتك وﻻ في اي حاجة

ليه كل ده ؟ علشان انت ماشي كده بمبدأ

الهرووووب

طبعا المناقشة كانت حادة جداا  بيني وبين الشخصية القيادية العظيمة دي

ﻻن اصعب حاجة في الدنيا انك تقنع واحد مقتنع من جواه انه قيادي عظيم بإنه يغير اسلوبه ويغير تعاملات مع الناس ويغير طريقته في سرعة الحكم على المواقف وميمشيش بمبدأ الهروووب

ولو كان سهل اقناعه فعلا .. مكناش سمعنا عن “هتلر” وﻻ “رومل” .. وﻻ اي حد من الشخصيات القيادية العظيمة دي

🙂

…….*…….*…….

المهم اللي كسب في اﻻخر … طبعا هو اللي كان معاه الادلة واﻻقوال المأثورة

وانا كان معايا كتاب ابراهيم الفقي النهاردة في شنطتي .. وكنت في الكورس امبارح

وطوول الليل بقرأ .. رأي د.انيس منصور في المرأة

طبعا اﻻخير ملوش اي علاقة باللي قبله .. بس انا هشرحلكم ليه قريته وانا في الحالة دي

😆

–  الراجل ده (انيس منصور)عمل فيا حاجات كتيير .. بس برضه بحترمه وبقرأله  –

والرجالة دلوقتي هيدخلوا يسقفولي .. وصفافير بقى للصبح وهيييييييييه

😆

وغالبا البنات – اﻻنسات  (الجنس اللطيف) هيكرهوا البلوج بعد البوست دي وغالبا هتتمسح من الريدر عندهم

ﻻنهم عارفين ان انيس منصور هو عدو المرأة

😆

ومن غير ما اقتبس حاجات كتير انا هجيبلكم اللي عجبني من رأيه واللي همشي بيه بعد كده

هنبتدي دلوقتي

  • امراه فشلت في الحب ثم تبحث عن حب جديد‏:‏ انها لا تعرف الحب‏
  • حتى عالم النفس العظيم فرويد .. خدعته النساء
  • الخداع والكذب والغرور‏:‏ ليس عملا واعيا عند المراه‏..‏ انها الغريزه
  • تحبها كثيرا تحبك قليلا‏,‏ تكرهها قليلا تكرهك كثيرا
  • من راي المراه ان لكل رجل غلطتين‏:‏ كل مايقول وكل مايعمل‏
  • الرجل هو الجنس اللطيف والمراه هي الجنس يالطيف‏
  • لن تندم كثيرا اذا احببت اي شيء غير المراه‏
  • نمله واحده تستطيع ان تفسد جبلا من السكر
  • المراه عندما تطلب النصيحه‏,‏ فانها تريدك ان توافقها علي رايها
  • المراه التي تعتقد ان احدا من الرجال لايستحقها يمكن معها حق ولكنها سوف تنتظر طويلا‏
  • يسعد المراه من يقول لها‏:‏ انت قمر‏,‏ مع ان للقمر وجهين فقط
  • اسوا مافي الحب‏:‏ المراه‏
  • لم يعرف المراه من عرف الف امراه
  • باذنيك تستطع بان تكسب المراه استمع اليها
  • اذا قالت لك احبك‏:‏ صدقها‏,‏ اذا قالت‏:‏ واكثر من نفسي‏:‏ لا تصدقها
  • هل هناك شيء لم يقله احد عن المراه؟ نعم‏:‏ ربنا علي الظالم‏
  • العدل ان يتساوي الرجل بالمراه‏,‏ فقد حصلت علي اكثر مما تستحق
  • من النادر الا تعرف المراه الحب‏,‏ ومن النادر جدا اذا عرفته ‏,‏ ان تكون قد مارسته مره واحده‏
  • اخطر امراه هي التي ليس لديها ما تخسره
  • لاهي مكسب اذا عرفتها‏,‏ ولاهي خساره اذا لم تعرفها
  • اذا هاجمنا سكان الكواكب الاخري بالقنابل النوويه فسوف تموت كل الاحياء علي الارض الا‏:‏ المراه والخنازير هذه حقيقه علميه
  • خدعوها فقالوا لها‏:‏ لا فرق بينك وبين الرجل‏
  • المراه تختار من يختارها‏ ………………. شاكك في دي .. وممكن يكون معاك حق لو هيا اصلا مكانتش بتحبه ﻻنها معرفتش الحب اصلا
  • اذا امسكت المراه لسانها لحظه واحده وفرت علي نفسها سنوات من الندم ……. خطييييييرة جداا

اخر حاجة

  • هناك طريقتان لمناقشه المراه‏:‏ كلتاهما بلا نتيجه‏ …. صح مليوووووووووووون في الميه

….

واللي مش مصدق .. يسيب ايميله في رد هنا .. وانا هكلمه بنفسي وأقنعه

وياريت تكون الناس فهمت حاجة من الكلام ده

وسوري على اﻻطالة .. بس انا شايف اني مقولتش حاجة غلط

وكان ﻻزم اشرح كل حاجة

واللي شايف حاجة غير اللي انا قايلها .. برضه ايميلك في رد هنا على البوست ولو مش عايز ردك يظهر

مفيش مشاكل .. انا مفيش رد بيظهر على اي حاجة هنا اﻻ لما اشوفه اﻻول

🙂

وانا معايا فيديوهات .. وكتب سوفت وهارد كوبي .. واي حاجة انت عايزها

بس قوووول

بس محدش يدخل الكلام ده من ودن ويطلعه من التانية

…..*……..*…..

ارجو ان الناس تفضل فاكرة الكلمتين دوول .. وميبقوش زي بوست عدت

عايز ايه ؟؟ نفسك في ايه ؟؟

اتدفنت في وسط الكلام .. وراحت مع اللي راح .. بس اللي عايز حاجة يقووول

سلام يا بشر

واقعدوا … بالعافية .. وتفكير ايجابي .. تفكير منطقي .. بلااش تحكم على المشاكل قبل ما تعرف ايه المشاكل اصلا .. بلااش الهروووب

Life is to short … To become any body else

The best thing about life … That u don’t know what is going to happen

Any one make out … What he thinks about

افكار اﻻنسان ومعتقداته .. هيا التي تصنعه

Think … Ask people … But take your own decisions

If you can DREAM it … You will do it

Can you fight?? … Then Fight your bad thoughts

You are the only one who can change his life … Just Start

Do not wait the chance … You can make it

NEVER … Back Down

NEVER …. Look Back

…..

اللي عايز من الجمل دي اكتر واكتر

BoooDy

🙂

Advertisements

السلام عليكم ورحمة الله وبركاته

النهاردة موضوع جديد .. وبداية مختلفة ان شاء الله

img0094_001

موضوع النهاردة .. عبارة عن كلمة .. هيخرج منها جملة .. وهيخرج منها مستقبلنا كله ان شاء الله

عايز الناس تبص معايا كده .. وناخد بالنا من الجملة اللي جاية دي

“” وما نيل المطالب بالتمني … ولكن تؤخد الدنيا غلابا “”

طبعا اكيد كلكم عارفين الجملة دي

بس انا مش جاي اسألكم انتوا عارفينها ولا لا … انا هقولكم انا ليه جبت سيرتها … بإذن الله

موضوع النهاردة كله عن الجملة اللي فاتت دي

…..*…..*…..*…..*…..

سؤال … كل واحد فينا كان بيحلم بإيه وهو صغير ؟؟

اللي كان نفسه يبقى ظابط .. واللي كان عايز يبقى مهندس .. واللي دكتور

طب … كام واحد فينا احلامه اتغيرت بعد ما كبر شوية ؟؟

وانا صغير كان نفسي ابقى مهندس .. بس لما كبرت شوية اتغيرت فكرة المهندس .. وكان نفسي ابقى ظابط

طب … لما كبرنا وبقينا رجالة كبار وعاقلين .. نفسنا بقى نعمل ايه ؟؟

واحد يقولك … شقة و شغلانة و عربية و عروسة

طب لحظة … انت هتعمل دا كله ازاي … مفكرتش انك لما تخلص كليتك … هتعمل ايه بعد كده ؟؟

طب انت عايز ايه ؟؟ مفهمتش حاجة منك لحد دلوقتي

يا سيدي معلش اصبر .. هتعبك شوية .. ارجع معايا للجملة اللي كنت كتبتها بالازرق فوووق

ايون هيا دي

“” وما نيل المطالب بالتمني … ولكن تؤخد الدنيا غلابا “”

هل فعلا الجملة دي صح ؟؟ … هل فعلا لازم ناخد الدنيا  ” كدهو ” … زي ما بيقولوا

هل في رايكم ان الانسان ميتمناش حاجة .. لكن ياخدها عافية كده او يسيبها للظروف ؟؟

في رأيي .. التمني من ضمن الحاجات الاساسية اللي بتدفع الانسان للنجاح

طبعا .. دا بعيد عن العوامل المحيطة بيه .. لكن خلونا نتكلم عن الاماني

…..*…..*…..*…..*…..

واحد صاحبي واحنا في غرفتنا العزيزة 513 .. فحصل موقف كده … فقولت يااااه كان نفسي اعمل كذا

قالي … منا كان نفسي اخش هندسة … فانا بصتله كده .. طب ايه جاب دي لدي ؟؟

فقالي .. مش كل اللي بنعوزه بنلقاه … بس الحمد لله

قعدت بعدها افكر مع نفسي في الجملة دي … طب وليه منحاولش نتمنى بجد و نحاول نحقق اللي احنا عايزينه ؟؟

ليه دايما سايبنها كده … يا اما بالبركة … يا اما بالعافية ؟؟

ليه يا جماعة مبنعملش خطة او قايمة ونكتب فيها كل اللي احنا عايزينه ؟؟

وتعملهاupdate بإستمرار

…..*…..*…..*…..*…..

يجي واحد يقولي انا عاملها في دماغي …. بس صدقني وهيا في دماغك مش زي لما تكتبها

لان اكيد اكيد في حاجات كتير هتروح من دماغك .. لكن لما تكتبها مش هيروح ولا هتنسى منها حاجة … ان شاء الله

نااااس كتير … مش عارفين هما عايزين ايه … وغيرهم عارف هو عايز ايه … بس مش عارف ينفذه

وغيرهم عارفين هما عايزين ايه ومحددين هدفهم .. بس مش عارفين قدراتهم

او … مش واثقين في قدراتهم اللي تخليهم يخاطروا و يحاولوا يعملوا الصعب

ليه دايما بتدي لنفسك رسائل سلبية … ليه دايما عندنا كلمة “مقدرش” .. و “مش هعرف” …  و “صعب عليا ” .. ؟؟

هو طبعا … {وَلاَ تُلْقُواْ بِأَيْدِيكُمْ إِلَى التَّهْلُكَة} (195) سورة البقرة

بس ده مستقبلك وحياتك اللي لازم تسعى علشانها .. وتخطط ليها

انت فعلا لو تعرف انت بجد عايز ايه ؟؟ … اااااه  لو نعرف قدراتنا … هنكسر الدنيا

…..*…..*…..*…..*…..

صحيح … ان مش كل اللي بنعوزه بنلقاه .. واللي مكتوبلك هتشوفه .. ومحدش بياخد اكتر من اللي مكتوبله

بس برضه :- {وَقُلِ اعْمَلُواْ فَسَيَرَى اللّهُ عَمَلَكُمْ وَرَسُولُهُ وَالْمُؤْمِنُونَ} (105) سورة التوبة

و كمان {إِنَّا لَا نُضِيعُ أَجْرَ مَنْ أَحْسَنَ عَمَلًا} (30) سورة الكهف

يا جماعة احنا عندنا طاقة مهولة … ياريت نستغلها صح … وبلاش نخليها ضدنا … ونفرغ الطاقة دي في اننا ندي رسايل سلبية لنفسنا او لغيرنا

بجد بإيدك ممكن تصنع حياة كويسة ليك .. بإيدك ممكن تكون اسعد انسان على وجه الارض .. ان شاء الله

…..*…..*…..*…..*…..

يا شباب … من النهاردة مش عايزين حد عايش كده وخلاص

نفسي … نبقى كلنا ايجابين … كلنا نشجع بعض

اللي يقع مننا مش نقف … بس نحاول نشده معانا

نفسي كلنا من دلوقتي … محدش ينام .. مش قصدي منامش النوم بتاع السرير

لا … قصدي النوم بتاع الانتخه .. النوم بتاع الكسل

بجد نفسي

نفسي … نبقى احلى شباب في الدنيا ….. شباب المسلمين

نفسي … تبقى بلدنا “” مصر “” احلى بلد في الدنيا

نفسي اقول كلام كتييييير

بس شكلكوا زهقتوا مني

بس خلاص … انا خلصت

بس انا كده مقولتش حاجة … لسه في كلام كتييير

بس ايه فايدة الكلام من غير افعال

وايه فايدة العقل .. لو مشتغلش

…..*…..*…..*…..*…..

اخر حاجة

ياريت الناس تقول هي استفادت ولا لا ؟؟ .. ولو استفادت تقول هيا استفادت ايه ؟؟

هل فعلا … الكلام اللي انا قولته صح … ولا الناس كلها عارفة طريقها .. وانا الي مش عايش في البلد دي

ملحوظة : كنت عايز اتكلم شوية عن ازاي تعرف قدراتك ؟؟ … وازاي تحدد اهدافك ؟؟

وازاي تستفيد من وقتك ؟؟ وازاي نستخدم طاقتنا ونخليها ايجابية ؟؟

بس الوقت لا يسمح فقولت خليها في بوست تاني … ان شاء الله

…..*…..*…..*…..*…..

لكن كل اللي هقوله بس … اتفرجوا على حلقة “قوة الادراك” للدكتور ابراهيم الفقي

وان شاء الله هتستفادوا كتييير جدااااا

وهتلاقوا كل اللي عايز اقوله ان شاء الله

انا حاولت ارفعها … بس للاسف النت بطئ جداااا

هبعتها هنا -ان شاء الله- اول ما تترفع

…..*…..*…..*…..*…..

او تشوفوا حلقات عمرو خالد برنامج قصص القرآن

وخصوصا الحلقة الثامنة … اللي اسلام كان اتكلم عنها

واللي عايز ينزل الحلقات كلها من موقع عمرو خالد

…..

البوست ده كنت عايز اعمله .. والحمد لله عملته

وده رسالة لشخص معين

ياااارب بقى تفتح الحاجات ومش مشكلة نص ساعة في اليوم .. حلقة او كتاب

المزاكرة مش هتطير يعني .. واهو من ضمن الساعات اللي بتضيع في الجامعة

…..

يارب اكون قدرت اوصل او افيد اي حد بأي معلومة …. ياااااااارب

اللهم ان هذا عملا صالحا جعلته خالصا لك ولا اريد من ورائه شيئا … فتقبله مني يا ارحم الراحمين

سبحانك اللهم وبحمدك اشهد ان لا اله الا انت استغفرك واتوب اليك

….

يالا … اشوفكم بخير في البوست الجاي …. ان شاء الله

سلاااام

السلام عليكم ورحمة الله وبركاته

يستمر الحوار مع المدخن اياه بتاع المرة اللي فاتت

…….

المدخن : يااااااااااااااااااه انت تااااااااني ؟؟

الشاب : اهلا … اهلا … بتاع الولاعة … ازيك

المدخن : اهلا بيك … الحمد لله … ايش اخبارك ؟؟

الشاب : انا الحمد لله صحتي فل …. وانت … لسه بتشرب سجاير

المدخن : انا .. لا … لالالا … خفيف خفيف يعني

وعلى فكرة انا بطلت اشرب كيلوباترا .. بشرب ميريت دلوقتي

الشاب : ااه .. امممممم .. ما كلها سجاير مفرقتش

طب وناوي تبطلها امتى .. احنا داخلين على شهر رمضان

كل سنة وانت طيب .. فرصتك بقى علشان تبطلها

المدخن : اه اه … ان شاء الله

الشاب : صحيح .. شوفت علبة السجاير الجديدة مرسوم عليها ايه ؟؟

المدخن : اه شوفتها … مالها بقى

……*……*……*……*…..

……*……*……*……*…..

الشاب : ولا مالها ولا حاجة .. انت مش واخد بالك من الراجل اللي حاطط تنفس صناعي ده

ومش واخد بالك من الكلمتين اللي مكتوبين في الجنب على اليمين دووول

المدخن : اه … شكلها محاضرة كل مرة ؟؟

الشاب : لا يا عم ولا محاضرة ولا حاجة … بس كان ليا تعليق عليها كنت عايز اقوله

المدخن : ها … قول يا سيدي

الشاب : فاكر العلبة بتاعت زمان خالص .. كان مكتوب عليها بخط نمنم خااالص على جنب العلبة

التدخين ضار جدا بالصحة

و .. العلبة اللي كانت من فترة .. كان مكتوب عليها بخط كبيير على وش العلبة وانت بتفتحها

” التدخين ضار جدا بالصحة ويسبب الوفاة “

العلبة بتاعت دلوقتي .. مكتوب ومرسوم عليها زي ما انت شايف

……*……*……*……*…..

المدخن : طب انت قصدك ايه … مش فاهم

الشاب : قالك يا عم في العلبة بتاعت زمان … الناس لسه بتشربها

قالوا ==> الخط صغير و يمكن الناس مش شايفه الجملة

في العلبة اللي من فترة … الناس برضه بتشربها

راحوا ==> كبروا الكلام وحطوه على وش العلبة وقالوا يسبب الوفاة كمان

في علبة دلوقتي … الناس لسه بتشربها

قالك ==> يمكن الناس مش بتعرف تقرأ نحطلهم صورة

ونقولهم يا عــمــي بصوا السجاير بتعمل ايه

وزودوا كمان … التدخين يسبب امراض القلب والشرايين

يعني اشرب انت سجاير … وانا هغنيلك بودعك .. اخر وداع

……*……*……*……*…..

المدخن : ههههههههههههه … برضه مكبرها اووووي

الشاب : عارف … انا متخيل شكل علبة السجاير الجديدة

هتكون زي ما هيا .. بس هيزودوا حاجة

هيحطوا سماعة صغيرة كده تحت الصورة .. وكل ما تيجي تفتح العلبة

تلاقي صوت طالع بيقولك

” التدخين ضار جدا بالصحة .. يا عم حرام عليك خنقتني “

” بقالي 20 سنة بقولك التدخين ضار بالصحة وبيموّت وانت مفيش فايدة “

” يا عم ارحمني وارحم اللي حواليك شركات التدخين بتضحك عليك يا … تيييييييييت “

” ضيعت فلوسك عليا وياما نصحوك وقالولك سيبني … انت حر انت الجاني على نفسك “

اشرب واستمتع “

……*……*……*……*…..

اخر حاجة … الحوار ده تكلمة الحوار اللي فات

هنا

برضه انا اللي عامله … وياريت اي حد يستفيد بكلمة او بمعلومة من الموضوعين

يــاريـــت يتفاعل معانا ويكلم الناس

والــدال على الخير … كـفـاعله

…..

سلاااااااااااااااااااام