Posts Tagged ‘صحتك ثروتك’

السلام عليكم ورحمة الله وبركاته

يستمر الحوار مع المدخن اياه بتاع المرة اللي فاتت

…….

المدخن : يااااااااااااااااااه انت تااااااااني ؟؟

الشاب : اهلا … اهلا … بتاع الولاعة … ازيك

المدخن : اهلا بيك … الحمد لله … ايش اخبارك ؟؟

الشاب : انا الحمد لله صحتي فل …. وانت … لسه بتشرب سجاير

المدخن : انا .. لا … لالالا … خفيف خفيف يعني

وعلى فكرة انا بطلت اشرب كيلوباترا .. بشرب ميريت دلوقتي

الشاب : ااه .. امممممم .. ما كلها سجاير مفرقتش

طب وناوي تبطلها امتى .. احنا داخلين على شهر رمضان

كل سنة وانت طيب .. فرصتك بقى علشان تبطلها

المدخن : اه اه … ان شاء الله

الشاب : صحيح .. شوفت علبة السجاير الجديدة مرسوم عليها ايه ؟؟

المدخن : اه شوفتها … مالها بقى

……*……*……*……*…..

……*……*……*……*…..

الشاب : ولا مالها ولا حاجة .. انت مش واخد بالك من الراجل اللي حاطط تنفس صناعي ده

ومش واخد بالك من الكلمتين اللي مكتوبين في الجنب على اليمين دووول

المدخن : اه … شكلها محاضرة كل مرة ؟؟

الشاب : لا يا عم ولا محاضرة ولا حاجة … بس كان ليا تعليق عليها كنت عايز اقوله

المدخن : ها … قول يا سيدي

الشاب : فاكر العلبة بتاعت زمان خالص .. كان مكتوب عليها بخط نمنم خااالص على جنب العلبة

التدخين ضار جدا بالصحة

و .. العلبة اللي كانت من فترة .. كان مكتوب عليها بخط كبيير على وش العلبة وانت بتفتحها

” التدخين ضار جدا بالصحة ويسبب الوفاة “

العلبة بتاعت دلوقتي .. مكتوب ومرسوم عليها زي ما انت شايف

……*……*……*……*…..

المدخن : طب انت قصدك ايه … مش فاهم

الشاب : قالك يا عم في العلبة بتاعت زمان … الناس لسه بتشربها

قالوا ==> الخط صغير و يمكن الناس مش شايفه الجملة

في العلبة اللي من فترة … الناس برضه بتشربها

راحوا ==> كبروا الكلام وحطوه على وش العلبة وقالوا يسبب الوفاة كمان

في علبة دلوقتي … الناس لسه بتشربها

قالك ==> يمكن الناس مش بتعرف تقرأ نحطلهم صورة

ونقولهم يا عــمــي بصوا السجاير بتعمل ايه

وزودوا كمان … التدخين يسبب امراض القلب والشرايين

يعني اشرب انت سجاير … وانا هغنيلك بودعك .. اخر وداع

……*……*……*……*…..

المدخن : ههههههههههههه … برضه مكبرها اووووي

الشاب : عارف … انا متخيل شكل علبة السجاير الجديدة

هتكون زي ما هيا .. بس هيزودوا حاجة

هيحطوا سماعة صغيرة كده تحت الصورة .. وكل ما تيجي تفتح العلبة

تلاقي صوت طالع بيقولك

” التدخين ضار جدا بالصحة .. يا عم حرام عليك خنقتني “

” بقالي 20 سنة بقولك التدخين ضار بالصحة وبيموّت وانت مفيش فايدة “

” يا عم ارحمني وارحم اللي حواليك شركات التدخين بتضحك عليك يا … تيييييييييت “

” ضيعت فلوسك عليا وياما نصحوك وقالولك سيبني … انت حر انت الجاني على نفسك “

اشرب واستمتع “

……*……*……*……*…..

اخر حاجة … الحوار ده تكلمة الحوار اللي فات

هنا

برضه انا اللي عامله … وياريت اي حد يستفيد بكلمة او بمعلومة من الموضوعين

يــاريـــت يتفاعل معانا ويكلم الناس

والــدال على الخير … كـفـاعله

…..

سلاااااااااااااااااااام

السلام عليكم ورحمة الله وبركاته

…….

حوار ساخن جدااا … مع أحد المدخنين

……..

1-لو سمحت … الاقيش معاك ولاعة

2- لا … ممعاييش

1- طب كبريت

2- لا والله … مش معايا

1- ليه … هو انت مش بتدخن ؟؟؟

2- لا … انا بكره ريحة السجاير اصلا

ومش بطيقها خاااالص

1- ليه يا عم الكره دا كله ؟؟؟

2- ايه ده هما مقلولكش ان التدخين خطر وبيدمر الصحة ويؤدي للوفاة … يا اخي دي مكتوبة على العلبة بتاعتها

1- يا سيدي متكبرهاش كده

2- يا عم ولا مكبرها ولا حاجة … انا بقولك على اللي مكتوب … وبعدين انا مجبتش حاجة من عندي

ثم انها لو مكانتش خطر .. وكانت حلوة .. كانت الناس كلها تشربها .. ومكانوش هيقولوا عليها انها حرام

…..*…..*…..*…..*…..*…..

1- ايه ده … حرام … !! … حرام لييييييييه يا عم انت هتحرمها بمزاجك

انت مسمعتش حديث سيدنا محمد -عليه الصلاة والسلام- لا ضرر ولا ضرار

والاية القرآنية : بسم الله الرحمن الرحيم :- {وَأَنفِقُواْ فِي سَبِيلِ اللّهِ وَلاَ تُلْقُواْ بِأَيْدِيكُمْ إِلَى التَّهْلُكَةِ وَأَحْسِنُوَاْ إِنَّ اللّهَ يُحِبُّ الْمُحْسِنِينَ} (195) سورة البقرة … صدق الله العظيم

ومتعرفش ان الانسان سيسأل : – عن عمره فيما افناه … وعن شبابه فيما ابلاه … وعن ماله من اين اكتسبه وفيما انفقه  ……. الخ

…..*…..*…..*…..*…..*…..

تعرف

* العام الماضي..السيجارة قتلت 5 ملايين شخص

* النيكوتين يسبب الإدمان أكثر من الحشيش

* أعداد المدخنين تزيد كل عام بنسبة 10% في العالم الثالث !

* شركات التبغ أخطر من شركات الأسلحة النووية

…..*…..*…..*…..*…..*…..

1- يا نهار ازرق … ايه يا عم هو انا قولتلك انا بشرب حشيش .. دي سيجارة يا عم

2- مهو المشكلة انك بتشرب سيجارة بتضر بيها نفسك وبتضايق الناس اللي حواليك وبتضرهم من ريحتها

وبعدين تعرف ان ضرر الدخان اخطر من ضرر الشرب نفسه

…..*…..*…..*…..*…..*…..

وبالضبط … كما قال سيدنا محمد – صلى الله عليه وسلم – :- مثل الجليس الصالح والجليس السوء .. كحامل المسك ونافخ الكير

” نافخ الكير : وهو الذي يعمل بلحام المعادن ”

فحامل المسك : اما ان تبتاع من او تجد من ريحا طيبة

ونافخ الكير : اما ان يحرق ثيابك او تجد منه ريحا خبيثة ” صدق رسول الله -صلي الله عليه وسلم-  ……. بس خلاص واظن ان التشبيه واضح

…..*…..*…..*…..*…..*…..

1- يااااااااه … يا راجل … دا انت بتكرهها اوووووي

2- والله انت تعرف … انا نفسي امنع الناس كلها انها تشربها دا انت لو سمعت عن الاضرار اللي بتعملهالك هتقول عمري منا شاربها تاني

اصلك متعرفش كمان انها بتخرب البيوت … اه والله يا عم

…..*…..*…..*…..*…..*…..

تخيل الراجل اللي بيدخن .. بيشرب كام علبة في اليوم

قول مثلا … علبة واحدة × 2 جنيه وربع … مثلا يعني …. انا معرفش هيا بكام والله

يعني في الاسبوع : …. 15.75 يعني قول 15 جنيه

في السنة : …. 821.25 … يعني قول 821 جنيه

…..*…..*…..*…..*…..*…..

ياااااااااه … تخيل ده واحد بس في مصر كلها … وبيشرب علبة واحدة بس

امال لو قولنا ان مصر فيها 75 مليون نسمة … تقريبا … دا اذا مكانوش زادوا يعني

المهم … نقول مثلا يعني ان مليون واحد بيشرب سجاير

طبعا مليون ده عدد اي كلام يعني … والمليون دول كل واحد فيهم بيشرب علبة واحدة بس في اليوم

اذن : عندنا في السنة … مليون × 821 … اذن النتيجة 821 مليون جنيه في السنة … سجاير

بجد بجد …. حسبي الله ونعم الوكيل

…..*…..*…..*…..*…..*…..

الملايين دي … لو وزعناها على الغلابة اللي في مصر بس دا مثلا برضه … هنبقى احسن بلد في العالم

ومحدش يقولي الاسعار ونيلة

مهو الاسعار غالية … والناس حتى مش بتقلل من شرب السجاير … دي بتكتر منها كمااااااان

…..*…..*…..*…..*…..*…..*

ياريت الناس تفووووق بقى

حراااااام … عليكم … الناس هتولع في بعضها … من كتر الزهق

عايزين نعيش عيشة كويسة

من غير دخان … ولا سجاير … ولا مخدرات … ولا تلوث

عايزين نعيش في بيئة نقية

وده من حقوقنا

ولا ايه

…..*…..*…..*…..*…..*…..

باقي لسه حاجة صغيرة الحوار ده انا اللي عامله

والأيات القرانية … والاحاديث انا قريتهم بنفسي … ومتأكد منهم تماما

…..*…..*…..*…..*…..*…..

يا جماعة … ياريت اللي يستفاد من الموضوع ده يحاول يتكلم مع الناس فيه

يعني والله انا بحاول بقدر الامكان مع اي حد بشوفه بيدخن

ادعولي … اعرف اقنع الناس اللي هنا الاول

سلااااااااااااام

…..*…..*…..*…..*…..*…..